IḶUAIAN 11 - Alkitab Singog In Mongondow Masa In Tanaa

Bodito noginpuḷú pinotaaudon muna i Musa

¹ Ki Tuhan noguman kon i Musa, “Tobatúpa in bodito in popouma-Ku kon i datu in Mesir bo rayatnea. Mopaḷut mako kon tua ogoineadon in moiko mayá. Nodapot in poguntunonnea in moiko komintan nongkon naa.

² Tuamai pongongumandon takin bangusa Israel; potabádon in mosia moigum kon ḷambá mita buḷawan bo saḷaka nongkon topodiugmai monia.”

³ Binaḻídon i Tuhan in intau mita in Mesir mopia in gina kon intau Israel. Bo ki Musa nobaḻí intau inta totok in kinobangkaḷ in pogawai mita bo rayat in Mesir.

⁴ Ki Musa in noguman kon i datu, “Nanaadon guman i Tuhan, ‘Degá moonggotmai kon doḷom Akuoi in moḻibu kon butá in Mesir.

⁵ Bayongan in adí ḷoḷaki guya-guyang kon Mesir in matoi, pinangkoi kon i adí i datu in Mesir modapot kon i adí mita in ata bobay inta nogiḻing kon gandum. Adí doman in bayongan bobiagon inta muna pinononggadí in matoi doman.

⁶ Kon butá mita in Mesir kodongogandon in amui bo ombaḷ moropot, ná inta diápa dodai onda nobaḻí bo inta diá bidon bui mobaḻí.

⁷ Táe aka kon intau Israel, pinomayá intau ande bobiagon diábí tuyayowon. Dá kotaauandon monimu kon Akuoi, ki Tuhan, in mopoyoposibí kon intau in Mesir bo intau in Israel.’ ”

⁸ Kinotontumiannea ki Musa noguman, “Komintan pogawai moḷantud i Tuangku in mamangoibí bo tumungkud kon tayowonku bo mopoigum sinbá akuoi bo bangusaku in monaḷámaidon kon butá tanaa. Mopaḷut mako kon tua akuoi in mayádon.” Bo sinumorú totok in ki Musa bo nonaḷámai kon i datu.

⁹ Ki Tuhan noguman kon i Musa, “Ki Datu in diábí mopandungmai kon tosingogonmu, sinbá mobayongpa bui in inta mokoherang in aidan-Ku kon bayongan butá in Mesir.”

¹⁰ Ki Musa bo ki Harun nogaid kon bayongan inta mokoherang tatua kon tayowon i datu, táe binaḻípa i Tuhan motogat in ginanea, dá diápa doman inogoinea minayá in intau Israel nonaḷámai kon butánea tatua.