HAKIM MITA 2 - Alkitab Singog In Mongondow Masa In Tanaa

Malaekat i Tuhan kon Bokhim

¹ Malaekat i Tuhan nongkon Gilgal minayá in Bokhim bo noguman kon intau mita in Israel, “Akuoi ain nopoḷuai kon i monimu nongkon Mesir, bo nodia kon i monimu sinumuot kon butá inta pinodandi-Ku kon mogoguyang monimu. Ain doman pinoguman-Ku, ‘Dodandian-Ku takin i monimu in diábí bontowon-Ku.

² Tuamai moiko in diá bidon motaau in mogaid kon dodandian ibanea takin intau mita inta nogutun kon butá tanaa. Mezbah mita monia in mustibí toko umpagon monimu.’ Táe diábí inaidan monimu in onu inta ain pinoki aid-Ku tatua. Tongábí inta diá pinoki aid-Ku in inaidan monimu!

³ Dá, indongogai in tanaa! Diábí poguntunon-Ku in intau mita tanaa aka moiko moparang takin i monia. Mosia in mobaḻíbí musungmu mita, bo moiko in moibaaḷbí, modapot in moiko moiduduidon mosumba kon dewa mita monia.”

⁴ Naonda in malaekat tatua nopaḷut nopotaau in habar tatua, bayongan in bangusa Israel totokdon in nongombaḷ.

⁵ Manangka intua tampat tatua in sinangoian Bokhim. Bo kon tampat tatua intau mita in Israel noposumba in kuruban kon i Tuhan.

Kinopatoian i Yosua

⁶ Naonda in ki Yosua nogatodon kon intau mita in Israel minayá, minayá domandon in mosia sin ḻimitú kon butá inta tonsilai monia tonta-tontaní.

⁷ Kon tungkuḷ in ki Yosua nobiagpa, intau in Israel nogundoi kon i Tuhan. Naonda in ki Yosua minatoidon mosia in umuranpabí doman nogundoi kon i Tuhan kon dodai in umuranpa oyúon in itoi mita monia inta nokoontong tontaní kon bayongan inta mokoherang inta pinomia i Tuhan sin motuḷung kon intau in Israel.

⁸ Ki Yosua adí i Nun – mogogundoi i Tuhan tua – minatoi kon dodai in umurdon mogatut bo mopuḷú notaong.

⁹ Sia iḷobong kon butá tonsilainea tontaní, inta Timnat-Serah butá inta kon buḷud in Epraim kon dotá in utuan kon Buḷud in Gaas.

¹⁰ Noiduduimai kon tua bayongan in topobiagnea minatoi domandon mita. Bo mosia inta nobiag noidudui kon tua diádon nonotaau kon i Tuhan, sin mosia in diá nokouma kon onu inta pinomia i Tuhan kon bangusa in Israel.

Israel diádon nosumba kon i Tuhan

^11-14 Onda intua intau in Israel binaradosadon kon i Tuhan. Mosia in diá bidon nosumba kon i Tuhan, Allah in mogoguyang monia, ki Allah inta ain nodia kon i monia iḻumuai nongkon Mesir. Mosia nomangkoidon nosumba kon i Baal bo kon i Asytoret takin dewa mita ibanea inta sinumba in bangusa mita inta kon diugmai monia. Dá ki Tuhan sinumorú kon i monia bo pinomayá-Neadon mako in musung nonubu bo nogagow kon i monia. Mosia kinodaitandon in akaḷ in tumayow kon musung mita inta ain noḻipung kon i monia.

¹⁵ Pomuḷoi in mosia mayá moparang, ḷawangon i Tuhan in mosia, ná inta ain pinopotoingat-Nea kon i monia. Dá mosia in kino antugandon in yoyiga inta totok in moḷoben.

¹⁶ Nopobui-buimaidon in ki Tuhan nobogoi in itoi kon i monia sin moḷongasi ḷumuat kon musung mita inta mamangoi mogagow.

¹⁷ Táe diábí indoianmai monia in itoi mita tatua. Mosia in umuranbí nosumba kon ilah mita ibanea, bo diá doman mosatia kon i Tuhan. Mosia in diábí dinumudui kon oaid mopia in mogoguyang monia inta mongotoḷutui kon parenta mita i Tuhan.

¹⁸ Aka ki Tuhan mobogoi in itoi kon bangusa in Israel, dá ki Tuhan in umuranbí motuḷung kon itoi tatua. Bo kon dodai in itoi tatua mobiagpa, ki Tuhan in umuranbí mopoḷuat kon i monia nongkon musung mita monia. Sia in motabibí kon i monia aka kodongogan-Nea in mosia mogamui sin pogutúon ande yoyigaan.

¹⁹ Tongá aka itoi tatua bo matoidon, dá dodia in bangusa tatua in modugangdon moraat moiḻiudon kon intau mita inta muna nobiag kon i monia. Mosia in mogundoi kon ilah mita ibanea bo mosumba kon ilah mita tatua. Mosia in nobuidon kon oaid mita monia inta moraat bo doí monimbaḷui kon dodia monia.

²⁰ Manangka intua ki Tuhan sinumorúdon totok kon umat in Israel, bo noguman, “Akuoi in nogumandon kon mogoguyang in bangusa tanaa sinbá umuran kumadai kon dodandian-Ku takin i monia. Táe bangusa tanaa in nomontowdon kon dodandian tatua; mosia in iḻimimpat kon parenta-Ku.

²¹ Tanaa in doí bidon in Akuoi mopoguntun in bangusakabí táonda inta oyúonpa kon butá in tanaa naonda in ki Yosua minatoi.

²² Pakéon-Kudon in bangusa mita tatua sin monungkuḷ kon bangusa Israel, sinbá kotaauan-Ku mongo umat in Israel moibog dumudui kon parenta-Ku mita ná mogoguyang monia, andeka doí.”

²³ Tuamai in ki Yosua diápa pinopountung i Tuhan kon bangusa mita tatua. Nodapot in pinomayádon mako i Tuhan in mosia nogutun kon butá tatua, bo diádon ḷagi pinoguntun in mosia.