IBRANI 6 - Alkitab Singog In Mongondow Masa In Tanaa

¹ Tuamai, koḻigai bá mobalajardon in kita kon totundú moiduduimai naa soaḷ naonda in kobobiag saḷaku intau in Keresten inta moguyangdon in pororai. Donaaidon tongá umuran mopobui-buimai kon totundú inta muna. Musti mogogai in mogaid kon inta diá in baragunanea bo musti mopirisaya kon i Allah,

² ande totundú inta pinodoyon kon baptisan andeka soaḷ momarakat kon intau ande soaḷ kobiagan bui naonda in matoi, andeka doman soaḷ kobiagan mononoi.

³ Bo tuatadon in aidan naton, aka ogoian i Allah in kasampatan.

⁴ Sin mosia inta nokoimontandon in sinimbayagan in ginanea, inta nokoimontan in nokorasa kon totabi i Allah bo nokoimontan domandon in nokouḻí kon silai kon bonu in Roho Mokudus,

⁵ bo inta ain notarima kon pirman inta mopia nongkon i Allah bo kawasa mita in dunia inta kon singgai moiduduimai.

⁶ Táe nonoḻikudon bui, yo diá bidon bui in sia toimbaguon komintanpa sinbá mogogaidon in mogaid kon inta diá mopia, sin mosia tua in buibí mopopakú kon kayu pinoyotaḻempang kon i Adí i Allah sin kopontingan monia tontaní bo moningkuḻe kon i-Nia kon tayowon intau moantó.

⁷ Butá inta umuran kouyanan bo mobogoi in hasil kon bayongan in pinomuḷa inta baraguna kon intau monononggobá, barakatanbí i Allah in butá tatua.

⁸ Táe aka tongá kobiagan in padang bo bayongan in díat, dá diá in baraguna in butá tatua sahingga kutukon i Allah bo pangabisannea pokakon modait.

⁹ Táe, utat mita inta kinotabiku, umpaka natua in singog nami, táe kinotaauan bidon nami in moiko. Noyakinbí in kami kon moiko in notarima bidon kon soaḷ inta mopia, tuata in barakat mita inta mokosaḷamat kon i monimu.

¹⁰ Sin ki Allah in moadilbí. Diábí koḻiongan-Nea in onu inta ain inaidan monimu kon i-Nia, bo tabi inta pinoontong monimu kon i-Nia wakutu in notuḷung kon utat mita inta tumpaḷa mopirisaya kon i Kristus tungkuḷ intua bo masa in tanaa.

¹¹ Ibogon nami bá moiko komintan in umuran morigon in gina bo totu-totuu mopirisaya kon wakutu in mobiagpa, sahingga in moiko motarima kon onu inta i harap mako monimu tua.

¹² Donaai mokopomaḷat, táe duduiaidon aid in intau mita inta ain notarima kon onu inta pinodandi i Allah, sin mosia in umuran nopirisaya kon i Allah bo nosabar doman mako in nogoḷat.

Dandi i Allah in diábí motaau baḷuian

¹³ Sin wakutu in ki Allah nodandi kon i Abraham, nongibot in Sia kon totu-totuubí mobaḻí in onu in pinodandi-Nea tatua. Bo lantaran diábí in moḷantu-ḷantud nongkon i-Nia, dá nongibot in Sia pinodoyon kon tangoi-Nea tontaní.

¹⁴ Nanaa in kai-Nia, “Akuoi in modandi kon barakatan-Kubí bo baḻíon-Kubí mobayong in buímu.”

¹⁵ Nosabar in ki Abraham in nogoḷat kon dandi tatua, sahingga nouḻínea in onu inta pinodandi tatua i Allah.

¹⁶ Aka intau bo mongibot, yo mongibotbí in sia podoyon kon tangoi in intau inta moḷantu-ḷantud nongkon inia, dá ibotnea tatua in monginggamádon kon bayongan bobayowan.

¹⁷ Ki Allah in moibog mopoyakin bui kon intau mita inta motarima kon dandi-Nea kon diábí baḷuian-Nea in tomayá-Nea tatua. Manangka intua Sia in nongibot bui.

¹⁸ Doyowa nopasaḷ tatua in diábí mobaḷu-baḷui: Totuuonbí i Allah in dandi bo ibot-Nea tatua. Sia in diábí monguboḷ. Manangka intua kita inta umuran umoḻiung kon i-Nia, umuran-Nea inogoian in ropot bá umuran kumadai kon onu inta i harap mako kon tayowon naton.

¹⁹ Onu i harap mako naton tua in naonda bo jangkar inta noikanom mako kon tampat inta modaḷom totok bo nobaḻí kokadaian inta moropot totok bo mokoaman kon kobiagan naton. Onu inta iharap mako tua ain noidapot in yuang inta totok in motusi kon Baḷoi Tuhan kon soroga.

²⁰ Ain binontangan i Yesus in daḷan bayáan naton tatua, Sia in sinumuotdon kon tua bo nobaḻí Imang naton Imang Moḷoben inta diádon mato-matoi ná ki Imang Melkisedek.