IḶUAIAN 23 - Alkitab Singog In Mongondow Masa In Tanaa

Atorang soaḷ hak mita intau

¹ “Dika mopotáa-taau mako in habar diá totuu, bo dika motuḷung kon intau moraat inta nopoyaput in ouman diá totuu.

² Dika moibog moyokapog in intau mobarong aka mosia mogaid kon moitaḷá andeka mopotabat in atorang takin mopoyaput in tosingogon inta diá totuu.

³ Dika mopoyoposi in intau aka kon ponantúan kon taḷá, umpaka intau inta pinoyotutui tatua in intau diá koonu bo onu.

⁴ Aka moiko noikoḷatmai nokoontong kon sapi ande keledai in musungmu inta noiḷaḻe, yo atod bui kon i toginea.

⁵ Aka keledai in musungmu noitungkud pinopisí mobogat in dinianea, yo tuḷungai in sia moposindog bui kon keledai tatua; dikabí taḷaanmu mako natua.

⁶ Dika tombogaanmu intau bogá aka monantú kon taḷá.

⁷ Poyayú mako in moponapud in uboḷ bo donaai mokopopisí kon intau inta diá kotaḷá hukumon matoi, sin kodoí-Kubí in intau inta momia kon moraat natua.

⁸ Dika motarima kon doit inta poguboḻi monia sinbá mountung in sia kon pelekara, sin doit tatua in mokopopisí kon mata intau mosindipdon moindoi kon onu in totuu bo mokorugidon kon intau mita inta diá kotaḷá.

⁹ Dika mopomia ibo-ibog kon intau ango-angoi; sin kinorasaandon monimu naonda in mobaḻí intau ango-angoi, sin koḻipod moiko nion intau doman ango-angoi kon butá in Mesir.”

Taong noginpitu bo singgai noginpitu

¹⁰ “Onom notaong koonggotnea moiko motaau momunak kon gobámu bo mogamá kon bungai in boyómu.

¹¹ Táe kon taong noginpitu, pomayápa mako in butá tatua. Kon bonu in taong tatua donaaipa in moiko mogamá kon onuka in nobiag tontaní kon gobámu. Pomayádon mako intua sinbá intau mita bogá kon sigad monimu mokouḻípa kon kaanon monia, bo onu in diá ginamá monia kaanondon in mahaḷuk mita inta kaḻig. Natua doman pomia kon gobá in anggur bo pangkoi mita in zaitunmu.

¹² Kon todiminggu, onom nosinggai motaau pakéon monimu mogaid, táe kon singgai noginpitu musti in moiko mogogai, sinbá bobiagonmu, atamu mita bo intau mita ango-angoi inta nogaid kon i monimu mogogaipa doman.

¹³ Pononggina mako in bayongan inta ain pinoguman-Ku kon inimu. Dika mosumba kon ilah mita ibanea, modapot in tongá monangoi kon tangoinea diábí motaau.”

Atorang soaḷ singgai mita moḷoben

¹⁴ “Batúan in taong moiko musti kotoḷu mogaid kon rame moḷoben sin mohoromat kon i-Nakó.

¹⁵ Kon bonu in buḷan Abib, podudui in wakutu inta ain sinantú, moiko musti mogaid kon porayaan inta sinangoian Pesta Roti Diá Ragi ná inta ain pinoguman-Ku kon inimu, sin kon buḷan in tatuata moiko nonaḷámai kon Mesir. Donaai mokaan kon roti inta iragian kon bonu in porayaan pitu nosinggai tatua. Kon batúannea in moiko in mamangoi mosumba kon i-Nakó, moiko musti modia kon sosumba.

¹⁶ Aidai domandon in Pesta Posipunan kon Boyó kon dodai in moiko momangkoidon monoinut kon bungai in boyó dungkuḷ kon gobámu. Aidai doman in Pesta Pondok Daun kon buit in taong kon dodai in moiko mosipun kon boyó in anggur bo ayop mita.

¹⁷ Pomuḷoi in taong kon dodai in pomiaan porayaan toḷu tatua, bayongan ḷoḷaki musti mamangoi mosumba kon i-Nakó, ki Tuhan Allahmu.

¹⁸ Donaai moposumba in roti inta iragian kon dodai in moiko mopokuruban in bobiagon monimu kon i-Nakó. Ḷongó in biag inta pinokuruban monimu kon i-Nakó kon dodai in porayaan mita tatua diábí motaau in taḷaan modapot in mobangon monik.

¹⁹ Pomuḷoi in taong moiko in musti modia mangoi kon baḷoi i Tuhan Allahmu in gandum inta muna-munamai iratab monimu. Tapú in adí in domba ande tapú in adí in bembé diábí motaau poyodungúon takin tubig in teté i inánea.”

Dandi bo parenta

²⁰ “Akuoi in mopotabá kon malaekat-Ku umuna kon i monimu sin moḷukad kon i monimu kon bonu in binayáan bo modia kon i monimu mayá in tampat inta sinadia-Ku.

²¹ Indoiai bo duduiai in sia. Dika ḷumoḷatú kon inia sin totabá-Ku in sia, bo diábí in sia mongampung kon aidmu inta moitaḷá.

²² Aka moiko motoindudui kon inia bo mogaid kon bayongan inta pinarenta-Ku, yo Akuoidon tontaní in monayow kon bayongan musungmu.

²³ Malaekat-Ku in umuna kon i monimu mayá in butá in bangusa Amori, Het, Peris, Kanaan, Hewi bo Yebus, bo mosia in yompaton-Ku.

²⁴ Dika mosumba kon patong mita inta moḷoḷukad monia bo dika dumudui kon pososumba monia. Rimumudon in patong mita moḷoḷukad monia tua bo putoḷdon in oigi mita batu inta pinaké monia posumbaan.

²⁵ Aka moiko mosumba kon i-Nakó, ki Tuhan Allahmu, moiko in barakatan-Ku takin mobogoi kon i monimu in kaanon bo inumon, bo bayongan yampoi poyayú-Ku kon inimu.

²⁶ Kon butá monimu diábí kouḻían kon bobay inta koukaian andeka bantó. Moiko in ogoian-Kudon in kobiagan moumur.

²⁷ Bangusa mita inta angoion monimu baḻíon-Kudon moondok kon i-Nakó; mosia in potombaukon-Kudon; bayongan musungmu modait momurow bo moḷagui.

²⁸ Musungmu mita in potombaukon-Ku, bo bangusa mita in Hewi, Kanaan bo Het untunon-Ku nongkon tayowonmu sinbá moiko in motaaudon mongingguput kon bobayáan.

²⁹ Mosia komintan in diábí untunon-Ku tongá kon bonu in totaong, sinbá butá tatua diá moibiar mako natua, bo mahaḷuk mokokaan kon intau diádon mongawasa kon tua.

³⁰ Mosia in piḻim-piḻikon-Ku poguntunon, modapot in intaumu mita mobayongdon in mogutun kon butá tatua.

³¹ Sigad mita in butámu in tantúon-Kudon nongkon Teluk Akaba modapot kon Ongkag in Eprat, bo nongkon Dagat Toyuak modapot kon padang gurun. Moiko ogoian-Ku in kawasa mongawasa kon intau mita inta nogutun kon butá tatua, modapot in mosia kountunandon monimu kon dodai in moiko mayá mogagow kon butá tatua.

³² Dika mogaid kon dodandian takin intau mita tatua ande takin ilah mita monia.

³³ Dika pomayá mako monimu intau mita tatua mogutun kon butámu, sinbá moiko diá moidudui kon i monia mosumba kon ilah mita monia bo baradosaandon kon i-Nakó. Aka moiko mosumbadon kon ilah mita monia, yo moiko in noituotdon kon poyogaḷap inta mokopatoi.”