IBRANI 3 - Alkitab Singog In Mongondow Masa In Tanaa

Ki Yesus moḷobe-ḷoben nongkon i Musa

¹ Utat mita tumpaḷa Keresten inta ain inoiní i Allah! Raika monimu koako-ako in soaḷ ki Yesus naa! Sia ain pinotabá mangoi i Allah sinbá mobaḻí Imang Moḷoben kon agama inta dinuduian naton.

² Sia in mosatia kon i Allah inta nomiḻí kon i-Nia sin mogaid kon oaidan tatua, ná ki Musa tungkuḷ intua nosatia doman in nogaid kon oaidannea kon Baḷoi Tuhan.

³ Táe ki Yesus in patusbí mokouḻí kon kahoromatan moḷoben moiḻiu kon i Musa. Sin intaubí inta nogaid kon baḷoi in muna horomaton nongkon baḷoi inta pinomianea tatua.

⁴ Totuubí kon pomuḷoi in baḷoi oyúonbí in nomia, táe inta nomia kon bayongan in yagi-yagi in ki Allahbí.

⁵ Saḷaku simpaḷ kon Baḷoi Allah, ki Musa in mosatiabí in nogaid kon oaidannea bo sia ain nopotaau doman in soaḷ mita inta bain popotaau i Allah kon singgai moiduduimai.

⁶ Táe ki Kristus in mosatiabí saḷaku Adí inta motanggung jawab kon Baḷoi Allah. Bo kitabí naa in Baḷoi Allah aka umuran moḷoben in ibog naton kumadai bo moyakin in mokouḻí kon onu inta harapon mako naton.

Noputú sin Nonoḻikud kon i Allah

⁷ Tuamai, ná inta ain pinoguman in Roho i Allah nanaa: “Aka singgai naa moiko mokodongog kon singog i Allah,

⁸ yo donaai mokopotogat kon gina, ná mogoguyang mita monimu, wakutu in mosia nomarontak bo nonungkuḷ kon i Allah kon padang pasir.

⁹ ‘Kon tua, mosia in nonungkuḷ bo noguji kon i-Nakó,’ guman i Allah, ‘bokaka ain inontong monia in bayongan inta pinomia-Ku kon sigad monia opat nopuḷú notaong in koonggotnea.’

¹⁰ Tuamai in sinumorú Akuoi bo poḷat noguman kon i monia nanaa, ‘Mosia in umuran diá mosatia, bo doí dumudui kon parenta-Ku mita.’

¹¹ Akuoi sinumorú bo nongibot, ‘Mosia tua in diábí moituot kon butá tatua bo mogogai moyotakin-Ku.’ ”

¹² Utatku mita, mokopoingat sinbá diá in tobatúmai kon sigad monimu in gina moraat bo diádon mopirisaya, sahingga in tumoḻikud bo mokopoyayúdon kon i Allah inta nobiag!

¹³ Manangka intua bá diá tobatúmai in kon sigad monimu in kotombodokan in aid inta moraat bo moḷawangdon kon i Allah, dá umurandon positongginaan in moiko pomuḷoi in singgai wakutu in tumpaḷapa nobiag kon masa inta sinangoian kon Buk Motusi “Singgai in Naa”.

¹⁴ Kita naa in komintanbí yobayat topogaidan i Kristus asaḷ bo tantú kumadai kon onu mita inta pinirisayadon naton nongkon pinomangkoianmai modapot kon kopaḷutan in dunia naa.

¹⁵ Tanaa in pinais kon Buk Motusi, “Aka singgai naa mokodongog in moiko kon singog i Allah, yo donaai kotogaton in gina, ná mogoguyangmu, wakutu in mosia nomaḷawang kon i Allah.”

¹⁶ Ki ine in intau mita inta nokodongog kon singog i Allah bo nomarontak kon i-Nia? Mosia tuata in intau mita inta dinia i Musa iḷumuai nongkon butá in Mesir?

¹⁷ Bo ki ine in sinorúan i Allah kon bonu in opat nopuḷú notaong? Tantú mosia inta nogaid kon diá mopia bo inta minatoidon kon padang gurun!

¹⁸ Bo ki ine doman degá in pinopomakusudan i Allah in ibot-Nea nanaa: “Mosia tua in diábí moituot kon butá tatua bo mogogai moyotakin-Ku” Tantú intaubí mita inta nomarontakdon kon i Allah?

¹⁹ Tanaa in kinotaauandon naton kon mosia tua in diábí, moituot, sin diá mopirisaya in mosia kon i Allah.