IḶUAIAN 20 - Alkitab Singog In Mongondow Masa In Tanaa

Parenta Mopuḷú

¹ Bo ki Allah in nosingogdon, naa in tosingogon-Nea mita,

² “Akuoi naa in ki Tuhan Allahmu inta nopoḷuai kon i monimu nongkon Mesir tampat inta pinononggataan kon i monimu.

³ Dika mosumba kon ilah mita ibanea. Tongá Akuoi in sumbáan.

⁴ Dika in moiko momia kon i monimu in patong inta batangannea ná onuka inta kon ḷangit, kon butá ande kon bonu in tubig inta kon ḻimonag in butá.

⁵ Dika mosumba kon patong ná tatua, sin Akuoibí naa in ki Tuhan Allahmu, bo Akuoi in doíbí potongkaion in onuka. Intau mita inta moyaat in gina kon i-Nakó, hukumon-Ku modapot kon buí inta nogintoḷu bo noginggopat.

⁶ Táe Akuoi in mopoontongbí in tabi-Ku kon ribuan buí in intau mita inta motabi kon i-Nakó bo inta motoindudui kon parenta-Ku.

⁷ Dika morotag kon tangoi-Ku, sin Akuoi, ki Tuhan Allahmu, in mohukumbí kon i ineka inta mopomia ibo-ibog kon tangoi-Ku.

⁸ Toropdon in singgai in Sabat bo horomatbí in singgai tatua mobaḻí singgai inta motusi.

⁹ Moiko ogoian-Ku in onom nosinggai sin pogaidan,

¹⁰ táe singgai inta nogimpitu in singgaibí pogogaian inta sinondí posumbaan kon i-Nakó. Kon singgai tatua diábí tobatúmai intau in motaau mogaid, pinomayá moiko, ande ki adímu mita, ande atamu mita, bobiagonmu mita ande intau ango-angoi inta nogutun kon butámu.

¹¹ Onom nosinggai, Akuoi, ki Tuhan, nomaḻí kon butá, ḷangit, dagat bo bayongan inta kon bonunea, táe kon singgai inta nogimpitu Akuoi in nogogai. Tuamai Akuoi, ki Tuhan, momarakat kon singgai in Sabat bo baḻíon-Ku singgai-Ku intua.

¹² Horomatbí in ki amá bo ki inámu, sinbá moiko mobiag motompia bo moumur in kobiagan kon butá inta ogoi-Ku kon inimu.

¹³ Dika moḻimod.

¹⁴ Dika monuaḻing.

¹⁵ Dika monakow.

¹⁶ Dika moponapud in uboḷ kon intau ibanea.

¹⁷ Dika moibog in sinitogi in intau ibanea: baḷoinea, ki buḷoinea bobay, atanea mita, bobiagonnea, keledainea, ande onuka inta nobaḻí sinitoginea.”

Intau mita Israel inagían ondok

¹⁸ Naonda in intau mita nokodongog kon gotup bo singog in torompet, bo nokoontong kon kilat bo buḷud inta nopuḻing poyok, mosia urot mako sin moondok bo sinimindogdon iyumayú.

¹⁹ Guman monia kon i Musa, “Ikodon tontaní in moguman kon inami, kami in mokidongogbí; táe donaaidon ki Allah in moguman kon inami, sin matoi in kami.”

²⁰ Tubag i Musa, “Dika moondok. Ki Allah in mamangoi tongábí monungkuḷ kon i monimu sinbá moiko in umuran motoindudui kon i-Nia, bo diá mogaid kon dosa.”

²¹ Táe intau mita tatua umuranbí sinimindog iyumayú, bo tongádon ki Musa in dinimiug kon goḷom norondí kon tampat inta inangoian i Allah.

Atorang pogogaid kon mezbah

²² Ki Tuhan nomarenta kon i Musa moguman kon bangusa Israel, “Moiko ain nokoontong kon naonda in Akuoi, ki Tuhan, nosingog kon i monimu nongkon ḷangit.

²³ Dika mogaid kon i monimu in patong mita saḷaka ande buḷawan sin sumbáan monimu ponoḻindua kon i-Nakó.

²⁴ Pomiaidon in Akuoi kon mezbah tobatú nongkon butá, bo pobogoidon in sosumba kon tua domba bo sapimu mobaḻí kuruban inta sinubá bo kuruban pondamean. Kon bayongan in tampat inta sinantú-Ku kon inimu mobaḻí tampat poibadaan kon i-Nakó, Akuoi in mamangoibí bo momarakat kon i monimu.

²⁵ Aka pomiaan monimu in Akuoi kon mezbah tobatú nongkon batu, yo dika pomiaan nongkon batu inta pakangon, sin aka ḷosion monimu in popakang in batu, yo mezbah tatua in diá bí motaau pakéon kon i-Nakó.

²⁶ Dika moposindog in mezbah inta moḷantud modapot momaké in tukad in moponik, sinbá diá koontongan in dodiaanmu inta diá patus ontongon.”