HOSEA 2 - Alkitab Singog In Mongondow Masa In Tanaa

¹ Tuamai oiní in tumpaḷa intau takin tangoi “Umat i Allah” bo “Kinotabi i Tuhan.”

Aid i Gomer inta diá motoḷutui nobaḻí lambang in Israel

² Ki Tuhan in noguman, “Ei adí-Ku mita, ki inámu in deeman bidon ki buḷoi-Ku, bo Akuoi in deemanbí ki buḷoinea. Tuamai, pelekaradon in sia sinbá sia in dika monuaḻing bo dikadon sumundaḷ bui.

³ Aka sia umuran sumundaḷ, yo ḷongkutan-Kubí in ḷambungnea sinbá mopilang in sia naonda bo kon singgai in sia pinononggadí. Baḻíon-Ku in sia naonda bo butá inta noingkag, dá matoi in rogang in sia.

⁴ Moiko, ki adínea mita, in diá bidon kotabi-Ku; moiko in pinononggadí nongkon pinosundaḷan.

⁵ Ki inámu in sundaḷ diá kotoguoyá. Sia in noguman, ‘Akuoi in mayábí kon inta kinotabiku mita inta nobogoi kon inakó in kaanon bo inumon, wol bo kaeng linen, ḷana in zaitun bo anggur.’

⁶ Tuamai kurungon-Ku in sia kon ruak in bo bonganga, bo moḷamboi kon daḷannea takin tondokon in dinding.

⁷ Sia in momatukbí kon intau mita inta kinoibognea, táe diábí mokodapot kon i monia. Sia in motayakbí kon i monia, táe diábí mouḻínea in mosia. Bo sia in moguman, ‘Akuoi in mobuibí mangoi kon i buḷoiku inta muna; kobobiagku dungkuḷmai in mopia-pia nongkon tanaa mako.’

⁸ Ki inámu diábí kon dodai in onda in akuonnea kon Akuoibí in nobogoi kon inia in gandum, anggur, ḷana zaitun, bo bayongan in buḷawan, saḷaka inta pinakénea nosumba kon Baal tatua.

⁹ Tuamai, kon wakutu pobatunan kon boyó bui-Kubí gamáan in onu inta inogoi-Ku, inta gandum bo anggur, bo wol bo kaeng in linen inta inogoi-Ku kon inia sin pomiaan ḷambungnea.

¹⁰ Pilangankubí in sia kon tayowon in bayongan in intau inta nosiug takinnea. Diábí tobatúmai in kon sigad monia in mokopoḷuat kon inia nongkon kawasa-Ku.

¹¹ Bayongan in bobutungannea in pogogaion-Kubí, pinomayá bobutungan taongan andeka bobutungan buḷanan bo singgai mita in Sabat; impoḷok mako in singog, bayongan in bobutungan in agamanea.

¹² Daiton-Kubí yompaton in pangkoi mita in anggur bo pangkoi mita in ara inta podudui kon inia nobaḻí tondan in pinobatuangannea kon intau mita inta nosiug takinnea. Baḷuian-Kubí in gobá mita in anggur bo gobá mita in aranea mobaḻí kayuon; mahaḷuk mita ḻindong in nomoguyaatbí kon tua.

¹³ Akuoi in mohukumbí kon inia popisí in singgai mita inta pinakénea motubá kon kamania kon i Baal, bo mopotaingkat pongin ḷambánea sin momatuk kon intau mita inta kinoibognea, bodongka moḻiong kon i-Nakó totu-totuu. Akuoi, ki Tuhan ain nosingog.”

Ki Tuhan in notabi kon umat-Nea

¹⁴ Ki Tuhan in noguman, “Tuamai in Akuoi in modiabí kon inia mayá in padang gurun; kon tua sia in dondouḷugan-Kubí pongin tosingogon mita in oibogan.

¹⁵ Gobá mita in anggurnea in pobuion-Kubí bui kon inia, bo Ḷopá in Roriga in baḻíon-Ku ngara pongamangan. Kon tua sia in motomu kon i-Nakó ná kon tungkuḷ in sia noguodpa, kon tungkuḷ in sia bagu iḻumuai nongkon Mesir.

¹⁶ Bo tangoionneadon in Akuoi ki buḷoinea, bo deemandon Baalnea.

¹⁷ Diá bidon ogoi-Ku in sia in monangoi bui kon tangoi in Baal, dá koḻiongandon in intau in tangoi tatua.

¹⁸ Kon dodai intua Akuoi in momia kon dodandian takin bayongan in mahaḷuk sinbá mosia in dika monuyayow kon umat-Ku. Akuoi mopogogaibí in bayongan parang bo moposí in pakakat mita in parang nongkon butá in umat-Ku tatua, bo momaḻí kon i monia mobiag motompia bo moaman.

¹⁹ Israel, iko in baḻíon-Kubí ki buḷoi-Ku, buḷoi inta nosah modapot in mononoi. Iko in kotabi-Kubí bo umuran-Ku koibog; Akuoi in mokopojujurbí bo mosatia.

²⁰ Podudui in dandi-Ku, iko in tonibuḷoion-Kubí. Akuonmubí in Akuoi mobaḻí Tuhanmu tontaní.

^21-22 Kon dodai intua, aka umat-Ku Israel mosambayang, Akuoi in mongindongogbí kon i monia. Nongkon ḷangit ḷabúon-Ku monag in uyan dá butá mopomungai kon gandum, anggur bo ḷana in zaitun.

²³ Pomiaan-Ku motompia in kobobiag in umat-Ku bo motantúdon in mosia in mogutun kon butá monia. Kon i monia inta sinangoi ‘Inta Diá Kinotabi’ poontong-Kubí kon mosia in kotabi-Ku, bo kon i monia inta sinangoi ‘Deeman Umat-Ku’ in tangoion-Kudon, ‘Moiko in Umat-Ku’. Mosia in motubagbí, ‘Ikobí in ki Allah nami.’ ”