HAKIM MITA 4 - Alkitab Singog In Mongondow Masa In Tanaa

Ki Debora bo ki Barak

¹ Naonda in ki Ehud minatoi, bangusa in Israel binaradosadon bui kon i Tuhan.

² Dá pinomayádon mako i Tuhan in mosia sinaḷow i Yabin, datu in Kanaan inta kon kotá in Hazor in kinoḻitúannea. Panglima in tontaranea in ki Sisera inta nogutun kon Haroset-Hagoyim.

³ Ki Yabin kokereta in parang inta pinomia nongkon uatoi, 900 in kobayongnea. Doyowa nopuḷú notaong in koonggotnea sia in nononggata kon intau in Israel takin dodia moraat. Bo mosia in nokuani nokituḷung kon i Tuhan.

⁴ Kon dodai intua intau inta nobaḻí itoi kon Israel in nabi bobay tobatú. Ki Debora in tangoinea, ki buḷoi i Lapidot.

⁵ Ki Debora in biasamai ḻimitú mako kon siungon in pangkoi in kurma, kon sigad in Rama bo Betel, kon buḷud in Epraim. Bo kon tuata in intau mita in Israel mamangoi mopoigum in tonggina kon inia.

⁶ Kon singgai tobatú nopotabá in sia kon intau nokioiní kon i Barak, adí i Abinoam, nongkon kotá in Kedes kon butá in Naptali. Bo sia in noguman kon i Barak, “Naa in parenta i Tuhan, Allah in Israel, kon inimu: ‘Sipundon in intau ḷoḷaki 10.000 nongkon suku Naptali bo Zebulon, bo diádon in mosia mayá in Buḷud in Tabor.

⁷ Bain baḻíon-Ku in ki Sisera, panglima in parang i Yabin tua, mamangoi kon i monimu kon Ongkag in Kison takin tontaranea bo kereta mita in parangnea sin momarang kon i monimu. Táe popountung-Kubí in moiko kon poparangan tatua.’ ”

⁸ Ki Barak noguman kon i Debora, “Aka iko in dumudui, yo akuoi in moibogbí mayá. Táe aka diá, yo akuoi in doíbí doman mayá.”

⁹ Ki Debora notubag, “Mopia, dumudui in akuoi! Táe pokotorop, deemanbí iko in mokouḻí kon kahoromatan. Popototoidon kon bobay tobatú ki Tuhan monaḷow kon i Sisera.” Dá nobuatdon in ki Debora noyotakin i Barak minayá in Kedes.

¹⁰ Bo ki Barak in nonongganutdon kon suku in Zebulon bo Naptali minayá ná Kedes. Tontara inta dinumudui kon i Barak bo kon i Debora kon dodai intua in 10.000 in intau.

¹¹ Kon tungkuḷ intua ki Heber, intau in Keni, ain sinumondí kon bangusanea. (Bangusa in Keni tua in buí i Hobab, ki bila i Musa.) Ki Heber minayádon noposindog in ḷoḷaigannea mita kon diug in pangkoi mita in terpentin kon Zaanaim, diábí noyayú nongkon Kedes.

¹² Naonda in kinodongogan i Sisera kon ki Barak ain minayá in Buḷud in Tabor,

¹³ sia nosipun kon siow nogatut in kereta parangnea inta pinomia nongkon uatoi tatua, takin bayongan in tontaranea bo nodia kon i monia nongkon Haroset-Hagoyim minayá ná Ongkag in Kison.

¹⁴ Bo ki Debora noguman kon i Barak, “Monik, bayádon! Ki Tuhanbí in modia kon inimu. Singgai in naa pountung i Tuhan in moiko kon i Sisera.” Dá nosiḻigdon in ki Barak nongkon Buḷud in Tabor noyotakin in intaunea mopuḷú noribu,

¹⁵ onda intua nonubu kon i Sisera. Bo pinotombauk i Tuhan in bayongan tontara i Sisera bo kereta mita in parangnea, dá ki Sisera noponagdon nongkon keretanea, bo noribatuk noḷagui.

¹⁶ Ki Barak nogaḷow kon kereta mita in parang bo tontara mita in musung tatua nodapot kon Haroset-Hagoyim bo bayongan in tontara i Sisera tatua iḻimodnea; diá tobatúmai in pinomayánea mako nobiag.

¹⁷ Bo kon dodai intua ki Sisera minayádon noḷagui kon ḷoḷaigan i Yael, ki buḷoi Heber, intau in Keni tatua. Sin, ki Datu Yabin nongkon Hazor noyobayat in inanakan in motoḷuadí i Heber tua.

¹⁸ Naonda in ki Sisera namangoi, sinontomu i Yael in sia poḷat noguman, “Igai Tuang, tuotdon kon bonu in ḷoḷaiganku; dikadon moondok.” Dá sinumuotdon in ki Sisera kon bonu in ḷoḷaigan tatua bo kinoḷoban i Yael in toipoi in sia sinbá moibuni.

¹⁹ Guman i Sisera kon i Yael, “Ogoiaipa in akuoi in tubig topiḻik inumonku; morogang in akuoi.” Dá binukádon i Yael in botutu kuḻit tampat in susu, bo pinoinumnea in ki Sisera, onda intua bui kinoḷobannea in toipoi.

²⁰ Bo ki Sisera noguman kon i Yael, “Bayádon sindog kon tayowon ngara in ḷoḷaigan. Aka oyúon in intau mamangoi bo moḻibó kon inimu mongo oyúon in intau kon naa, yo diá in kamako.”

²¹ Ki Sisera noḷopí totok dá totokdon in sinomposiug in sia bo nosiugdon noḷoḷot totok. Ki Yael nogamá kon popangkuḷ tobatú bo patok in ḷoḷaigan tobatú bo inumado-adop in sia dinimiug kon i Sisera. Bo pinopopakúnea in patok tatua kon koibing i Sisera nodapot in noiḷambai kon butá. Natuata in pinoḷoḻimod i Yael kon i Sisera.

²² Naonda in ki Barak namangoi notayak kon i Sisera, sinontomu i Yael in ki Barak bo poḷat noguman kon inia, “Igai bá tundúon ku kon inimu in intau inta tayakonmu tua.” Ki Barak sinumuot noyotakin i Yael, bo inontongneadon kon ki Sisera in minatoidon, noiukat mako kon butá bo noipatokpa doman mako kon koibingnea in patok in ḷoḷaigan.

²³ Singgai tua ki Tuhan in nopountung kon intau in Israel kon i Yabin, datu in Kanaan.

²⁴ Koonggot-koonggot kodugang-kodugang domandon in roriga popoaid in intau Israel kon i Datu tatua nodapot in minatoidon in sia.