IḶUAIAN 17 - Alkitab Singog In Mongondow Masa In Tanaa

Kon Masa bo kon Meriba

¹ Onda intua bayongan umat in Israel nonaḷámaidon kon padang gurun Sin bo nomampi-mamping mako nongkon tampat tobatú mopobayá in tampat ibanea podudui in parenta i Tuhan. Nokoimontandon mosia in nononḷoḷaigan kon Rapidim, táe kon tua diá in tubig inumon.

² Bo nongunsingog in mosia kon i Musa takin noguman, “Ogoiaidon kami in tubig inumon.” Ki Musa notubag, “Nongonu sin moiko in mongunsingogbí bo monungkuḷ kon i Tuhan?”

³ Táe intau mita tatua totokdon in moyogang bo umurandon in mosia mongunsingog kon i Musa. Guman monia, “Nongonu sin diniamubí in kami nongkon Mesir? Degá, bá matoi in rogang in ki adí mita nami takin bobiagon mita nami?”

⁴ Dá nokuanidon ki Musa kon i Tuhan, kainia, “Onu degá in aidanku kon intau mita tanaa? Indoiaika, mosia monintangoidon mogarab in batu kon inakó.”

⁵ Guman i Tuhan kon i Musa, “Oinídon in tongonumai itoi intau Israel bo bayádon poyotakin monia umuna kon bangusa tatua. Dia doman in tungkud inta pinakému pinomobak kon Ongkag in Nil.

⁶ Akuoi in simindog kon tayowonmu kon tudu in batu moḷoben tobatú kon Buḷud in Sinai. Porotdon in batu tatua, dá tubig in ḷumuai bo intau mita motaaudon monginum.” Inaidan i Musa in natua koonto-ontong in itoi mita Israel.

⁷ Tampat tatua sinangoian Masa sin kon tampat tatua intau Israel nonungkuḷ kon i Tuhan kon tungkuḷ in mosia noḻibó, “Degá sinakinan i Tuhan in kita ande diá?” Tampat tatua sinangoian doman Meriba sin kon tampat tatua intau Israel nongunsingog.

Parang takin intau Amalek

⁸ Onda intua intau Amalek namangoi bo nonubu kon intau Israel kon Rapidim.

⁹ Guman i Musa kon i Yosua, “Pomiḻídon kon tongonumai intau sin moparang takin intau in Amalek. Ikoḷom akuoi in simindog kon tudu in buḷud bo mokadai kon tungkud inta pinoki dia i Allah.”

¹⁰ Inaidan i Yosua onu inta pinoki aid i Musa kon inia. Sia in minayá bo noparang takin intau in Amalek, yo ki Musa, ki Harun bo ki Hur notakod kon buḷud nodapot kon tudunea totok.

¹¹ Aka tonggóon i Musa in ḻimanea, yo intau Israel in mountung. Táe aka popoponag i Musa in ḻimanea, yo intau in Amalek in mountung.

¹² Naonda in ki Musa moḷopídon, ki Harun bo ki Hur nogamá kon batu tobatú sin ḻitúan i Musa; ki Harun bo ki Hur sinimindog kon dotá in koḷanan bo koḷoigi i Musa sin moduḷu mokadai kon ḻimanea sinbá umuran moitonggó modapot in tumoyop mata in singgai.

¹³ Tontuminea intau Amalek kinotaḷowandon i Yosua.

¹⁴ Guman i Tuhan kon i Musa, “Paisdon in soaḷ kinountungan tanaa sinbá tantú toropon. Poguman kon i Yosua kon Akuoi in moyompatbí kon intau in Amalek.”

¹⁵ Bo ki Musa noposindog in mezbah tobatú bo sinangoiannea “Ki Tuhan in Banderaku.”

¹⁶ Guman i Musa, “Kadaiaidon bo tonggó koḷantud in bandera i Tuhan! Ki Tuhan noparang nonayow kon intau Amalek modapot kon adí bo ompu!”