HOSEA 7 - Alkitab Singog In Mongondow Masa In Tanaa

¹ Ki Tuhan in noguman, “Pomuḷoi in Akuoi moibog monompia kon umat-Ku Israel bo mopoyobui in kaadaan monia, inta ontongon-Ku in tongábí aid moraat bo dosa monia. Mosia in mosiakaḷan, tumuot in mosia kon baḷoi in intau bo monakow, bo mosia in mogagow kon daḷan mita.

² Diábí kon dodai in onda in noiraimai kon i monia kon toropon-Kubí in bayongan in aid moraat tatua. Táe dosa mita monia in noikoḷobdon kon i monia dá nosilangdon totok kon mata-Ku.”

Pinoyopopogan kon komaḻig

³ Ki Tuhan in noguman, “Pinongin tompobaḻik bo aid mita inta moraat rayat moḷongasi moposanang in gina i datu bo in pojabat mita in pomarenta.

⁴ Mosia komintan momomaḻidawan bo intau inta diá motoindudui. Yaat in gina monia in naonda bo tuḷú kon bonu in doḷuong inta diá kinokaban i mogogaid kon roti kon tungkuḷ in kukis diápa noisadia tubáan.

⁵ Kon singgai bobutungan i datu, pinoinum monia in anggur in ki datu bo pojabatnea mita nodapot in noḷoḷangu bo nogaid kon inta nopompuḷong. Imbuitnea ki datu in noposanang in gina takin momomaḻidawan mita tatua.

⁶ Naonda bo tuḷú kon bonu in doḷuong natuata in niat moraat bo torú monia nonombaga kon bonu in gina monia kinoouput in doḷom, bo naonda in doḷo-doḷom sinumagab nobaḻí dokot in tuḷú inta noborambang.

⁷ Kon bonu in torúnea, mosia in noḻimod kon itoi mita monia. Bayongan in datu monia ain iḻimod noyo-noyodudui. Táe umpaka kaadaan nádomai tua in koraatnea, yo diábí doman tobatúmai in nosambayang kon i-Nakó sin mokituḷung.”

Israel bo bangusa mita

⁸ Ki Tuhan in noguman, “Bangusa in Israel noyopakat in bangusa mita kon ḻibumai monia, dá mosia in nobaḻí naonda bo roti inta noḷutú kon toḷosi.

⁹ Mosia in diábí nonotaau kon popisíbí in yopakat takin bangusa mita tatuata, dá noinggamádon in ropot monia. Imbuit in ouman monia in nodiugdon, táe diábí kinotaauan monia.

¹⁰ Koḷoḷoḷatú in bangusa in Israel koontongandon totok bo nobaḻí tomponuot kon taḷá monia. Umpaka tua komintan ain nobaḻí, mosia in diábí doman notayak kon i-Nakó andeka mobui mangoi kon i-Nakó, ki Tuhan Allah monia.

¹¹ Israel in uik-untag naonda bo ḷagapan paḷoma inta bodok. Dungkuḷ intaunea mita in mokituḷung kon Mesir, onda intua mosia in noḷagui minayá in Asyur!

¹² Táe pomuḷoi in mosia moitaḻib, taanan-Kubí in pukot bo domokon in mosia naonda bo modomok kon ḷagapan. Akuoi in mohukumbí kon i monia popisí in aid mita monia moraat inta ain kinotaauan-Ku.

¹³ Mobodito in mosia, sin mosia in nonaḷámaidon kon i-Nakó. Mosia in morimumudbí sin nomaḷawangdon kon i-Nakó. Akuoi in moibogbí moposaḷamat kon i monia, táe ibada monia kon i-Nakó in tongábí ubo-uboḷ ibada.

¹⁴ Mosia in diábí totu-totuu mosambayang kon i-Nakó. Aka mosia mosambayang, mosia in umobatbí kon tosiugan monia, bo mogamui naonda bo onu inta inaidan in intau mita inta diá mopirisaya kon i-Nakó. Aka mosia mosambayang moigum kon gandum bo anggur, mosia in monongkekeb kon awak ná inta inaidan in intau mita inta nosumba kon dewa. Mosia in totu-totuubí kon moḷawang kon i-Nakó.!

¹⁵ Umpaka Akuoibí in nomaḻí kon i monia bangusa inta moḷoben bo ropot, táe mosia in moyopopogbí monayow kon i-Nakó.

¹⁶ Mosia in umuran bidon dumudui kon dewa mita inta beresibí diá in kawasa onu bo onu. Mosia in diábí motaau pongata naonda bo piot inta nopupud. Itoi mita monia in dumodia in mosingog, tuamai in ḻimodonbí in mosia in kedang, bo kosingan in intau mita in Mesir.”