IḶUAIAN 10 - Alkitab Singog In Mongondow Masa In Tanaa

Bodito noginwaḷu: Pangkoḷá

¹ Ki Tuhan noguman kon i Musa, “Bayádon pokipodungkuḷ bui kon i datu. Binaḻí-Kudon in sia takin pogawainea mita motontogat in gina, sinbá in Akuoi motaau mogaid kon onu mita inta mokoherang kon yua-yuak monia,

² bo bá motaau oumanonmu kon i adí bo kon i ompumu kon naonda in bangusa Mesir pinoyambá-Ku takin nogaid kon inta mokoherang mita tatua. Dá kotaauandon monimu komintan kon Akuoibí in ki Tuhan.”

³ Dá ki Musa bo ki Harun minayá nokipodungkuḷ kon i datu bo noguman kon inia, “Ki Tuhan, Allah in bangusa Ibrani, noguman, ‘Dapot in toonu iko doí tumungkud kon i-Nakó? Pomayádon mako in umat-Ku mayá, sinbá mosia in motaau mayá moibada kon i-Nakó.

⁴ Aka diápa doman tarimaanmu, dá ikoḷom in popoangoi-Ku in pangkoḷá kon butámu naa.

⁵ Bayongan tudu in butá motompaḷotdon komintan in pangkoḷá inta totok in mobayong tua. Bayongan agat in pinomuḷa, nodapot in pangkoi mita in kayu inta diá iyoyang in uyan eis, yo daitondon kaanon in pangkoḷá mita tatua.

⁶ Komaḻigmu, baḷoi mita in pogawaimu bo baḷoi mita in rayat in mopuḻingdon in pangkoḷá. Bodito tanaa in motoya-toyang kon onu inta nokoimontandon pinouma kon mogoguyang monimu.’ ” Onda intua ki Musa nomurow bo minayá.

⁷ Nopaḷut mako kon tua nogumandon in pogawai mita tatua kon i datu, “Dapotbí in toonu intau tatua musti mopororiga kon inaton? Pomayádon mako in intau mita Israel tatua mayá sin moibada kon i Tuhan, Allah monia. Indoiaika in butá naton tanaa aindon nogoguyaat!”

⁸ Dá ki Musa bo ki Harun pinoki oiní bui i datu. Ki datu in noguman kon i monia, “Moiko motaaudon mayá moibada kon i Tuhan Allahmu. Táe ki ine mako degá in kon sigad monimu nion in mayá?”

⁹ Tubag i Musa, “Kami komintan, pinomayá inta nobagupa ande inta noguyangdon. Kami in modia kon adí mita nami, bayongan in sapi, domba, bo bembé nami, sin musti in kami mogaid kon bobutungan moḷoben tobatú sin mohoromat kon i Tuhan.”

¹⁰ Datu noguman, “Yo diábí ogoiku in moiko modia kon bobay mita bo ki adí mita monimu! Onu inta pinoigummu nion notongkaibí moharap kon bá akuoi in mopoigum kon i Tuhan momarakat kon i monimu. Nosilangdon kon inakó kon oyúonbí in makusud monimu moraat.

¹¹ Diá! Tongádon ḷoḷaki mita in motaau mayá sin moibada kon i Tuhan, aka totuu kon tongábí moibada in koibog monimu!” Natua in pinogoguntun i datu kon i Musa bo ki Harun nongkon komaḻig.

¹² Bo ki Tuhan noguman kon i Musa, “Potonggódon in ḻimamu kon butá in Mesir. Pangkoḷá mita in namangoi bo mokaan kon bayongan in pinomuḷa inta ki agat in uyan eis.”

¹³ Ki Musa in nopotonggó doman in tungkudnea bo ki Tuhan nopoangoi in tompot nongkon pomukaan bo nogirup kon butá tatua singgai bo doḷom. Aka modiugdon mobayag tompot tatua mogirup mopoangoi in pangkoḷá mita

¹⁴ inta totok in modamaḷ totok nodapot in notoimpaḷotdon in butá tatua. Diápa dodai onda intau nokoontong kon pangkoḷá inta námai tua in kobayongnea, bo nopaḷut mako kon tua diá bidon bui nobaḻí in soaḷ ná tatua.

¹⁵ Bayongan in butá kino koḷobandon in pangkoḷá nodapot in irumondídon in koontongan. Mosia mokaan kon onukabí in kinotaḷáan in uyan eis tatua, takin doman bungai mita in ayop inta kon pangkoineapa. Kon bayongan butá in Mesir diá bidon in koontongan moḷunow inta sinonggagatan kon pangkoinea mita ande pinomuḷa.

¹⁶ Ki Datu in ḷagidon nogoiní kon i Musa bo kon i Harun bo noguman, “Akuoi aindon dinosa kon i Tuhan Allahmu bo kon i monimu.

¹⁷ Ampungaipa in dosaku in komintan tanaa, bo posambayangdon kon i Tuhan Allahmu, sinbá poḷuat-Neadon kon inakó in hukuman inta mokopatoi tanaa.”

¹⁸ Ki Musa nonaḷámai kon i datu bo nosambayang kon i Tuhan.

¹⁹ Dá binuroudon bui i Tuhan in pinogogirup in tompot, pinangkoidon nongkon toyopan inta totok in moropot. Pangkoḷá mita tatua inirup in tompot bo pinobayá in Dagat Gelagah. Tobatúmai diádon in kinotaḷáan kon butá in Mesir.

²⁰ Táe pinopotontogat doman bui i Tuhan in gina i datu, bo diádon inogoinea minayá in intau Israel.

Bodito noginsiow: Sindip

²¹ Ki Tuhan noguman kon i Musa, “Tonggódon in ḻimamu, dá butá in Mesir in simindipdon totok.”

²² Sinonggó domandon i Musa in ḻimanea, bo kon bonu in toḷu nosinggai bayongan butá in Mesir sinimindipdon totok.

²³ Intau in Mesir diádon mokoontong kon onu bo onu kon bonu in toḷu nosinggai tatua bo diádon tobatúmai intau minaya-mayá mako. Táe kon baḷoi intau mita Israel tantúbí nobayag.

²⁴ Bo ki datu in nogoiní kon i Musa bo noguman, “Moiko in motaaubí mayá moibada kon i Tuhanmu. Intau mita bobay bo adí mita in motaaudon tumakin. Táe sapi, domba, bo bembému in diábí motaau diaan.”

²⁵ Ki Musa in notubag, “Aka natua ki Tuangku mustibí mobogoi in bobiagon kon inami sin posumba mobaḻí kuruban tubáan kon i Tuhan, ki Allah nami.

²⁶ Bayongan bobiagon nami mustibí diaan nami; tobatúmai diábí in motaau taḷaan nami. Nongkon bobiagon tatua piḻíon nami mongo onda in posumba kon i Tuhan ki Allah nami. Bain kon tua bo kotaauan nami mongo bobiagon táonda in posumba nami.”

²⁷ Pinopotontogatpa doman i Tuhan gina i datu sahingga diá doman inogoinea minayá in bangusa Israel.

²⁸ Guman i datu kon i Musa, “Bayádon nongkon tayowonku! Dikadon bui iko mamangoi mokipogontong kon inakó! Aka buipa doman ontongonku in pogotmu, yo matoidon in iko!”

²⁹ “Totuu in guman i Tuangku,” kai Musa, “Ki Tuangku in diá bidon mokoontong bui kon inakó.”