IḶUAIAN 15 - Alkitab Singog In Mongondow Masa In Tanaa

Dondong i Musa

¹ Bo ki Musa takin intau mita in Israel nopodondong in dondong tanaa sin modayow kon i Tuhan, “Akuoi in moibog modondong kon i Tuhan, sin moḷobenbí in kawasa-Nea. Bayongan in kabaḷo bo intau inta sinumakoi pinogambat-Nea kon bonu in dagat.

² Ki Tuhan mototuḷungku inta moropot; Sia inta ain noposaḷamat kon inakó. Sia in ki Allahku, dayowonku in Sia, ki Allah sosumbaan in mogoguyangku, poḷantudonku in Sia.

³ Ki Tuhan in pojuang inta totok moropot, Ki Tuhan, tuata in tangoi-Nea.

⁴ Tontara in Mesir bo bayongan keretanea pinogambat-Nea kon bonu in dagat. Itoi mita in tontara inta mongoroton noḷomot kon Dagat in Gelagah.

⁵ Mosia iḻiom in dagat inta modaḷom, bo naonda batu inta sinumaḷom dapot in anor.

⁶ Ropot-Mu totok in mokoherang, o Tuhan, Binaḻí-Mu in musung norimumud.

⁷ Takin kawasa-Mu inta moḷoben iyompat-Mu in bayongan inta momusung kon ini-Mu. Torú-Mu nodokot ná tuḷú, bo nomokak kon i monia naonda bo pangkoi in payoi.

⁸ Dagat inirup-Mu, naonda bo pompang, nodapot in dagat motaaudon bayáan.

⁹ Musung noguman, ‘Mosia in aḷowanku bo domokon, rabutonku in pitow, bo rataanku in mosia. Bo bayongan kaoyúonan monia agowonku, sila-silaionku bo pakéonku modapot in moorop.’

¹⁰ Táe tongá pinoginaan i Tuhan komintan nokopoangoi kon singgai nokobodito kon intau in Mesir. Mosia in noḷomot naonda bo tangat inta mobogat kon bonu in tubig inta mondangat.

¹¹ Ilahbí mita kon onda in mokoḻimonik kon ini-Mu, o Tuhan Inta Momulia bo motusi? Ki Ine in mokoaid kon inta mokoherang mita bo oaidan moḷoben ná inaidan i Tuhan?

¹² Onaton-Mu in ḻima-Mu koḷanan, dá diádon ontongon in musung sin iḻiomdon in butá.

¹³ Iko in nodia kon bangusa inta ain pinosaḷamat-Mu naa, sin onu in pinodandi-Mu tua doman in aidan-Mu. Ropot-Mu moḷoben pinogoḻingoi-Mu kon i monia, bo poḷat dinia-Mu pinobayá in butá-Mu inta motusi naa.

^14-15 Bangusa mita mouyot in mokodongog; intau mita in Pilistin bo itoi mita intau in Edom inagían in ondok. Intau mita in Moab inta motorindog gugur mako, intau mita in Kanaan dapoton doman in uyot.

¹⁶ Sin mosia totokdon inagían ondok mokoontong kon ropot i Tuhan. Kon dodai in umat-Mu noitaḻib, musung modait dumoit; nosaḷamatdon in bangusa inta pinoḷuat-Mu.

¹⁷ Bo Israel inatod-Mu kon tampat inta piniḻí-Mu popoutunan. Mosia in nogutun kon buḷud-Mu inta motusi, kon Baḷoi inta pinosindog-Mu takin ropot-Mu.

¹⁸ Ikodon ki Tuhan, Datu, inta tantú momarenta.”

Dondong i Miryam

¹⁹ Kon tungkuḷ in intau Israel iḷumoḷan kon dagat, mosia in minayá-mayá kon apad in dagat inta noingkag. Táe naonda in kereta mita intau in Mesir takin kabaḷonea bo intau mita inta nodia sinumuot kon dagat, pinoyobuidon i Tuhan in tubignea nodapot in mosia nongoḷomot.

²⁰ Bo ki Miryam, nabi bobay tobatú, ki guya-guyang i Harun, nogamá kon rebananea, bo bayongan bobay dinumudui notobog kon rebana sindaḷan notayok.

²¹ Ki Miryam nonongganut kon i monia nodondong, “Podondongdon kon i Tuhan, sin Sia in mokawasa totok. Bayongan in kabaḷo bo mododianea pinogarab-Nea kon bonu in dagat tatua.”

Kon Mara bo kon Elim

²² Onda intua ki Musa nodia kon bangusa Israel nongkon Dagat in Gelagah nopobayá in padang gurun Syur. Toḷu nosinggai in koonggotnea mosia minayá nongin padang gurun bo diá nokouḻí kon tubig.

²³ Bo nodapotdon in mosia kon tampat inta tangoinea Mara, táe tubig kon tua mopait totok, dá diá motaau inumon. Tuamai tampat tatua sinangoian Mara, mangaḻenea pait.

²⁴ Dá intau mita tatua in nongunsingogdon kon i Musa bo noḻibó, “Onu in inumon naton?”

²⁵ Ki Musa nosambayangdon kon i Tuhan, bo ki Tuhan nopoontongdon in kayu toputoḷ kon inia. Kayu tatua pinogambat i Musa kon bonu in tubig tatua, bo tubig tatua in nobaḻídon nopira in nanamnea, dá motaaudon inumon. Kon tampat tatua ki Tuhan nobogoi in atorang mita kon i monia, bo kon tua doman Sia nonungkuḷ kon i monia.

²⁶ Guman i Tuhan, “Totu-totuudon dudui kon i-Nakó, bo aidaidon in onu inta ontongon-Ku mopia; duduiaidon in bayongan parenta-Ku. Aka aidan monimu intua, yo moiko in diábí hukumon-Ku poumáan in takit ná inta pinouma-Ku kon intau mita in Mesir. Akuoibí in ki Tuhan inta nonompia kon i monimu.”

²⁷ Nopaḷut mako kon tua mosia nodapotdon in tampat inta tangoinea Elim. Kon tua oyúon in bokaká mopuḷú bodoyowá takin pitu nopuḷú in pangkoi in kurma. Mosia in nogaid kon ḷoḷaigan kon diug in tubig tatua.