IBRANI 13 - Alkitab Singog In Mongondow Masa In Tanaa

Naonda in Moposanang kon Gina i Allah

¹ Moiko in musti umuran mositabian saḷaku intau mita in Keresten inta mogutat.

² Dika moondo-ondok in motarima kon intau mita inta diápa nogogintaauan monimu aka mongandup in sia kon baḷoimu. Sin nokoimontandon in nobaḻí, oyúon intau in noibog pinongandupan in intau mita inta diá nogogintaauannea, bo naanta mosia tua in malaekatbí mita.

³ Bo tantúdon kon gina mako in mosia inta kon bonu in ponjara naonda bo moiko kon bonu doman in ponjara noyotakin monia. Bo intau mita inta pinomia ibo-ibog umuran kon gina-gina doman mako in mosia naonda bo pinomia doman natua in moiko.

⁴ Mustibí untuon mako in mangaḻe in tonibuḷoi, tuamai doyowa motonibuḷoi musti mososatiaan tobatú bo tobatú. Sin intau inta mogaid kon mokotor bo inta mononuaḻing in adilonbí i Allah.

⁵ Aka mobiag yo dikabí kawasaan in ibog kon doit, táe kosanangbí in momaké kon onu inta nouḻímu sin ki Allah nogumandon nanaa, “Akuoi in diábí mopomayá mako andeka monaḷámai kon inimu.”

⁶ Tuamai mobaranibí in kita moguman, “Ki Tuhan in mototuḷungku, tuamai akuoi in diá moondok. Onubí in motaau aidan in intau kon inakó?”

⁷ Dikabí koḻiongan monimu in itoi mita monimu inta mopoyaput in koyow i Allah kon i monimu. Tarukirabí naonda in kobobiag monia bo naonda in kopopatoi monia, bo duduiai in kopopirisaya monia.

⁸ Ki Yesus Kristus in diábí mobaḷu-baḷui, koḻipod, masai naa bo modapotkabí in kopaḷutannea.

⁹ Dika moibog in moiko poyayingon in totundú mita inta mokoherang kon i monimu. Gina naton naa in musti irigonan in totabi i Allah, tuabí in mopia, deemanbí atorang mita soaḷ kokaanon. Intau mita inta tungkuḷ intua dinumudui kon atorang mita tatua in diá nokouḻí kon mangaḻenea.

¹⁰ Oyúonbí in meja pobobogoian naton kon sosumba kon i Allah. Bo imang mita inta nogaid kon bonu in Baḷoi Tuhan, diábí motaau in mokaan kon kuruban inta kon tudu in meja tatua.

¹¹ Dugú in mahaḷuk inta pinosumba saḷaku kuruban pongampungan kon dosa dinia i imang moḷoben kon Yuang Inta Totok Motusi, táe awak in mahaḷuk tatua in sinubábí kon ḷuai in pinononḷoḷaigan.

¹² Manangka intua ki Yesus in minatoi doman kon ḷuai in ngara moḷoben in kotá sin mondarit kon umat-Nea nongkon bayongan in dosa. Dugú-Neabí tontaní in pinodugú-Nea.

¹³ Tuamai, koḻigai mayá in kita kon i-Nia kon ḷuai in ḷoḷaigan bo moyotakin-Nea singkuḻeon.

¹⁴ Sin kon dunia naa diábí in tampat pogutunan mononoi kon i naton, kita in mayábí motayak kon tampat pogutunan kon singgai moiduduimai.

¹⁵ Tuamai potonsigad naton kon i Yesus, kita in musti umuran modayow kon i Allah; tua in nobaḻí kuruban sukur naton kon i-Nia, inta pinosumba naton pinongin singog in bibig sin mopomulia kon tangoi-Nea.

¹⁶ Donaai koḻiongan monimu in mogaid kon inta mopia bo mosituḷungan, sin naabí in kuruban mita inta mokosanang totok kon gina i Allah.

¹⁷ Duduiaibí onu in pinarenta in itoi mita monimu bo kodu-kodudui doman kon i monia. Sin mosia in umuran monarukira mako kon kobiaganmu bo mustibí in mosia motanggung jawab kon i Allah. Aka moiko bo motoindudui kon i monia, dá mosanangbí in gina monia in mogaid, táe aka diá yo monakit in gina monia in mogaid, bo tua in diábí mobogoi in kauntungan kon i monimu.

¹⁸ Tantúbí sambayangai in kami. Moyakinbí in kami kon notuḻidbí totok in gina nami, sin pomuḷoi in kami mogaid kon yagi-yagi, tantúbí inta mobanar in aidan nami.

¹⁹ Poigumonkudon totok, sambayangaipa in akuoi bá ḷagidon diaan mangoi i Allah kon i monimu.

Sambayang ponimpod

²⁰ Ki Allah in nomiagdon bui kon i Yesus Kristus Tuhan naton nongkon kinopatoian-Nea. Popisíbí in popatoi-Nea tatua, dá masai naa Sia in nobaḻídon Gombala Momulia kon i naton inta domba-Nea mita. Kinopatoian-Nea tatua in noposah bidon kon dodandian mononoi inta inaidan i Allah takin inaton.

²¹ Poigum mako, ki Allah inta nobaḻí pangkoi in kobiagan motompia, umuran mobogoi in bayongan inta mopia inta paraḷu pakéon monimu mogaid kon onu inta koibog i Allah. Bo poigumon doman mako takin totuḷung i Yesus Kristus, popoaidon i Allah kon i naton in onu inta kinoibog-Nea. Tantúbí dayow in ki Kristus dapot in kopaḷutannea! Amin.

Simpod in surat

²² Poigumonku kon i monimu utat mita, sinbá indongoganpa monimu in tongginaku mita naa takin gina mosanang, sin nopoḷokbí in suratku tanaa.

²³ Musti kotaauanmu, kon ki Timotius ki utat naton in pinobebasdon nongkon ponjara. Aka moiangoidon in sia kon inakó, dá diaankubí in sia aka mamangoidon in akuoi mokipodungkuḷ kon i monimu.

²⁴ Poyaputpa in salamku kon bayongan in itoi monimu bo bayongan in intau inta mopirisaya kon i Allah. Bo tarima domandon in salam nongkon i utat mita naton kon butá in Italia.

²⁵ Igumonku mako, ki Tuhan in umuran mobogoi in barakat kon i monimu komintan.