HAKIM MITA 5 - Alkitab Singog In Mongondow Masa In Tanaa

Dondong i Debora bo i Barak

¹ Kon singgai tatua nododongdon in ki Debora bo ki Barak adí i Abinoam. Nanaa in kainia

² Dayowdon in ki Tuhan, sin tontara mita in Israel in noniat bidon in mayá moparang, bo nobayagbí in gina in rayat in mayá moparang.

³ Indongogaidon ei datu mita bo pangeran, akuoi modondong kon i Allah in Israel, tuata in ki Tuhan.

⁴ Kon tungkuḷ in pinotabá-Mudon minayá nongkon Seir, o Tuhan, bo butá in Edom sinaḷáan-Mu, butá in noḷundan, daḷan mita in tubig kon ḷangit nongo bukat domandon, bo goḷom mita in nopobutakdon in tubignea.

⁵ Buḷud mita in nodandú kon tayowon in pongawasa in Sinai, kon tayowon i Tuhan, Allah in Israel.

⁶ Kon dodai in ki Samgar, adí i Anat, bo kon dodai doman i Yael, diábí in kapilah kon dunia, diábí in intau tongá modondaḷoi magí-mako kon daḷan moḷoben.

⁷ Kotá mita in Israel diádon in nogutun, noingongowdon nodapot in iko namangoi, Debora; iko namangoi naonda bo ki iná in Israel.

⁸ Naonda in Israel momangkoidon mosumba kon dewa, nobaḻídon in parang kon butá monia; kon sigad in opat nopuḷú noribu in tontara in bangusa, diábí in tobatúmai in notonggó kon ḷoḷutam.

⁹ Kon panglima mita in Israel inta namangoi takin ibog tontaní, poyaputku in tosingogon ponghargaan moḷoben kon i monia. Dinayo-dayowdon in ki Tuhan!

¹⁰ Ei moiko inta sinumakoi kon keledai nobudó, moiko inta iḻimitú kon permadani, bo moiko komintan inta minaya-mayá in sioḷ, pohabardon in kinountungan tanaa!

¹¹ Kon diug in parigí mita kinodongogandon in intau nodondong noyotakin, mongonguman bui kon kinountungan i Tuhan inta mopobui-buimai, kinountungan in Israel, umat i Tuhan. Dá nopipidon in mosia minayá in ngara in kotá.

¹² Sindogdon Debora, bo podondongdon. Pobuatdon Barak, diádon in intau mita inta sinokodomok!

¹³ Tontara inta mobarani inta nobiagpa namangoi kon itoinea, mosia in namangoi, bo nosadia sin moberjuang kon kopontingan-Nea.

¹⁴ Mosia in minayá nongkon Epraim nopobayá in ḷopá, dinumudui kon tontara i Benyamin inta nopipid kon muna monia. Nongkon Makhir namangoidon in panglima mita, bo nongkon Zebulon sinimindogdon in porwira mita.

¹⁵ Itoi mita kon suku i Isakhar namangoi noyotakin i Debora, ki Isakhar namangoi, bo ki Barak dinumudui doman; mosia in dinumudui kon inia nosiḻig kon ḷopá. Táe suku i Ruben diá in kinotantúan in gina sin kon sigad monia diá in nopakat kon tosingogon.

¹⁶ Nongonu sin mosia in tongábí umuran simindog mako kon yua-yuak in domba? Degá mokidongog kon gombala mogoiní kon bobiagonnea? Totuubí kon suku i Ruben in diá mokopotantú kon gina sin kon sigad monia diá in kinotantúan in tosingogon mopakat.

^17-18 Koyogotpa in ki Zebulon bo ki Naptali noparang kon tampat pinoparangan, suku i Dan in tongábí simindog mako kon diug in kapaḷ, bo suku i Gad in umuranbí tongá mogutun mako kon dotá in pomukaan kon Yordan, bo suku i Asyer in tongábí doman umuran kibio-biómai, doíbí momamping nongkon tampat pinogutunan monia kon pintad.

¹⁹ Kon Taanakh, kon diug in ongkag in Megido, datu mita noparang, datu mita in Kanaan irumopotdon totok, táe kon pinoparangan tatua mosia in diábí nogagow kon saḷaka.

²⁰ Tundi mita sinumakin doman noparang nonayow kon i Sisera, nongkon tampat monia kon toḷungayá.

²¹ Ongkag in Kison noḷunud noḷoben noḷomot kon musung. Pomaju, pomajudon takin kotorindog, ei ginaku!

²² Moḻikat in sioḷ in kabaḷo in mayá inta sinakoian in tumotakoinea.

²³ “Kutukdon in Meros, bo intau inta nogutun kon tua,” guman in malaekat i Tuhan “sin mosia in diá namangoi notuḷung nobaḻí pahlawan inta nogaid kon onu in pinoki aid i Tuhan.”

²⁴ Binarakatandon in ki Yael, ki buḷoi bobay i Heber intau in Keni; nongkon bayongan inta nogutun kon ḷoḷaigan, sia tuata inta totok in binarakatan.

²⁵ Ki Sisera noigum kon tubig, táe inogoiannea in susu in sia, inogoiannea in susu inta binonunea kon palo inta patus pongonginuman in datu mita.

²⁶ Takin kokada-kadai in patok bo popangkuḷ Ki Yael nomakú kon uḷu i Sisera dapot in norimumud.

²⁷ Kon tayowon i Yael noumpag in sia poḷat minatoi noiuḻid kon butá notarima kon wakutunea.

²⁸ Nongkon jandela ki iná i Sisera iḷumongow, bo noguman, “Nongonu sin keretanea, in diábí mododapot mangoi, nongonu sin diábí kodongogan in goḷopak in sioḷ in kabaḷonea?”

²⁹ Inta totok in mobijaksana kon sigad in bongkiḻínea mita in notubag, tubag inta nouḻínea nongkon bonu in ginanea tontaní:

³⁰ “Mosia in koyogot mosilai kon onu inta inagow monia kon parang, kon batúan in tontara, tobatú ande doyowa in mongodeaga. Kon i Sisera, bahan ḷambung inta totok in mongomahaḷ, kon i bokí, in aḷuang inta sinujian in noyagi-yagimai in batangannea.”

³¹ Poigumon mako in musung-Mu mita, o Tuhan, matoi ná ki Sisera, táe bayongan in yobayat-Mu in monindar naonda bo mata in singgai kon ḷangit! Nopaḷut mako kon tua, nobiagdon notompia in butá tatua opat nopuḷú notaong in koonggotnea.