HAKIM MITA 6 - Alkitab Singog In Mongondow Masa In Tanaa

Ki Gideon

¹ Komintanpa doman in umat Israel nogaid kon dosa kon i Tuhan, dá pinomayá-Neadon mako in bangusa in Midian nongawasa kon i monia pitu notaong in koonggotnea.

² Intau in Israel moondokdon totok kon intau in Midian, nodapot in mosia nogadopdon kon angob mita kon tampat mita ibanea inta moaman inta kon buḷud mita.

³ Apadoman pomuḷoi in intau monononggobá in Israel, mamangoidon in intau in Midian moyotakin intau in Amalek bo intau mita ibanea nongkon padang gurun bo monubu kon intau in Israel.

⁴ Mosia mononḷoḷaigan kon butá intau in Israel bo momoguyaat kon bayongan in pinomuḷa kon tua modapot kon butá kon ḻibumai in Gaza kon dotá in toḷatan. Bo bobiagon doman domba, sapi bo keledai in umat Israel diaan monia mayá. Diá bidon tonggagatan monia modapot in intau in Israel kinodaitandon in kaanon.

⁵ Intau mita tatua in mamangoi mokapu-kapung kodia-dia in bobiagon bo ḷoḷaigan monia inta mobayong totok. Mosia bo unta monia in diádon koiapan. Mosia in mamangoi sin momoguyaat kon butá tatua,

⁶ bo umat in Israel diá mokopongonu kon i monia.

⁷ Onda intua umat in Israel nokuani kon i Tuhan sinbá motuḷung kon i monia monayow kon intau in Midian.

⁸ Ki Tuhan nopotabá mangoi kon i monia in nabi tobatú. Nabi tatua noguman, “Nanaa in guman i Tuhan, Allah in Israel: ‘Moiko ain pinoḷuat-Ku nongkon pinononggataan kon Mesir.

⁹ Moiko ain pinosaḷamat-Ku nongkon intau in Mesir bo nongkon intau mita kon butá tanaa inta momarang kon i monimu. Mesir ain pinoguntun-Ku nongkon butá tanaa kon dodai in moiko nonubu kon i monia, bo inogoi-Ku in butá monia kon inimu.

¹⁰ Aindon pinoguman-Ku kon inimu kon Akuoibí in ki Tuhan Allahmu, bo moiko in diábí motaau mosumba kon dewa mita in bangusa in Amori inta butá monia in pinogutunan monimu masai naa. Táe moiko in doíbí dinumudui kon parenta-Ku.’ ”

¹¹ Kon singgai tobatú malaekat i Tuhan namangoi kon kotá in Opra, bo iḻimitú kon siungon in pangkoi kayu terpentin, kapunyaan i Yoas, intau nongkon inanakan i Abiezer. Ki adínea inta ki Gideon, koyogot moḻintogmai kon gandum kon tampat pomomugutan kon anggur. Inaidannea intua takin inumado-adop sinbá diá koontongan in intau in Midian.

¹² Malaekat i Tuhan tatua nokipogontong kon inia bo poḷat noguman, “Ei, tayowmobiag inta motorindog! Ki Tuhan kotaki-takinmu!”

¹³ Tubag i Gideon, “Ampung, tuang! Aka totuu ki Tuhan nonakin kon i nami, yo nongonu sin bayongan in naa moiumabí kon inami? Kon ondadon in bayongan inta mokoherang inta pinomia i Tuhan koḻipod bo inta inouman in mogoguyang nami soaḷ naonda in ki Tuhan nopoḷuai kon i monia nongkon Mesir? Tanaa in ki Tuhan nonaḷámaidon kon inami bo binió-bió-Neadon mako in kami kinawasaan in intau mita in Midian.”

¹⁴ Onda intua ki Tuhan nobogoi in parenta tanaa kon i Gideon, “Takin bayongan in ropotmu bayádon poḷuat in intau Israel nongkon kawasa intau in Midian. Akuoibí in nopotabá kon inimu.”

¹⁵ Ki Gideon notubag, “Nongonu sin akuoibí, Tuhan? Naondabí in pomomilatku kon intau in Israel nongkon kawasa in intau in Midian? Kon bonu in suku Manasye inanakankubí naa inta totok in moyangkó. Bo kon bonu in motoḷuadíku, akuoi doman naa inta totok in diá in mangaḻenea.”

¹⁶ “Mokomampubí in iko!” guman i Tuhan, “sin Akuoibí in motuḷung kon inimu. Mogampangmubí in monaḷow kon intau mita in Midian, tongábí naonda bo nonayow in iko kon intau tobatú.”

¹⁷ Tubag i Gideon, “Aka akuoi totu-totuu kinoibog i Tuhan, yo tungkuḷaika ogoiai in tobatú tomponuot kon totuubí kon ki Tuhandon tontaní in nobogoi in parenta tatua kon inakó.

¹⁸ Poigumonku kon moibogpa in ki Tuhan mogoḷatpa kon naa dapot in akuoi mogoḷud kon kaanon kon i Tuhan.” “Mopia,” tubag i Tuhan, “Oḷaton-Kubí dapot in iko mamangoi bui.”

¹⁹ Dá nobuidon in ki Gideon bo nodungú kon bembé batánea tobatú, bo nogamá kon topong mopuḷú nokilo, onda intua nomia kon roti inta diá iragian. Nopaḷut mako kon tua ponoyá tatua binonunea kon karansi, bo tubignea in kon bonu in kuyon, bo bayongan intua dinianea bo inoḷudnea kon malaekat i Tuhan inta nogoḷat mako kon siungon in kayu terpentin tatua.

²⁰ Malaekat i Tuhan tatua in noguman, “Ukatdon in ponoyá bo roti tatua kon tudu in batu tanaa bo popobutakdon in tubig in ponoyá tatua kon ḻimonikannea.” Inaidan i Gideon onu in pinoki aid kon inia.

²¹ Onda intua malaekat i Tuhan nopotundú in tungkud inta kokada-kadainea nodapot in popodnea tatua noiḻiai kon ponoyá bo roti tatua. Dinumokot in batu tatua bo nodaitdon nopokak in ponoyá bo roti tatua. Onda intua malaekat tatua diádon inontong.

²² Dá kinomangaḻeandon i Gideon kon inta namangoi kon inia tua in malaekatbí i Tuhan tontaní. Dá takin ondok nosingogdon in ki Gideon, “Moboditodon in akuoi, o Tuhan Inta Totok in Moḷantud! Sin akuoi in noyodungkuḷdon noyopogot mako in malaekat-Mu!”

²³ Táe ki Tuhan noguman kon inia, “Pokoonow! Dika moondok. Iko in diábí matoi.”

²⁴ Bo ki Gideon noposindog in mezbah tobatú kon tua bo sinangoiannea “Ki Tuhan Pangkoi in Kobiagan Motompia”. Mezbah tatua oyúonpa kon Opra, inta kotá intau in Abiezer.

²⁵ Kon doḷom tua ki Tuhan nobogoi in parenta tanaa kon i Gideon, “Pogamádon kon sapi koḷakian i amámu, inta totok in mopia inta umur pitu notaong. Kokaidon in mezbah inta pinosindog i amámu kon i Baal, bo umpagdon in oigi inta nobaḻí lambang i Dewi Asyera inta kon dotá in mezbah tatua.

²⁶ Posindogdon kon tua in mezbah tobatú inta ain inaidan sinompia mangoi. Onda intua sapi koḷakian tatua komintan, musti tubáanmu komintan mobaḻí kuruban kon i Tuhan. Pondungúdon in kayu oigi inta nobaḻí lambang i Dewi Asyera inta ain inumpagmu tua.”

²⁷ Dá ki Gideon nomiḻí kon mopuḷú in bobantungnea bo minayá nogaid kon onu inta pinarenta i Tuhan kon inia. Táe popisí in sia moiḻiu in ondok kon motoḷuadínea bo kon intau mita inta kon ḻipúnea tatua, dá diá in sia mokobaḻí mogaid kon tua kon dodai in singgai. Dá inaidannea intua kon dodai in doḷom.

²⁸ Naonda in intau mita kon kotá tatua norobangon doḷo-doḷom monik, inontong monia in mezbah inta kon i Baal bo oigi inta nobaḻí lambang kon i Dewi Asyera ain noumpag. Inontong domandon monia in kon tampat tatua ain doman pinoposindogan in mezbah tobatú bo ain domandon sinubá in sapi koḷakian tobatú nobaḻí kuruban.

²⁹ Nosiḻibóandon in mosia, “Ki ine degá in kitogi oaid tanaa?” Naonda in sinaridimai, dá kinotaauandon monia kon ki Gideon ki adí i Yoasbí in nomia kon tua mita.

³⁰ Bo mosia noguman kon i Yoas, “Ki adímu aindon nongokai kon mezbah i Baal bo ain nogumpag kon oigi inta nobaḻí lambang i Dewi Asyera inta kon diugmai in mezbah tatua. Tuamai, diádon mangoi in ki adímu tua poangoi in naa. Sia in mustibí matoi!”

³¹ Táe tubag i Yoas kon intau mita tatua, “Eta degá moiko momihak kon i Baal ande kon inia? Ki ine in momihak kon inia yo ḻimodon doman in singgai naa! Aka Baal tua bo totuu ki Allah, dá pomayádon mako siadon tontaní in mobela kon inia, sin inta kinokai tua in mezbahnea.”

³² Popisí in ki Yoas noguman, “Pomayádon mako ki Baaldon tontaní in monayow kon i Gideon, sin sia in nongokaidon kon mezbahnea,” dá pinangkoidon kon dodai intua intau nonangoi kon i Gideon ki “Yerubaal”.

³³ Kon tungkuḷ intua bayongan in intau in Midian, Amalek bo suku mita in bangusa ibanea kon padang gurun inta kon dotá in pomukaan kon Yordan noyosipundon. Mosia in iḷumoḷan kon Ongkag in Yordan, bo nononḷoḷaigan kon Ḷopá in Yizreel.

³⁴ Táe ki Gideon kinawasa in Roho i Tuhan, dá sia nogirup kon torompet sin mogoiní kon intau mita inta inanakan i Abiezer sinbá mamangoi dumugang kon inia.

³⁵ Sia in nopotabá doman in intau minayá in suku Asyer, Zebulon, Naptali bo suku Manasye – pinomayá inta kon dotá in pomukaan andeka inta kon dotá in toyopan kon Ongkag in Yordan, sin mopoigum sinbá mosia moibog moyotakinnea. Dá mosia namangoi sin mobantung kon i Gideon.

³⁶ Bo ki Gideon noguman kon i Allah, “Tuhan, Iko ain noguman kon akuoi in pakéon-Mu mopoḷuat kon roriga in umat Israel.

³⁷ Aka totuu kon natua, dá kon tudu in butá tanaa, tampat inta biasamai pogukatan nami kon gandum nongkon simpungoinea aindon pinopoukatanku kon bubuḷ in domba inta ginonsing. Aka ikoḷom bo tongádon bubuḷ in domba tanaa in mobuntad in oḷú, bo butánea in diá, dá tuata in pinoniataan kon Iko in mopomaké kon inakó mopoḷuat kon umat in Israel nongkon roriga.”

³⁸ Dá natuadon in nobaḻí: Naonda in ki Gideon nobangon doḷo-doḷom bo nomugut kon bubuḷ i domba tatua, dá nopugutnea magí in tubig in oḷú tatua yo nopuḻing in palo.

³⁹ Bo noguman in sia kon i Allah, “Tuhan, donaaipa kaasí tumorú aka komintanpa doman in akuoi in mosingog. Ogoiaipa in wakutu in akuoi bui monungkuḷ takin momaké in bubuḷ in domba inta ain ginonsing naa. Táe tanaa in pomayádon mako sinbá tongá bubuḷ in domba tanaa in moingkag, bo butánea in mobuntad.”

⁴⁰ Doḷom tua inaidan i Allah onu inta pinoigum i Gideon tatua, dá nopoikoḷomai kon singgai noniata magí yo bubuḷ in domba tatua umuranbí noingkag, táe butánea in nobobatdon in oḷú.