IBRANI 11 - Alkitab Singog In Mongondow Masa In Tanaa

Pirisaya

¹ Mopirisaya naa mangaḻenea in totok moyakin kon onu inta iharap mako naton, mangaḻenea oyúon in kotantúan kon soaḷ mita inta diá inontong.

² Lantaran oyúon in pirisaya, dá intau mita tungkuḷ intua kinosanang in gina i Allah.

³ Lantaranbí oyúon in pirisaya, dá kinotaauandon naton kon dunia naa in binaḻíbí i Allah takin singog-Nea. Dá onu inta koontongan naton tua, in nobaḻíbí nongkon onu inta diá koontongan tua.

⁴ Popisí in oyúon in pirisaya, dá ki Habel in noposumba kon i Allah in kuruban inta mopia-pia nongkon onu inta pinosumba i Kain. Popisí doman in pirisayanea tatua, dá ki Habel in sinarima i Allah saḷaku intau inta mopia, bo tua in noniatadon kon sosumbanea in sinarima i Allah. Bo popisí in pirisayanea, dá sia in nosingogpabí umpaka minatoidon.

⁵ Popisí in oyúon in pirisaya, dá ki Henokh biningkat pinobayá kon i Allah sinbá diá matoi in sia. Diábí tobatúmai in nokouḻí kon inia sin biningkatdon i Allah in sia. Kon Buk Motusi in pinais nanaa, “Kon wakutu in ki Henokh diápa sinintak, kobobiagnea in mokosanang kon gina i Allah.

⁶ Aka diá in pirisaya, dá diábí in tobatúmai intau motaau moposanang kon gina i Allah. Sin ki ine in mamangoi kon i Allah mustibí mopirisaya kon ki Allah tua in oyúonbí. Bo intau inta totu-totuu motayak kon i-Nia in ogoian-Neabí in onu inta sinayaknea tatua.”

⁷ Popisí in nopirisaya, dá pinogumanandon i Allah in ki Nuh kon soaḷ mita inta mobaḻí kon singgai moiduduimai, inta diábí koontongannea. Ki Nuh in nopirisaya kon i Allah, dá inindongogannea in onu inta pinoguman i Allah kon inia. Pinomianea in kapaḷ inta kon singgai noiduduimai nobogoi in kasaḷamatan kon inia bo motoḷuadínea. Dunia naa i hukum i Allah, táe popisí in ki Nuh nopirisaya, dá pinoniatadon i Allah kon intaubí mopia in sia.

⁸ Popisí in mopirisaya, dá ki Abraham in dinumudui kon i Allah wakutu inoiní i Allah bo pinotabá minayá in butá inta pinodandi i Allah ogoi kon inia. Ki Abraham in minayábí doman umpaka diápa kinotaauannea mongo kon onda in bayáan.

⁹ Takin pirisayanea tatua, sia in nogutun saḷaku intau mokokiangoi kon butá inta pinodandi i Allah kon inia tua. Ki Abraham in nomia kon ḷoḷaigan bo nogutun kon tua. Natua doman in ki Ishak bo ki Yakub inta notarima doman kon dandi natua nongkon i Allah.

¹⁰ Ki Abraham in mogoḷat mako kon kotá inta sinomayá i Allah posindogon kon pondasi inta moroton.

¹¹ Popisí in mopirisaya, dá ki Abraham in nokouḻí kon buí nongkon i Sara umpaka nogoguyangdon in sia bo bantó doman in ki Sara ki buḷoinea. Ki Abraham noyakinbí kon totuuonbí i Allah in dandi-Nea tatua.

¹² Umpaka wakutu intua ki Abraham nádon onda bo intau minatoi in awaknea, táe nobayongpabí doman in buínea, diábí koiapan in kobayongnea sin nádon tundi kon ḷangit bo bungaion kon bingkí in pintad kobayongnea.

¹³ Bayongan in intau tatua in umuran nopirisaya umaai in minatoi. Mosia in diábí notarima kon onu inta pinodandi i Allah, táe tongá nokoontong bo notamad nongkon noyayú. Aid monia tua in noponiata kon mosia tua in tongábí intau mokokiangoi inta tongá doman noiandupmai kon dunia naa.

¹⁴ Mosia inta nosingog natua in nopoontongdon kinosilang kon mosia tua in yogot motayak kon butá inta mobaḻídon kapunyaan monia tontaní.

¹⁵ Deemanbí butá inta ain sinaḷaan in umuran raion monia. Sin aka tua in umuran raion monia, dá nobayong bidon in kasampatan monia in nobui kon butá tatua.

¹⁶ Táe noniata magí inta kinotanoban monia tua in tobatúbí butá inta totok mopia, tuata in butá inta kon soroga. Manangka intua diábí mooyá in ki Allah tangoion ki Allah monia, sin pinosadiaan bidon i Allah in mosia kon tobatú kotá.

¹⁷ Popisí doman in mopirisaya, dá ki Abraham nobaranibí in noposumba kon i Ishak saḷaku kuruban kon i Allah wakutu in inuji i Allah in sia. Ki Abrahambí tua in pinobogoian i Allah kon dandi-Nea, táe norelabí in sia in noposarakan kon i adínea inta tongá totobatú tua.

¹⁸ Umpaka nanaa in guman i Allah kon i Abraham: “Ki Ishakbí naa inta mobogoi in buí inta pinodandi-Ku kon inimu.”

¹⁹ Ki Abraham in noyakinbí totok kon mokosanggupbí in ki Allah momiag kon i Ishak nongkon kinopatoiannea tua, dá motaaubí tangoion kon ki Abraham in notarimadon bui kon i Ishak nongkon kinopatoiannea.

²⁰ Popisí in oyúon doman in pirisaya, dá ki Ishak in nopodandi doman in barakat mita kon i Yakub bo kon i Esau kon soaḷ kobiagan monia kon singgai moiduduimai.

²¹ Popisí in oyúon pirisaya, dá wakutu in ki Yakub diápa minatoi, binarakatannea in ki adí mita i Yusup. Kinumadai in sia kon tungkudnea bo nosumba kon i Allah.

²² Popisí in oyúon in pirisaya, dá naonda in ki Yusup motoyongdon matoi, sia in nongonguman kon naonda in koḷoḷuai intau in Israel nongkon Mesir. Sia in munadon nongoyow, kon tuḷannea mita in diaan aka ḷumuaidon nongkon butá in Mesir tatua.

²³ Popisí in mopirisaya doman, dá guyanga i Musa in nobuni kon inia toḷu nobuḷan in koonggotnea naonda in noilahirdon in ki Musa. Inontong monia kon moḷunat totok in adí tatua, dá diábí noondok in mosia noḷawang kon parenta i datu.

²⁴ Popisí in mopirisaya, dá ki Musa naonda in noḷantudon doíbí tangoion ki adí in bobay i datu in Mesir.

²⁵ Sia in moibo-ibogbí mobiag moyoyiga moyotakin in umat mita i Allah, doíbí in sia nobiag nosanang táe umuran kinawasaan in dosa.

²⁶ Irai Musa kon diábí nongonu in singkuḻeon sin mopirisaya kon i Datu Mopoposaḷamat inta pinodandi i Allah dika in mokouḻí kon bayongan kapunyaan kon butá in Mesir, sin iharap mako i Musa tua in kapunyaanbí kon singgai moiduduimai.

²⁷ Popisí in mopirisaya doman, dá ki Musa in nonaḷámaidon kon Mesir diábí in ondoknea kon torú i datu. Sia in umuran nogaḷow kon tujuannea naonda bo inontongneadon in ki Allah inta diá koontongan tua.

²⁸ Popisí in nopirisaya, dá ki Musa in nomia doman kon Paska bo nokipisik doman in dugú kon ḷoḻingkop mita in baḷoi in intau Israel sinbá diá ḻimodon in Malaekat Maut in ki adí mita monia guya-guyang.

²⁹ Popisí in nopirisaya, dá intau mita in Israel nokoḷoḷan kon Dagat Teberau, naonda bo minaya-mayá kon tudu in butá noingkag in mosia, táe intau mita in Mesir nongoḷomot kon dagat tatua naonda in nonungkuḷ in mosia iḷumoḷan.

³⁰ Popisí in nopirisaya, dá norumbunbí doman in intau Israel in dinding Yerikho wakutu in iḻibu monia pitu nosinggai.

³¹ Popisí in oyúon in pirisaya, dá ki Rahab, bobay sundaḷ tua in diábí kinoḻimodan noyotakin in intau mita inta noḷawang kon i Allah; popisí in nopia totok in pinototomunea kon totabá mita in intau Israel.

³² Uḻe, nobayongpabí doman in motaauku oumanon, táe diádon i wakutuku mongonguman kon soaḷ tai Gideon, ki Barak, ki Simson, ki Yepta, ki Daud, ki Samuel bo nabi mita.

³³ Popisí in mosia mopirisaya, dá sinaḷowdon monia in dodatuan mita ibanea. Inaidan monia in onu inta totuu, tuamai in nouḻí monia onu inta pinodandi i Allah. Bibig mita in singa pinomponan monia,

³⁴ tuḷu inta noborambang nopiong monia, bo mosia in diábí kinotakuḷan. Mosia in noḻemé táe nobaḻí noropot, mosia noḷoḷakidon kon pinoparangan sahingga in sinaḷow monia in tontara mita in bangusa ibanea.

³⁵ Popisí in oyúon in pirisaya monia, dá bobay mita in noyodungkuḷ bui in intau mita monia inta ain minatoi, sin mosia in biniagdon bui. Oyúon doman inta norelabí in iroriga nodapot in minatoi, bo doíbí pobebason popisí in moibog bui biagon bo mokouḻí kon kobiagan inta totok in mopira.

³⁶ Oyúon in irupa-rupamai, sinambok, sinogot in rante bo pinobonu kon ponjara.

³⁷ Mosia in inandur in batu nodapot in minatoi, oyúon doman in ginaragaji, bo oyúon doman iratá in pitow. Maya-mayá mako in mosia bo mopogiḷambung in ḷambung inta pinomia nongkon kuḻit in domba andeka kuḻit in bembé; mosia in nobiag nobogá, pinogutú bo iroriga mangoi.

³⁸ Dunia naa in deemanbí tampat mopia kon i monia. Mosia maya-mayá mako kon padang gurun bo kon buḷu-buḷudannea bo mogutun kon bonu in angob mita kon bubú mita in butá.

³⁹ Moḷoben totok in kauntungan nouḻí in intau mita tatua popisí in pirisaya monia! Táe diábí in mosia notarima kon onu inta pinodandi i Allah,

⁴⁰ sin oyúonbí in tomayá i Allah kon i naton inta mopia-piabí totok nongkon tua. Naa in tomayá-Nea tua, tongábí moyotakin naton, mosia in mobaḻí mosompurna.