IBRANI 5 - Alkitab Singog In Mongondow Masa In Tanaa

¹ Sin pomuḷoi in imang moḷoben piniḻí nongkon sigad in umat, binaḻídon simpaḷ i Allah saḷaku toḻiu monia. Oaidan imang tatua in mobogoi in sosumba kon i Allah bo mobogoi in kuruban mita sin potobut kon taḷá mita in intau.

² Tongá mobayongpabí in kalemahan in imang moḷoben tatua, manangka intua sia in musti mokopoaḷus kon potosingog kon i monia inta diá monotaau kon onu bo onu bo kon i monia inta ain noitaḷá kon daḷan.

³ Lantaran sia bo nobayongpa doman in kalemahannea dá mustibí doman sia mobogoi in kuruban, bo kuruban tatua in deemanbí tongá potobut kon dosa mita in umat i Allah, táe dosaneabí doman tontaní.

⁴ Diábí in tobatúmai intau in gumogina in umaḻí Imang Moḷoben sin intau mobaḻí imang, aka moibog in ki Allah mogoiní kon inia bo mokiaid in oaidan tatua, ná ki Harun.

⁵ Bo natua doman in ki Kristus. Diábí in Sia inumaḻi tontaní Imang Moḷoben. Ki Allahbí in nopobaḻí kon i-Nia sin nanaa in singog i Allah kon i-Nia, “Iko nion in ki Adí-Ku; Singgai doman naa Akuoi in mobaḻí ki Amá-Mu.”

⁶ Kon tontagá ibanea ki Allah in nosingog doman nanaa, “Iko nion in Imang inta mononoi, ná ki Imang Melkisedek.”

⁷ Kon wakutu in ki Yesus nobiagpa kon dunia naa, Sia in nosambayang bo nopoigum takin koamu-amui bo koomba-ombaḷ kon i Allah inta mokosanggup moposaḷamat kon i-Nia nongkon roriga in popatoi. Bo lantaran Sia umuran dinumudui kon onu in kinoibog i Allah, dá inindongogan i Allah in pinoigum-Nea tua.

⁸ Umpaka ki Yesus Adí i Allah, táe nobalajardon in Sia nokopotoindudui pinongin in roriga inta ain kinorasaan-Nea.

⁹ Dá naonda in Sia binaḻídon mopoposaḷamat inta nosompurna, Sia in nobaḻídon pangkoi in kasaḷamatan inta mononoi kon bayongan intau inta umuran dumudui kon parenta-Nea.

¹⁰ Bo ki Allahbí tontaní in nopobaḻí kon i-Nia saḷaku Imang Moḷoben, ná ki Imang Melkisedek tua!

Tompoingat

¹¹ Nobayongpabí in musti popotaau nami kon i monimu in soaḷ kadudukan i Yesus saḷaku Imang Moḷoben, táe moyoyiga totok in moginsilang kon tua sin moḷaḷoi totok in pororai monimu.

¹² Sabanarnea aka raionmai yo moiko nion in bá mobaḻí bidon guru, táe nion in mustipabí moiko mobalajar kon intau ibanea kon soaḷ totundú mita i Allah inta totok in moponting. Moiko in diápa motaau mokaan kon kaanon motogat, bá umuranpa poinumon in susu.

¹³ Intau inta monginumpa kon susu mangaḻenea kon tua adípa mointok inta diápa nonotaau kon onu inta noitutui bo onu inta noitaḷá.

¹⁴ Aka kaanon notogat, tua in ogoi kon intau inta noguyangdon in raiannea bo inta nobayongdon in kinoyitakannea bo inta kinorasaannea, sahingga motaaudon in sia mopoyoposi kon onu inta mopia bo onu inta moraat.