HAKIM MITA 15 - Alkitab Singog In Mongondow Masa In Tanaa

¹ Diá noonggot kon tua, naonda in sempo in posipúandon kon bungai in gandum, ki Simson minayá nokipodungkuḷ kon i buḷoinea. Sia in nodia kon bembé batánea tobatú sin ogoi kon i buḷoinea tatua. Ki Simson noguman kon i nunutonnea, “Akuoi in tumuotpa kon gopot moyodungkuḷ i buḷoiku.” Táe diá inogoi i nunutonnea in sia.

² Gumannea kon i Simson, “Kai nakó kamai dá iko in totu-totuudon doí kon inia, dá, inogoikudon in sia kon yobayatmu. Táe motaaubí in iko mogamá kon i ai-ainea. Siabí in moḷuna-ḷunat.”

³ Ki Simson noguman, “Onu in pomiaanku kon intau in Pilistin tanaa, in deemanbí taḷáku!”

⁴ Bo minayá in sia nodomok kon ungkú in kayuon toḷu nogatut. Iput in ungkú in kayuon mita tatua pinoyotogotnea tumongo dodoyowa. Bo kon ubung in togotnea pinopotogotannea in poḷombow tobatú.

⁵ Onda intua pinoyongkitnea in poḷombow mita tatua bo binuḻiannea in ungkú mita in kayuon tatua kon gobá in intau mita in Pilistin. Dá nongopokakdon in bayongan in gandum inta ain sinipun monia kon tua. Dá bayongan in gandum bo gobá mita in anggur noitakin doman nopokak.

⁶ Intau mita in Pilistin minayá notayak mongo ki ine in nomia kon tua. Bo pinotaaudon in intau kon ki Simsonbí in nomia kon tua, sin ki nunutonnea kon Timna ain nobogoi kon i buḷoi Simson kon yobayat tobatú i Simson. Tuamai intau mita in Pilistin nonurub kon bobay tatua takin tombonu in baḷoi amánea dapot in nopayong.

⁷ Bo ki Simson noguman kon intau mita in Pilistin tatua, “O, degá natuabí in pomomaḷut monimu kon tua? Akuoi in mongibotbí kon diábí in akuoi tongá kibio-biómai aka diápa monuḻí kon oaid monimu tatua!”

⁸ Onda intua sia minayá nonubu kon i monia takin diá in tabi bo noḻimod kon nobayong in intau kon sigad monia. Nopaḷut mako kon tua, minayá in sia nogutun kon bonu in angob kon buḷud batu tobatú kon Etam.

Ki Simson nonaḷow kon intau in Pilistin

⁹ Dá intau in Pilistin namangoi kon butá in Yohuda bo nononḷoḷaigan kon tua, onda intua nonubu kon kotá in Lehi.

¹⁰ Intau in Yohuda noḻibó kon intau in Pilistin, “Nongonu sin moiko in nonububí kon inami?” Mosia in notubag, “Kami in mamangoi sin modomok kon i Simson sinbá motaau popoaid nami kon inia in onu inta ain pinopoaidnea kon i nami.”

¹¹ Nokodongogmai kon tua, minayádon in 3.000 intau in Yohuda kon angob kon buḷud batu kon Etam. Kon tua mosia noguman, “Simson, degá diábí kinotaauan monimu kon intau in Pilistin ain nongawasa kon inami? Onubí degá in pomiaanmu kon inami?” Ki Simson in notubag, “Akuoi in tongábí motuḻí kon onu inta ain pinomia monia kon inakó.”

¹² Guman monia, “Kami naa in mamangoi sin motogot bo moposarakan kon inimu kon intau in Pilistin.” Ki Simson in noguman, “Podandidon muna kon moiko in diábí moḻimod kon inakó.”

¹³ “Mopia,” guman monia, “totuu kon kami naa in tongábí motogot bo mobogoi kon intau in Pilistin in iko. Kami in diábí moḻimod kon inimu.” Bo sinogotdon monia in sia takin nomaké in tontogot doyowa inta nobagupa, bo dinia in sia nongkon angob tatua.

¹⁴ Naonda in ki Simson dinia nodapot kon Lehi, intau mita in Pilistin noribatuk in nonontomu kon inia sindaḷan nonggiow kon inia. Bo indoianmai daḻídon in sia noropot sin kawasa i Tuhan. Tontogot mita inta pinotogot kon ḻimanea tatua binontowneadon mako natua naonda bo nomontow kon tontogot inta ain nopokak.

¹⁵ Onda intua nokouḻí in sia kon tuḷan ayoi in keledai inta nobagupa. Pinuyutnea in tuḷan tatua, bo pinakénea noḻimod kon intau 1.000 in kobayongnea.

¹⁶ Dá nodondongdon in ki Simson, “Takin ayoi in keledai, pinatoiku in intau toribu; takin ayoi in keledai, sinipunku in mayat mita monia.”

¹⁷ Nopaḷut mako kon tua, iḷumbúneadon in tuḷan in ayoi tatua. Tuamai in tampat tatua sinangoian Ramat-Lehi.

¹⁸ Onda intua ki Simson totokdon in irumogang, dá sia nokuani kon i Tuhan. Sia noguman, “Tuhan, bagupabí in Iko nopountung kon inakó. Yo tanaa degá akuoi in musti matoi in rogang, modapot in domokondon in intau mita in Pilistin inta diá nonotaau kon ini-Mu?”

¹⁹ Dá ki Allah nomukat kon bubú kon buḷud batu kon Lehi tatua, bo iḷumuaidon in tubig nongkon tua. Ki Simson in nonginum, bo norotondon bui in awaknea. Tuamai bokaká tatua sinangoian Bokaká in Tubig in Hakor. Bokaká in tubig tanaa oyúonpabí in kon Lehi.

²⁰ Doyowa nopuḷú notaong in koonggotnea in ki simson nobaḻí itoi kon umat in Israel kon tungkuḷ in mosia kinawasa in intau in Pilistin.