IḶUAIAN 25 - Alkitab Singog In Mongondow Masa In Tanaa

Sosumba inta pakéon kon Ḷoḷaigan i Tuhan

¹ Ki Tuhan noguman kon i Musa,

² “Potabádon intau Israel modia kon sosumba kon i-Nakó. Ki ine in mokotorop, musti in sia modia kon sosumba

³ sosumba tatua ná tanaa: buḷawan, saḷaka, bitú

⁴ kaeng momahaḷ bo inta totok in moaḷus, kaeng inta nongkon bubuḷ in domba inta nobidu, nokamumu bo nopura, kaeng nongkon bubuḷ in bembé,

⁵ kuḻit in domba koḷakian inta nopura in batangannea, kuḻit noaḷus, kayu akasia,

⁶ ḷana in togá, pododungú sin pakéon kon upacara bo potubaan kon dupa inta mobondu,

⁷ noyagi-yagimai in batu permata inta pokompit kon epod bo oḻingoi in dodob i Imang Moḷoben.

⁸ Potabádon in bangusa tatua momia kon ḷoḷaigan tobatú kon i-Nakó, sinbá Akuoi motaaudon mogutun kon yua-yuak monia.

⁹ Ḷoḷaigan bo touḷutnea musti pomiaan monia podudui in tomayá inta bain tundúon-Ku kon inimu.”

Poti Dodandian

¹⁰ “Pogaidaidon kon poti tobatú inta nongkon kayu akasia inta kobanatnea 110 nosenti, kooḷad bo koḷantudnea in 66 onom nosenti.

¹¹ Aipai in buḷawan taakan kon dotá in bonu bo ḷuainea bo pomiaai domandon kon bongkownea nongkon buḷawan.

¹² Aka kon kayu pobobuḻigan, yo pomiaaidon kon ḻingkit opat nongkon buḷawan bo popoḷutud kon sioḷnea opat, tododoyowa in kon posiḷosi.

¹³ Kayu pomotaanan tatua pomia nongkon kayu akasia bo oḻitai in buḷawan,

¹⁴ bo pobonu in kayu pomomotaanan tatua kon ḻingkit mita tatua inta kon sí in poti tatua.

¹⁵ Kayu pomomotaanan tatua in musti umuran kon bonu mako in ḻingkit mita tatua, bo diábí motaau poḷuaion.

¹⁶ Bo batu doyowa inta pinomaisan kon parenta mita inta bain ogoi-Ku kon inimu bonudon kon poti tatua.

¹⁷ Taḷob in poti tatua pomiadon nongkon buḷawan taakan, kobanatnea 110 nosenti bo kooḷadnea 66 nosenti.

¹⁸ Pomiadon kon kerub doyowa nongkon buḷawan inta sinontaḷ,

¹⁹ tumongobatú in kon siku in taḷob in poti tatua. Kerub doyowa tatua musti poyokompiton in taḷobnea dapot in motobatú,

²⁰ bo poyogintayowon takin koḻikip inta mosongká kon ḻimonik in poti tatua.

²¹ Bonudon in batu doyowa tatua kon bonu in poti tatua bo popotaḷobdon in taḷobnea kon ḻimoniknea.

²² Kon tampat tatua Akuoi moyodungkuḷmu, bo nongkon ḻimonik in taḷobnea, kon sigad in kerub doyowa tatua, Akuoi mobogoi in hukum-Ku mita kon inimu bo potaaumudon kon bangusa Israel.”

Meja inta pogukatan kon roti sosumba

²³ “Pomiadon kon meja tobatú nongkon kayu akasia inta kobanatnea 88 nosenti, oḷadnea 44 nosenti, bo koḷantudnea 66 nosenti.

²⁴ Oḻitaidon in buḷawan taakan bo pakéai in bongkow tobatú buḷawan inta poḻibu.

²⁵ Meja tatua pomiaai kon bingkínea inta kooḷadnea 7,5 nosenti bo botokai in buḷawan bingkínea tatua.

²⁶ Pomiaaidon kon ḻingkit opat inta nongkon buḷawan bo poḷutud intua kon sikunea opat kon sioḷnea, inta kon diug in bingkínea.

²⁷ Ḻingkit tatua pogopod kon kayu pomomotaanan sinbá meja tatua motaau buḻigan.

²⁸ Kayu pomomotaanan tatua musti pomiaan nongkon kayu akasia bo oḻitan in buḷawan.

²⁹ Pomia kon pindan mita, galas, kendi bo palo mita sin pobonuan kon anggur inta posumba. Bayongan pakakat in meja tatua musti pomiaan komintan nongkon buḷawan taakan.

³⁰ Meja tatua in musti poukat kon tayowon in Poti Dodandian, bo kon tudu in meja tatua musti umuran oyúon in roti sosumba.”

Sioḷ in totuduan kon togá

³¹ “Pomiadon kon sioḷ in pototuduan kon togá nongkon buḷawan taakan. Aip in kokadaiannea musti pomiaan nongkon buḷawan inta tontaḷon; bungang mita ḷambá, moituot doman in daun bo poḷapánea musti motobatú takin aip bo kokadaiannea.

³² Kon kokadaiannea musti pogaidan kon onom notanga, toto toḷu in kon posiḷosi.

³³ Kon batúan in tanganea musti pomiaan kon ḷambá nongkon bungang takin dáun bo poḷapánea.

³⁴ Kon kokadaiannea musti pomiaan kon ḷambá nongkon bungang badam toḷu takin daun bo poḷapánea.

³⁵ Kon ḻimonag in batúan in tanga tatua musti pogaidan kon dáun topatá.

³⁶ Komintan sioḷ in totuduan kon togá tatua takin dáun mita bo tanganea mita musti pomiaan nongkon buḷawan taakan topongkó inta sinontaḷ.

³⁷ Pomiaai kon togá pitu in kon batúan in sioḷ in totuduan kon togá tatua bo aidai ukuron kon bayongan sindarnea moisindar ná muna.

³⁸ Pomiaai doman kon alat ponondarit kon sumbu bo totaḷudnea nongkon buḷawan taakan.

³⁹ Paké in buḷawan taakan inta kobogatnea 35 nokilo sin pakéon pogaid kon sioḷ in totuduan togá bo bayongan touḷutnea.

⁴⁰ Ḷukadai sinbá sioḷ in totuduan togá tatua pomiaan podudui kon onu inta ain pinoontong kon inimu kon tudu in buḷud tanaa.”