HAKIM MITA 19 - Alkitab Singog In Mongondow Masa In Tanaa

Taḷá in intau in Lewi kon Gibea

¹ Kon tungkuḷ in intau Israel diápa ko datu, oyúon in intau in Lewi nogutun kon tampat inta noyayú, kon ḻikudmai in buḷud in Epraim. Nogamá in sia kon bobay tobatú nongkon Betlehem Yohuda bo binaḻínea ki buḷoinea ibanea.

² Táe kon singgai noiduduimai bobay tatua sinumorú kon inia, nodapot in sia nobuidon kon baḷoi i amánea kon Betlehem. Naonda in bobay tatua opatdon nobuḷan kon tua,

³ intau in Lewi tatua minayá nomatuk kon inia sin modondouḷug bui kon inia. Sia minaya takin bobantungnea tobatú bo keledai doyowa. Naonda in noyaput kon tua, bobay tatua nodia kon inia kon tayowon i amánea. Onda in ki amá in bobay tatua nokoontong kon inia, sinomunea takin pia in gina,

⁴ bo dinondouḷugannea sinbá sia diádon mobui. Tuamai, nogutundon in sia kon tua toḷu nosinggai bo nongaan bo nonginum bo nosiug kon tua takin i buḷoinea ibanea tatua.

⁵ Kon singgai noginggopat, nobangon in mosia subupa bo nosadiadon mayá. Táe ki amá in bobay tatua noguman kon intau in Lewi tatua, “Pongaanpa sinbá moropot, bain mopaḷut mako mongaan bo mayá.”

^6-7 Dá iḻimitúdon in intau in Lewi tatua bo nongaan nonginum takin ki amá in bobay tatua. Táe naonda in sia simindog sin mayádon, ki amá in bobay tatua nodondouḷug kon inia sinbá dikadon mayá. “Pobarasanangpa muna,” gumannea, “bo posiugdon kon naa.” Dá nogutunpa bui in intau in Lewi tatua kon tua tonggobii bui.

⁸ Kon singgai noginḻima, subupa totok, naonda in sia mayádon, ki amá in bobay tatua noguman bui kon inia, “Pongaanpa muna uḻe; bain mongaan mako bo mayá.” Dá nongaandon in taya dua noyotakin bo ki oḷo-oḷoimai nodapot in mata in singgai momangkoidon tumoyop.

⁹ Onda intua, naonda in intau in Lewi tatua takin ki buḷoinea ibanea bo bobantungnea tatua mobuatdon, ki amánea noguman, “Mata in singgai tumoyopdon, topípa bo modoḷomdon. Mopia-piabí kon mosiugpa bui kon naa bo mobarasanang. Bain ikoḷom bo mobangon in moiko doḷo-doḷom sin mobuat bo mobui.”

^10-11 Táe intau in Lewi tatua in doí bidon mosiug bui kon tua in doḷom tua. Sia bo ki buḷoinea ibanea tatua nobuatdon, noyotakin in bobantungnea bo takin keledainea doyowa inta oyúon in ḷoḻitúan. Naonda in mata in singgai motoḷontomdon, nodapotdon in mosia kon diug in Yebus (inta Yerusalem). Bo bobantung tatua in noguman kon i tuangnea, “Tuang, koḻigai mongandupa in kita poḷat mosiugpa kon bonu in kotá in intau in Yebus tanaa.”

^12-13 Táe ki tuangnea in notubag, “Diá motaau! Diábí motaau in kita in mogogai kon tampat inta intaunea deeman intau in Israel. Koḻigai mongingguputdon in kita kon bobayáan topiḻikpa bo bain kita mogogai kon Gibea ande kon Rama.”

¹⁴ Tuamai in mosia minayádon turus bo diádon nogogai kon Yebus. Mata in singgai sinumoyopdon naonda in mosia kon Gibea kon butá in suku Benyamin.

¹⁵ Mosia in nongandup kon tua sin mosiugpa kon tua, bo sinumuot kon kotá bo minayá iḻimitú kon ḷoḻitúan. Tongá diá in tobatúmai in intau nogoiní kon i monia mayá in baḷoi monia bo mogogai.

¹⁶ Ḻimitúpa mako in mosia kon ḷoḻitúan kotá, namangoidon in guranga tobatú inta bagu nobui kon gobánea. Sabanarnea sia tua in intaubí nongkon butá in buḷud i Epraim táe nogutundon kon Gibea. (Intau ibanea inta nogutun kon Gibea tua in intau mita in Benyamin.)

¹⁷ Naonda in guranga tatua nokoontong kon intau mita in Lewi tatua kon ḷoḻitúan tatua, sia noḻibó, “Nongkon onda in ki utat, bo mayá in onda?”

¹⁸ Intau in Lewi tatua notubag, “Kami naa in bagu namangoi nongkon Betlehem kon Yohuda, bo kon binayáanpa mobui kon baḷoi kon moyayú kon buḷud in Epraim. Nongkon tua in akuoi. Diá tobatúmai in intau kon kotá tanaa in mogoiní kon inami bo mogogaipa kon baḷoinea.

¹⁹ Diábí in kami moparaḷu kon ibanea mako, tugatbí in tongkaaḷ nami. Oyúonbí in kaanon in biag bo kaanon in keledai nami; oyúonbí doman in roti bo anggur kaanon bo inumon nami motoḷuadí takin bobantungku naa.”

²⁰ Bo intau tatua noguman, “Dika moḻia-ḻiaw in gina, bain tuḷunganku. Dikadon mosiug kon ḷoḻitúan tanaa.”

²¹ Onda intua dinianea in mosia minayá in baḷoinea bodongka nopokaan in keledai mita monia. Bo naonda in mokokiangoi mita tatua nomatádon kon sioḷ, nongaan in mosia.

²² Koyogot in mosia mobarasanang, daḻíbí in baḷoi tatua iḻipung in intau mita moraat kon kotá tatua. Sinuḷud monia in ḷoḻingkop bo noguman kon guranga tatua, “Ogoidon kon inami in ḷoḷaki inta diniamu kon baḷoimu. Aidanmaidon nami in sia!”

²³ Guranga tatua iḻumuai bo noguman kon i monia, “Dika, uḻe utat mita! Poigumonku, dika momia kon inta moraat bo inta diá patus ná tua, sin sia tua in mokokiangoiku.

²⁴ Bain ogoiku in ki buḷoinea ibanea bo ki adíku bobay kon i monimu. Motaaudon in moiko moposanang in gina monimu takin monia. Táe dika in momia kon onu inta moraat kon mokokiangoiku tatua!”

²⁵ Táe popisí in intau mita moraat tatua umuran momakisa totok, dá intau in Lewi tatua nonuḷudon kon i buḷoinea ibanea tatua pinoḷuai kon i monia. Bo mosia nopoyo-poyoḷuan in nomogutú kon bobay tatua dapot in doḷo-doḷom.

²⁶ Naonda in subudon bobay tatua nobui, táe kon tayowon ngara in baḷoi in guranga tatua, baḷoi inta pinogogaian i buḷoinea ḷoḷaki, noumpag in sia bo diádon nonotaau in intau. Naonda in mata in singgai nomukádon kon tuapa doman in sia.

²⁷ Doḷo-doḷom tua, naonda in ki buḷoinea ḷoḷaki nobangon bo nomukatdon kon ḷoḻingkop sin mayádon, inontongnea in ki buḷoinea tatua noisiugdon mako kon tayowon in baḷoi takin noikadai mako kon ḷoḻingkop.

²⁸ “Pobangondon,” gumannea kon inia, “igai mayádon in kita.” Táe bobay tatua in diádon notubag sin minatoidon. Bo binuatnea in bobay tatua bo pinopodatog kon keledai, bodongka minayá nobui kon baḷoinea.

²⁹ Noidapotmai kon baḷoi, sinumuot in sia bo nogamá kon tosilad bo noyinga-yingat kon i buḷoinea ibanea tatua nobaḻí mopuḷú bo doyowa nopongkó. Nopaḷut mako kon tua, pinoki dianea in pongkóan mita in awak in bobay tatua kon suku mita in Israel inta mopuḷú bo doyowa tatua, tumongo batu.

³⁰ Bayongan in intau inta nokoontong kon tua noguman, “Diápabí kon dodai in onda in aid nanaa in nobaḻí, pinangkoi kon umat in Israel iḻumuai nongkon Mesir dapot kon singgai in naa. Diábí motaau in tongá bio-bióon mako naton natua. Musti in kita moyosingog mongo onu in aidan naton!”