HOSEA 8 - Alkitab Singog In Mongondow Masa In Tanaa

Ki Tuhan in nohukum kon Israel popisí in nosumba kon berhala

¹ Ki Tuhan in noguman, “Posingogdon in tomponuot in anib! Musung in nonubu kon butá-Ku naonda bo boniá nonampí kon kaanonnea! Umat-Ku in iḻimimpat kon dodandian-Ku takin i monia, bo noḷawang kon totundú-Ku mita.

² Umpaka mosia moguman kon Akuoi in ki Allah monia, bo moguman kon mosia in umat-Ku inta nonotaau kon i-Nakó,

³ táe diábí tarimaan monia onu inta mopia. Tuamai mosia in duduranbí in musung mita monia.

⁴ Umat-Ku in nomiḻí kon datu táe diá muna noḻibó kon i-Nakó. Mosia in noduí kon itoi táe diá noguman kon i-Nakó. Mosia in nogamá kon buḷawan bo saḷaka monia bo nomia kon patong berhala inta nokopopisí kon kinorimumudan monia tontaní.

⁵ Akuoi in doíbí kon sapi buḷawan inta sinumba in intau in Samaria. Akuoi in sinumorúbí totok kon i monia. Modapot in toonu in mosia in umuran mopokotormai kon awak pongin mosumba kon berhala?

⁶ Sapi buḷawan inta sinumba kon Samaria tatua in miabí in ḻima in intau in Israel! Tua in deemanbí Allah, bo mustibí rimumudon!

⁷ Umat-Ku in noponimboi in tompot dá mosia in mokoyutbí kon deḷang! Gobá in gandum monia in diábí dumarag, dá diábí mobogoi in topong kaanon. Táe aka gobá tatua bo dumarag doman, dá gandumnea in gamáanbí komintan in bangusa mita ibanea.

⁸ Naonda bo kuyon inta noḷosi, natuata in Israel diádon in mangaḻenea, bo nobaḻídon bangusa inta biasa ná bangusa mita ibanea.

⁹ Naonda bo keledai ḻindong inta iḷumoḷongon, natuata in intau mita in Israel dinumudui kon ibog mita monia tontaní. Mosia in notayak kon totuḷung nongkon Asyur, bo notaḷui kon yoyobayatan in bangusa mita ibanea.

¹⁰ Táe sipunon-Kubí bo hukumon in mosia. Diádon moonggot bo mosia in mogongot popisí in monakit, aka mosia dorotondon i datu in Asyur.

¹¹ Kobayong-kobayong in mezbah posindogon in intau in Israel sin pomopat kon dosa, yo kodugang-kodugang domandon in tampat monia pogaidan kon dosa!

¹² Akuoi in nomais kon nobayong totok in totundú kon i monia, táe tua komintan dinoí monia sin inanggap monia kon diábí in yoguputnea takin i monia.

¹³ Mosia in moibog moposumba in kuruban kon i-Nakó, bo mokaan kon ponoyá pinokuruban tatua, táe Akuoi ki Tuhan, in diábí moibog kon kuruban mita tatua. Tanaa in toropon-Kudon in dosa monia bo mohukum kon i monia popisí in dosa mita tatua; Akuoi in mokidiabí bui kon i monia pobui kon Mesir!

¹⁴ Intau in Israel noposindog in komaḻig mita, táe mosia in nokoḻiong kon i Inta nomaḻí kon i monia. Intau in Yohuda nodugang kon kobayong in kotá mita inta dininding, táe Akuoi in mopoonagbí in tuḷú sin momagong kon bayongan in komaḻig bo kotá mita monia.”