IBRANI 12 - Alkitab Singog In Mongondow Masa In Tanaa

Allah ki Amá naton

¹ Uḻe, soaḷ kita tontaní, kon ḻibumai naton naa in nobayongbí totok in nobaḻí sakusi! Manangka intua, koḻigai ḷumbúondon naton in bayongan inta mokoyoyiga kon i naton bo dosa inta umuran moikompit mako kon i naton. Bo koḻigai mositandingan in kita in mogaid kon onu inta pinoki aid kon i naton.

² Mogaid in kita kon tua takin umuran mopirisaya kon i Yesus, sin Sia tuata inta nopobangon kon pirisaya naton bo umuran noḷukad kon pirisaya naton nongkon pinomangkoianpamai dapot in pangabisannea. Nonahangbí in ki Yesus in iyoyiga kon kayu pinoyotaḻempang! Diábí pinandung-Neamai in matoi kon kayu pinoyotaḻempang tua kon totokbí in mokooyá. Tongábí ḷunganga inta korasaan-Nea kon singgai moiduduimai in umuran pinonorop-Nea mako. Bo tanaa mako, Sia in iḻimitúdon kon dotá in koḷanan i Allah bo nomarenta noyotakin-Nea.

³ Toropka monimu naonda in kororiga i Yesus in sinumayow kon intau mita dinosa inta noramuji totok moḷawang kon i-Nia! Tuamai in umuranbí korigon in gina bo umuran moharap.

⁴ Sin wakutu in moiko moramuji totok in moḷawang kon inta diá mopia, diápabí dodai onda in moiko in nobakuat dapot iḷuaian dugú.

⁵ Bo dikabí ḻiongon monimu in tonggina mita i Allah tanaa, inta inogoi-Nea kon i monimu saḷaku ki adí-Nea mita: “Adí-Ku, tarukiradon kopira totok in totundú i Tuhan, bo dikabí tumontoḷ aka torúan-Nea in iko.

⁶ Sin sambokonbí i Tuhan in intau mita inta kotabi-Nea, bo sambokon-Neabí in intau inta ináku-Nea saḷaku ki adí-Nea.”

⁷ Tarimabí monimu aka sambokon i Allah in moiko. Sin Sia in mosambok saḷaku ki Amá naton. Sin diábí tobatúmai in adí tongá pomayá mako diá sambokon i amánea aka mogaid kon inta diá mopia?

⁸ Aka moiko diádon moitakin sambokon ná mongoadí mita ibanea naa, yo tua in mangaḻenea moiko in deeman bidon ki adí-Nea totok, táe dongka bidon uatok.

⁹ Kon dunia naa oyúonbí in ki amá naton. Sia in motundú kon i naton, táe horomatonbí naton in sia. Yo bambíkabí bo ki Amá naton kon soroga, tantú mustibí in kita tumonsiup kon i-Nia sinbá mobiag in kita.

¹⁰ Aka guyanga naton kon dunia naa in motundú yo noterbatasbí sin tongábí onu inta inanggap monia mopira. Táe aka ki Allah in motundú yo tua in kopiaanbí naton tontaní. Sinbá kita in mokouḻí doman kon silai inta mopia nongkon i-Nia.

¹¹ Totuubí kon wakutu in kita sambokon, diábí mosanang in gina naton, sedang bo monakitbí totok. Táe moiduduimai kon tua, kita inta sinambok, yo sambok tatua in momaḷuibí kon oaid naton, sahingga in kita nobiagdon podudui in ibog i Allah, bo bungainea kon tua in mosanangdon totok in gina naton.

Tonggina bo tompoingat

¹² Tuamai, koropot in ḻimamu inta noḻemé bo duḷudmu inta mouyot tua!

¹³ Bo umurandon bayá kon daḷan inta motondodai, sinbá sioḷmu inta nopelong tua diá moḻitoi, táe mopia bidon.

¹⁴ Poramuji umuran mobiag motompia takin bayongan intau. Poramuji doman mobiag mokudus takin i Tuhan. Sin diábí in tobatúmai intau mokoontong kon i Tuhan aka diá mobiag natua.

¹⁵ Ḷukadaibí sinbá diá tobatúmai in intau ḷumuai nongkon kobiagan inta pinodoyon kon totabi i Allah, sinbá diá in mobaḻí rasum inta mokopomuká kon ropatoi bo inta mokogoguyaat kon kobiagan intau mobayong.

¹⁶ Ḷukadaibí doman sinbá diá in intau mobiag mokotor andeka doí moguntun kon soaḷ mita inta nongkon i Allah, ná inta inaidan i Esau. Sia in nobarani totok nopotaḷui in haknea saḷaku adí guya-guyang tongá popisí in kaanon topindan.

¹⁷ Sinbá kotaauan monimu, naonda in ki Esau moibog mokouḻí kon barakat nongkon i amánea, sia sinolak. Sin umpakabí takin ombaḷ sia motayak kon daḷan mopoyotutui kon onu inta noitaḷá, táe diá bidon in kasampatannea.

¹⁸ Utat mita, moiko in diábí mamangoi tumayow kon ná inta sinayowan in intau Israel koḻipod. Mosia in moyogintayow onu inta koḻiaian, ná umpamanea buḷud Sinai bo tuḷúnea inta kodoko-dokot; mosia noyogintayow in sindip, bo kaadaan inta diá totok in motarang bo tompot moropot.

¹⁹ Mosia in sinumayow kon singog in terompet, bo singog inta totok mokobongom-bongoḷ. Bo naonda in intau mita Israel nokodongog kon singog tatua, nopoigum totok in mosia sinbá singog tatua diádon mosingog kon i monia.

²⁰ Sin mosia in diádon mokotahang mokodongog kon parenta inta pinoyaput in singog tatua. Sin singog tatua in noguman, “Bayongan inta noḻiai kon buḷud tanaa, mahaḷuk ande ki inekabí, yo mustibí ara bo in batu dapot in matoi.”

²¹ Inta inontong in intau mita Israel tua in mokoondok totok dapot in ki Musa nosingog nanaa: “Moondok bo mouyot in akuoi!”

²² Tongá aka moiko namangoidon in Buḷud Sion bo kotá i Allah inta nobiag, tuata in Yerusalem inta kon soroga takin ribuan malaekat-Nea.

²³ Moiko in sinumakin kon tobatú pinoyodungkuḷan inta morame totok – pinoyodungkuḷan in adí mita guya-guyang i Allah, inta pinaisdon in tangoi monia kon bonu in soroga. Moiko in namangoi sinumayow kon i Allah hakim in bayongan intau naa. Moiko in sinumayow kon roho mita intau mopia inta ain sinompurna.

²⁴ Moiko in namangoi sinumayow kon i Yesus, tonsigad in dodandian inta mobagu tua; moiko in sinumayow kon dugú pinomisik inta nojamin kon soaḷ mita inta mopia-pia nongkon onu inta jinamin in dugú i Habel.

²⁵ Manangka intua mokopoingat, sin dikabo moiko in doídon mokidongog kon i-Nia inta nosingog tatua. Mosia inta doí mokidongog kon i-Nia inta namangoi in dunia naa bo inta nopoyaput in koyow nongkon i Allah, diábí mokoḷagui. Apa doman kita naa inta nokodongog kon i-Nia inta nosingog nongkon soroga! Aka kita bo doí mokidongog kon i-Nia, yo diábí mokoḷagui in kita!

²⁶ Kon wakutu intua singog-Nea mokodoḻiok kon dunia naa. Táe tanaa mako Sia in nodandi, “Komintanpa doman Akuoi in mogaid kon inta mokodoḻiok, deemanbí tongá kon dunia naa táe kon ḷangitbí doman.”

²⁷ Tosingogon “komintanpa doman” mogumanbí kon bayongan in dunia inta ain pinomia naa in dandúon bo ḷumbúon, sinbá dongkadon inta diá modandú in kotaḷáan.

²⁸ Tuamai, kita in musti umuran mopoyaput in sukur kon i Allah, sin kita in motarima kon tobatú dodatuan inta diá modandú nongkon i-Nia. Kita in musti mopoyaput in sukur bo moibada kon i Allah takin mohoromat bo moondok, podudui in onu inta kinoibog-Nea tontaní.

²⁹ Sin ki Allah naton in naonda bo tuḷu inta mokopokak.