IBRANI 7 - Alkitab Singog In Mongondow Masa In Tanaa

Ki Kristus bo ki Melkisedek

¹ Ki Melkisedek naa in datu nongkon Salem bo imang i Allah inta totok in moḷantud. Wakutu in ki Abraham nobuidon nongkon pinoparangan bo nonaḷowdon kon datu mita, dá ki Melkisedek naa in namangoidon nonontomu bo nomarakat kon inia.

² Dá ki Melkisedek in inogoian i Abraham in mopuḷú noporsen nongkon bayongan inta nouḻínea kon pinoparangan. Tangoi Melkisedek naa, mangaḻenea: “Datu Moadil” muna-munamai; bo lantaran sia nongkon Salem dá tangoinea sinomangaḻean doman: “Datu Dodamean”.

³ Diá in katarangan mongo oyúon in ki amá ande ki inánea, ande mogoguyangnea. Diá doman in katarangan soaḷ kinolahirannea andeka kinopatoiannea. Sia in nádon onda bo ki Adí i Allah. Sia in nobaḻí Imang inta mononoi.

⁴ Dá ontongondon naton kon naa kon moḷobenbí totok in ki Melkisedek tua; sia in moḷoben tuamai in mogoguyang naton ki Abraham, nobogoi in mopuḷú noporsen kon inia nongkon bayongan inta nouḻínea kon pinoparangan tatua inta totok in mopia.

⁵ Aka kon hukum in agama Yahudi, imang mita buí i Lewi in mustibí mogamá kon mopuḷú noporsen nongkon bayongan inta nouḻí in umat inta ki utat monia, umpakabí tumpaḷa buí i Abraham in mosia.

⁶ Ki Melkisedek in deemanbí buí i Abraham, táe sia in notarima doman kon mopuḷú noporsen nongkon bayongan inta nouḻí i Abraham, bo nomarakat doman in sia kon i Abraham, intau inta ain notarima kon dandi mita nongkon i Allah.

⁷ Totuu kon diábí motaau bayowan, kon intaubí inta binarakatan in moompá-ompá nongkon intau inta nomarakat kon inia.

⁸ Imang mita inta motarimamai kon mopuḷú noporsen nongkon onu inta nouḻí in umat, mosia tua in intaubí doman inta mato-matoi. Táe podudui in onu inta pinais kon Buk Motusi, ki Melkisedek inta notarimadon kon mopuḷú noporsen ná silai imang tua in intaubí inta umuran nobiag.

⁹ Dá motaaubí singogon kon ki Lewi inta buínea mita mogamá domanmai kon mopuḷú noporsen nongkon onu inta nouḻí in intau Israel moguboḻibí doman kon silai tatua pongin i Abraham, wakutu in ki Abraham nobogoi intua kon i Melkisedek.

¹⁰ Umpakabí diápa noilahir in ki Lewi, táe motaau bidon tangoion kon sia in kon bonu bidon awak i Abraham mogoguyangnea tatua, wakutu in ki Melkisedek noyodungkuḷ i Abraham.

¹¹ Wakutu in imang mita intau in Lewi nobaḻí itoi, hukum agama in Yahudi inogoi kon umat Israel, sin kon tungkuḷ intua imang mita intau in Lewi in diá mokotoindudui totok kon onu inta musti pomiaan monia, manangka intua musti oyúon imang ibanea, inta ná tai Imang Melkisedek, bo mosia naa in deemanbí nongkon kolompó i Imang Harun.

¹² Dá aka ḷoḻitúan in imang mita bo mobaḷu-baḷuibí; yo hukum in agama Yahudi in mustibí doman mobaḷu-baḷui.

¹³ Imakusud naa in ki Tuhan naton: Sia in nongkon sukubí ibanea, bo diápabí kon dodai in onda intau nongkon sukunea in nogaid saḷaku imang.

¹⁴ Kinotaauan bidon in bayongan imang kon ki Tuhan naton nongkon sukubí in Yahudi. Diábí kon dodai in onda in kinotangoian i Musa in suku tatua wakutu in sia nongonguman kon soaḷ imang mita.

Imang ibanea, ná ki Melkisedek

¹⁵ Onu inta inouman naa in nodugangdon nosilang, naonda in oyúondon imang ibanea ná ki Melkisedek.

¹⁶ Sia in binaḻí imang deemanbí pinodoyon kon atorang mita inta pinomia in intau, táe pinodoyobí kon kobobiagnea inta inogoian in kawasa inta diá modai-dait.

¹⁷ Sin kon bonu in Buk Motusi in pinaisdon nanaa, “Iko Imang inta umuran oyúon, ná ki Imang Melkisedek.”

¹⁸ Dá masa in tanaa atorang inta nokoyongandon in diádon pinaké, sin diádon in ropotnea bo diá domandon in baraguna.

¹⁹ Sin diábí tobatúmai in motaau sompurnaan in hukum agama Yahudi tua. Tuamai tanaa kita in inogoiandon in harapan inta totuu mopira; sahingga in kita motaaudon dimiug kon i Allah.

²⁰ Apadoman tua komintan siningog i Allah pinodoyon kon ibot. Diábí in ibot natua kon wakutu in imang mita tatua binaḻí imang.

²¹ Táe ki Yesus in nobaḻí Imang pinakéanbí in ibot, nanaa in singog i Allah kon i-Nia, “Ki Tuhan in nongibotdon bo diábí baḷuian-Nea onu inta ain siningog-Nea: ‘Iko nion in Imang inta mononoi.’ ”

²² Tuamai in ki Yesus nobaḻí jaminan in tobatú dodandian inta totuu mopia.

²³ Tobatú soaḷ inta moponting: Imang mita ibanea in mobayongbí sin mosia tua in mato-matoipabí sahingga in diádon motaau mogingguput kon oaidan monia.

²⁴ Táe lantaran ki Yesus in diábí mato-matoi, dá oaidan-Nea saḷaku Imang in diábí mopamping kon intau ibanea.

²⁵ Manangka intua ki Yesus in umuranbí motaau moposaḷamat kon intau mita inta namangoi kon i Allah inta mongin i-Nia. Sin Sia in nobiag mononoi bo umuran mopoyaput in mintahang kon i Allah sin kopontingan intau mita tatua.

²⁶ Dá ki Yesusbí tua in Imang Moḷoben inta paraḷuon naton. Sia tua in nodaritbí kon bayongan in yagi-yagi, diábí in taḷá andeka dosa onukadon kon i-Nia. Sia in pinotondí nongkon intau mita inta dinosa, bo dinia pinoonik in tampat inta moḷantu-ḷantud nongkon ḷangit.

²⁷ Sia in diábí notongkai in imang mita moḷoben ibanea inta pomuḷoi in singgai musti moposumba in kuruban sin potobut kon bayongan taḷánea tontaní. Mopaḷut mako kon tua sia in moposumba doman in kuruban potobut kon dosa mita in umat. Ki Yesus in tongábí komintan noposumba in kuruban bo awak-Neabí tontaní in pinosumba-Nea saḷaku kuruban.

²⁸ Hukum in agama Yahudi nopobaḻí imang moḷoben kon intau diá nosompurna. Táe onda intua, nongkon hukum agama tatua inaidan i Allah in dandi inta sinakinan in ibot kon baḻíon-Neabí, Imang Moḷoben in ki Adí-Nea inta binaḻí-Nea mopoposaḷamat inta mosompurna bo inta diá mato-matoi.