IḶUAIAN 2 - Alkitab Singog In Mongondow Masa In Tanaa

Kinolahiranan i Musa

¹ Kon tungkuḷ intua ḷoḷaki tobatú nongkon suku in Lewi, nobuḷoi kon bobay nongkon suku tatua doman.

² Bo bobay tatua in nopononggadídon in adí ḷoḷaki tobatú. Naonda inontongnea kon adí tatua totuu moḷunat, binuninea toḷu nobuḷan in koonggotnea.

³ Táe adí mointok tatua diábí motaau in umurannea bunion mako. Dá ki iná in adí tatua in nogamá kon karansi bo inaipannea in bonok poḷat inaipan doman in aspal sinbá diá tuotan in tubig. Adí mointok tatua pinopouḻidnea kon bonu in karansi tatua, bodongka dinianea kon Ongkag in Nil bo inukatnea kon yua-yuak in ḷontad in utó inta kon bingkí in ongkag tatua.

⁴ Ki guya-guyang bobay in adí mointok tatua in sinimindog noḻin yayú mako kon tua sin moindoi kon onu in mobaḻí kon adí tatua.

⁵ Kon dodai intua namangoidon in ki adí bobay i datu. Noponag in sia kon ongkag tatua sin moinggú, táe atanea mita in nodondaḷoi kon bingkí in ongkag. Bo daḻíbí in ki adí bobay i datu tatua nokoontong kon karansi tatua kon yua-yuak in utó, bo nopotabá in sia kon atanea bobay tobatú minayá nogamá kon karansi tatua.

⁶ Kon dodai in adí bobay i datu nomukat kon karansi tatua, inontongnea oyúon in adí mointok kon bonunea, bo adí mointok tatua koyogot doman in mongombaḷ. Ki adí bobay i datu inagían in tabi kon adí tatua bo noguman, “Ki adíbí intau Ibrani in naa.”

⁷ Bo ki guya-guyang in adí mointok tatua noḻibó kon i adí bobay i datu, “Moibog degá in ki Tuangku potayakanku kon guyanga bobay tobatú intau Ibrani inta motaau mopoteté kon inia tua?”

⁸ “Mopia,” tubag in adí bobay i datu. Dá minayádon in mongodeaga tatua nogoiní kon i iná in adí tatua tontaní.

⁹ Guman adí bobay i datu kon i iná tatua, “Diadon in adí mointok tanaa, bo potetédon in sia sin binaḻíkudon in sia ki adíku; bain uboḻianku in ki iná.” Dá dinianeadon in adí mointok tatua bo pinoteté.

¹⁰ Kon dodai in adí mointok tatua noḻin ḷobendon, pinosarakandon i inánea in sia kon i adí bobay i datu. Bo binaḻídon i adí bobay i datu tatua ki adínea. “Sinangoianku in sia ki Musa, sin sia ginamáku nongkon tubig,” guman i adí bobay datu.

Ki Musa noḷagui minayá in Midia

¹¹ Kon dodai in ki Musa tayowmobiagdon, minayá in sia nokipodungkuḷ kon intau mita inta tongo bangusanea. Inontongnea in mosia pinakisa totok in mogaid. Inontongnea doman intau in Mesir tobatú nomongkug kon intau in Ibrani.

¹² Ki Musa in nobobui magí mako, bo naonda inontongnea diá intau in nokoontong kon inia, iḻimodnea in intau Mesir tatua bo iḷobongnea kon bungaion.

¹³ Nopoikoḷomai kon singgai, ki Musa in minayá bui, bo nokoontong doman kon intau Ibrani doyowa inta koyogot moropatoi. Dá ki Musa in noḻibó kon intau inta kotaḷá tatua, “Nongonu sin iko momongkugbí kon yobayatmu?”

¹⁴ Intau tatua in notubag, “Ki ine in noduí kon inimu itoi bo hakim kon i nami? Degá ḻimodonmu doman in akuoi, ná intau in Mesir inta iḻimodmu tua?” Bo ki Musa inagíandon in ondok bo norai, “Mobodito! Oaidku tatua aindon kinotaauan.”

^15-16 Onda in dinongogdon i datu onu in nobaḻí tua, sia notayakdon kon naonda in poḷoḻimod kon i Musa. Táe ki Musa in noḷagui bo minayá nogutun kon butá in Midian. Imang nongkon Midian, inta tangoinea ki Yitro, kogadí kon bobay taya pitu. Kon singgai tobatú, ki Musa ḻimitú mako kon diug in parigí tobatú, namangoidon in ki adí bobay i Yitro taya pitu tua sin monangkob bo momonu kon tampat pongonginuman in paanan in bembé bo domba i amá monia.

¹⁷ Táe tongonumai in gombala noguntun kon i adí mita bobay tatua. Bo ki Musa in namangoi notuḷung kon i monia bo pinoinumneadon in bobiagon mita monia tatua.

¹⁸ Kon tungkuḷ in mosia nobui, ki amá monia in noḻibó, “Nongonu sin moiko totokbí in notoyong nobui in singgai naa?”

¹⁹ Tubag monia, “Oyúon intau in Mesir tobatú notuḷung kon inami nongkon dodia diá mopia in gombala mita ibanea. Nodapot in pinonangkobannea kon tubig in kami, bo nopoinum in bobiagon naton.”

²⁰ “Kon onda in sia?” Ki Yitro noḻibó kon i adínea mita. “Nongonu sin sinaḷáanbí monimu intau tatua? Bayádon oiní in sia mongaan moyotakin naton.”

²¹ Ki Musa noibog nogutun kon tua. Onda intua ki Yitro nopotonibuḷoi kon i Musa takin ki adínea inta tangoinea ki Zipora.

²² Ki Zipora nopononggadí in adí ḷoḷaki tobatú. Adí tatua in sinangoian ki Gersom, sin ki Musa in norai, “Akuoi naa intau ango-angoi kon naa.”

²³ Noonggot mako kon tua ki datu in Mesir minatoidon. Táe bangusa Israel umuranpa doman mogamui popisí in mosia umuranpa doman sinonggata, nodapot in mosia nomaḷú mokituḷung. Amui monia tatua dinongogdon i Allah.

²⁴ Inindongogan i Allah in mosia, bo kinotoropan-Neadon in dodandian-Nea takin i Abraham, i Ishak bo i Yakub.

²⁵ Inontong-Nea kon intau Israel tua sinonggata, dá sinimpod-Neadon kon tuḷungan-Neadon in mosia.