IḶUAIAN 14 - Alkitab Singog In Mongondow Masa In Tanaa

Ḷumoḷan kon Dagat in Gelagah

¹ Noiduduimai kon tua ki Tuhan noguman kon i Musa,

² “Potabádon intau in Israel mobui bo mononḷoḷaigan kon tayowon kotá in Pi-Hahirot, kon sigad in kotá Migdol bo Dagat Gelagah, kon diug in kotá Baal-Zepon.

³ Iraimai i Datu in Mesir intau Israel minayádon nongkon butá tanaa bo noiḷangkamdon kon padang gurun.

⁴ Baḻíon-Ku in sia motogat in gina sinbá aḷowanneadon in moiko. Táe poontong-Kudon in kawasa-Ku kon i datu in Mesir bo tontaranea mita, bá kotaauandon monia kon Akuoi naa in ki Tuhan.” Bo inaidandon intau in Israel onu inta ain pinarenta i Tuhan kon i monia.

⁵ Naonda in ki datu in Mesir nokodongogdon kon bangusa Israel noḷaguidon, sia bo pogawainea mita inangoiandon in manasaḷ bo poḷat noguman, “Onu in pomiaan naton? Nongonu sin pomayábí mako naton intau mita Israel tatua mayá modapot in kita kobuḻiandon in ata mita?”

⁶ Bo ki datu noposadiadon in kereta pakéon moparang takin tontaranea mita.

⁷ Sia in nobuat takin bayongan kereta parangnea, noitakin domandon in 600 in kereta inta totok in motompiḻí, inta dinia in porwiranea mita.

⁸ Totuubí kon pinopotontogatdon i Tuhan in gina, nodapot in inaḷowanneadon in intau mita Israel inta kon bonu in binayáan monaḷá kon butá in Mesir takin koḷuka-ḷukad i Tuhan.

⁹ Tontara in Mesir takin in bayongan kabaḷo, kereta bo mododianea nogaḷow kon intau Israel, bo nomatuk kon i monia kon pinonḷoḷaigan monia kon pintad in dagat inta kon diug in Pi-Hahirot.

¹⁰ Naonda intau Israel nokoontong kon ki datu in Mesir bo tontaranea mita nopoangoidon, mosia in totokdon inangoian ondok bo nokuanidon kon i Tuhan sin mokituḷung.

¹¹ Guman monia kon i Musa, “Eta degá diá in poḷobongan kon Mesir, dá diniamu mangoi kon naa in kami sinbá matoi kon tampat tanaa? Indoiaika bungai in oaidanmu tatua!

¹² Koḻipod kon Mesir aindon pinoguman nami kon soaḷ tanaa in mobaḻíbí! Kami ain noguman kon dikadon tuyayowon in kami, bo pomayádon mako umuran mobaḻí ata in kami kon Mesir. Sin maníka mobaḻí ata kon tua dika in matoi kon padang gurun tanaa!”

¹³ Ki Musa in noguman, “Dika moondok! Korigonon in gina! Ontongonbí monimu onu in aidan i Tuhan sin moposaḷamat kon i monimu. Intau in Mesir inta inontong monimu tanaa, diá bidon ontongon bui monimu.

¹⁴ Ki Tuhan in moposaḷamatbí kon i monimu, bo moiko in dika bidon mogaid kon onu bo onu.”

¹⁵ Guman i Tuhan kon i Musa, “Nongonu sin iko in mokuanibí mokituḷung? Potabádon intau Israel mongingguput kon bobayáan monia!

¹⁶ Sintak in tungkudmu bo potundú kon dagat. Dá tubig in mosilai doyowa bo intau Israel motaau maya-mayá kon yuaknea inta ain noingkag.

¹⁷ Potogaton-Ku in gina Intau in Mesir bá umuran aḷowan monia in intau in Israel, bo poontong-Kudon in kawasa-Ku kon i datu in Mesir, kon tontaranea, kon keretanea mita bo mododianea.

¹⁸ Dá kotaauandon intau In Mesir kon Akuoibí in ki Tuhan.”

¹⁹ Bo malaekat i Allah, inta kon muna in intau mita Israel, minayádon kon dotá in tumi monia. Bo oigi goḷom nomamping domandon nodapot

²⁰ kon sigadon in tontara mita in Mesir bo intau mita Israel. Goḷom tatua nokopomukádon kon sindip, dá tonggobii tua doyowa nopaanan tatua diá motaau mosidiugan.

²¹ Bo ki Musa in notundúdon kon dagat, bo binaḻídon i Tuhan tompot in pomukaan nogirup noropot totok nodapot in tubig in dagat noondir. Tonggobii tua tompot tatua umuran nogirup, bo nomaḷui kon dagat nobaḻí butá inta noingkag.

²² Tubig nosilai doyowa, bo kon dodai intau in Israel iḷumoḷan kon dagat, mosia minayá mayábí kon apad in dagat inta noingkag, bo tubig kon dotá in koḷoigi bo koḷanan notompompangdon naonda bo dinding.

²³ Intau in Mesir takin bayongan kabaḷo, kereta bo mododianea umuran nogaḷow bo dinumudui kon intau Israel nongin yuak in dagat.

²⁴ Naonda in modiugdon mobayag, ki Tuhan inta kon bonu in oigi tuḷú bo goḷom tatua inimindoi kon tontara mita in intau Mesir, bo pinotombauk-Nea in mosia tua.

²⁵ Binaḻínea roda mita in kereta tatua diá noburow, dá mororigadon totok monia in mayá. Guman intau in Mesir, “Koḻigai kita moḷagui monaḷámai kon intau Israel, sin ki Tuhandon in moparang monayow kon i naton.”

²⁶ Guman i Tuhan kon i Musa, “Potundúdon in ḻimamu kon dagat, dá tubig in buidon moyobui, bo moḷomot kon intau mita in Mesir, kon kereta mita bo mododianea.”

²⁷ Bo ki Musa nopotundú domandon in ḻimanea kon dagat bo kon tungkuḷ in doḷo-doḷomdon, tubig nobuidon ná kaadaannea inta muna. Intau mita in Mesir moramuji moposaḷamat in awak monia, táe iḷomot i Tuhan in mosia kon bonu in dagat.

²⁸ Tubig in dagat noyobui bo noḷingkum kon kereta mita, intau mita inta nodia, bo bayongan tontara in Mesir inta nogaḷow kon intau in Israel kon yuak in dagat, dapot in mosia nodait minatoi.

²⁹ Táe naonda intau Israel iḷumoḷan kon dagat, mosia in minayá kon apad in dagat inta noingkag, bo tubig nobaḻí dinding kon dotá in koḷoigi bo koḷanan.

³⁰ Kon singgai tatua ki Tuhan noposaḷamat kon bangusa Israel nongkon pinonubuan in intau Mesir, bo mosia in nokoontongdon kon mayat mita intau in Mesir nongoibandai kon pintad.

³¹ Kon tungkuḷ in intau Israel nokoontong kon naonda in ki Tuhan inta takin kawasa-Nea inta moḷoben nonaḷow kon intau in mesir, totok noherang in mosia dá nopirisayadon kon i-Nia bo kon i Musa, ata-Nea tatua.