IḶUAIAN 24 - Alkitab Singog In Mongondow Masa In Tanaa

Pinopoyotogotan in dodandian

¹ Noiduduimai kon tua ki Tuhan noguman kon i Musa, “Potakodon sin mamangoi tumayow kon i-Nakó, poyotakin iko i Harun, i Nadab bo i Abihu, bo pitu nopuḷú itoi in bangusa, bo dokó posumba kon i-Nakó nongkon moyayú.

² Tongábí iko tontaní in motaau mamangoi mokopodiug kon i-Nakó. Ibanea in diábí motaau mamangoi mokopodiug, dapot bo rayat diábí in motaau motakod kon buḷud tanaa.”

³ Ki Musa minayá bo nopotaau kon bangusa tatua in bayongan parenta bo atorang i Tuhan. Mosia komintan noyododai in notubag, “Kami komintan in moibogbí mogaid kon onu inta ain pinoguman i Tuhan.”

⁴ Nopaḷut mako kon tua komintandon pinais i Musa in parenta i Tuhan tatua. Nobangon monik doḷo-doḷom, pinosindognea in mezbah tobatú takin tugu mopuḷú bodoyowá kon sioḷ in buḷud tatua; Tugu tobatú nobaḻí doman toḻiu in suku Israel tobatú.

⁵ Bo ki Musa nopotabá in tongonumai tayowmobiag, bo mosia noposumba in kuruban inta sinubá kon i Tuhan bo poḷat noratá kon tongonumai in sapi sin pinokuruban nobaḻí kuruban dodamean.

⁶ Tosilai nongkon dugú in sapi tatua ginamá i Musa bo binonu kon tano-tano mita. Bo tosilai doman pinopobutaknea kon tudu in mezbah.

⁷ Onda intua ginamánea in buk dodandian inta pinomaisan kon parenta mita i Tuhan, bo binacaneadon kon tayowon in bangusa tatua takin singog inta moropot. Mosia noguman, “Kami moibog dumudui kon i Tuhan bo mogaid kon bayongan parenta-Nea.”

⁸ Bo ki Musa in nogamá kon dugú inta binonunea kon tano-tanó tatua bo pinonabangnea kon bangusa mita tatua, takin noguman, “Dugú tanaa in nopototuu kon dodandian inta sinogot i Tuhan takin i monimu inta pinodoyon kon parenta-Nea mita.”

⁹ Onda intua ki Musa, ki Harun, ki Nadab, ki Abihu bo itoi pitu nopuḷú tatua notakod kon buḷud,

¹⁰ bo mosia in nokoontong kon i Allah Israel sinimindog kon tudu in barang inta koontongan naonda bo taḷog inta pinomia nongkon batu nilam, bo nobidu naonda bo ḷangit inta motarang.

¹¹ Itoi mita Israel tatua aindon nokoontong kon i Allah; umpaka natua yo mosia in diábí iyopú-Nea. Nopaḷut mako kon tua mosia nongaan bo nonginumdon.

Ki Musa kon Buḷud in Sinai

¹² Noiduduimai kon tua ki Tuhan noguman kon i Musa, “Angoidon kon i-Nakó kon tudu in buḷud. Kon tua ogoi-Ku kon inimu in batu doyowa inta pinomaisan-Ku kon bayongan hukum-Ku. Bayongan hukum tatua ogoi-Ku sin baḻíon totundú kon bangusa-Ku tatua.”

¹³ Ki Musa bo ki Yosua oḻitnea tatua noposadiadon, bo ki Musa in notakod kon buḷud pinogutunan i Tuhan tatua.

¹⁴ Ki Musa ain nongoyow kon itoi mita in bangusa Israel, “Oḷatdon kon ḷoḷaigan tanaa modapot in kami mobui. Ki Harun bo ki Hur moyotakin monimu kon naa. Ki ine in oyúon yogogintaḷaan, motaaubí mamangoi kon i monia sin momaḷut kon tua.”

¹⁵ Ki Musa in notakod kon Buḷud in Sinai, bo kinokoḷobandon in sia in goḷom mobunod.

^16-17 Sindar kinoangoian i Tuhan noiangoidon kon tudu in buḷud tatua bo inontong intau Israel intua naonda bo tuḷú inta dinumokot kon tudu in buḷud. Onom nosinggai koonggotnea goḷom tatua nongoḷob kon buḷud tatua, bo kon singgai noginpitu nongkon goḷom tatua ki Tuhan nogoiní kon i Musa.

¹⁸ Bo ki Musa notakodon nodapot in sia sinumuotdon kon bonu in goḷom tatua. Opat nopuḷú nosinggai bo opat nopuḷú nogobii ki Musa nogutun kon tua.