HAKIM MITA 14 - Alkitab Singog In Mongondow Masa In Tanaa

Ki Simson bo mongodeaga nongkon Timna

¹ Kon singgai tobatú ki Simson minayá in Timna, bo nokoontong kon mongodeaga tobatú intau in Pilistin kon tua.

² Bo sia nobui bo noguman kon guranganea, “Akuoi in moibog kon mongodeaga tobatú intau in Pilistin kon Timna. Akuoi mopoigum sinbá ki amá bo ki iná mayádon moguman mobuḷoi kon inia.”

³ Táe guranganea noguman, “Nongonu sin mustibí mayá motayak kon buḷoi intau in Pilistin, bokaka mosia tua in deemanbí umat i Tuhan! Eta degá diádon in kon inanakan naton tontaní ande kon sigad in bayongan in bangusa naton diádon in mongodeaga inta moitugat kon ginamu?” Tubag i Simson kon i amánea, “Tongá mongodeagabí in Pilistin tatua in koibogku. Bo haraponku mako tua ki amá moibog mayá moguman kon inia kon pobuḷoionku.”

⁴ Guranga i Simson diábí nonotaau kon ki Tuhanbí in nopobaḻí kon Simson momia kon natua. Sin ki Tuhan in motayakdon kon kasampatan momarang kon intau in Pilistin. Kon tungkuḷ intua intau in Pilistin nongawasadon kon intau in Israel.

⁵ Dá minayádon in ki Simson in Timna noyotakin in guranganea. Kon dodai in mosia noitaḻib kon gobá in anggur, ki Simson noyodungkuḷ in singa batánea tobatú. Singa tatua noganggor,

⁶ bo daḻídon in ki Simson nobaḻí noropot sin kawasa i Tuhan. Bo iyabi-yabineamai in singa tatua takin nomaké in ḻimanea, tongábí naonda bo bembé in mahaḷuk tatua. Onu inta nobaḻí tatua diábí inoumannea kon guranganea.

⁷ Onda intua ki Simson minayá nokipodungkuḷ kon mongodeaga tatua poḷat nongongumannea, bo ki Simson noibog kon inia.

⁸ Naonda in diá noonggot kon tua, ki Simson minayádon bui sin motonibuḷoi in mongodeaga tatua. Kon daḷan, sia nomurow sin moindoi kon awak in singa inta ain iḻimodnea tatua. Noiyaputmai kon tua inontongnea in nobarong totok in pasukan kon bonu in awak in singa inta ain minatoi tatua, bo oyúon domandon in biluk.

⁹ Ginamánea in biluk tatua, bo sindaḷannea kaanon kon daḷan. Onda intua sia minayá kon guranganea bo inogoineadon kon i monia in biluk tongo silai tatua, bo kinaandon monia. Táe diábí pinoguman i Simson kon biluk tatua in ginamánea nongkon karubang in singa.

¹⁰ Naonda in ki amá i Simson minayá kon baḷoi in mongodeaga tatua, ki Simson nomia kon rame kon tua, sin natuabí in kabiasaan in tayowmobiag mita.

¹¹ Naonda in intau in Pilistin nokoontong kon inia, mosia nomiḻídon kon tayowmobiag toḷu nopuḷú sin mogindua kon inia.

¹² Bo ki Simson noguman kon i monia, “Oyúon in tangkíku. Aka kotaauan monimu, yo ogoianku in moiko kon batúannea in kaeng lenan inta moaḷus bo tumongo par in pakeang inta mogaga. Moiko in ogoianku in wakutu pitu nosinggai kon dodai in oyúonpa in rame tanaa, in motayak kon onu in mangaḻenea.

¹³ Táe aka diá kotaauan monimu, yo kon batúandon monimu in musti mobogoi kon inakó in kaeng lenan moaḷus bo tumongo par in pakeang inta mogaga.” Bo intau mita in Pilistin tatua noguman, “Motaau! Pogumandon in tangkí tatua.”

¹⁴ Dá ki Simson noguman, “Nongkon inta nokaan, ḷumuai inta kinaan; nongkon inta moropot, ḷumuai inta moromimit.” Naonda in noiḻiudon kon toḷu nosinggai diápa doman kinotaauan monia in mangaḻe in tangkí tatua.

¹⁵ Dá kon singgai noginggopat mosia noguman kon i buḷoi i Simson, “Iko in mustibí modondouḷug kon i buḷoimu sinbá potaauneadon kon inami in mangaḻe in tangkínea tatua. Aka diá, yo pokakon nami in iko takin tombonu in baḷoi i amámu. Iko naa in mogoiníbí kon inami sinbá modait in kapunyaan nami!”

¹⁶ Tuamai, ki buḷoi Simson minayá kon i Simson sindaḷan mongombaḷ, bo poḷat noguman, “Kinotaauankudon kon iko naa in diábí motabi kon inakó. Nongonu sin iko in nobogoibí in tangkí kon yobayatku mita, táe diábí pogumanmu kon inakó in mangaḻenea? Notantú bidon kon iko nion in morongóbí kon inakó!” Guman i Simson, “Oḷatpa muna! Kon gurangakupa tontaní in diábí pinopotaauanku, yo nongonu sin iko in popotaauankubí?”

¹⁷ Pitu nosinggai in koonggot in bobutungan tatua, bo ki buḷoi Simson in tantú domandon mongombaḷ. Bo popisí in sia tantúdon mopoigum, dá kon singgai noginpitu, ki Simson nopotaaudon in mangaḻe in tangkí tatua kon inia. Bo ki buḷoi Simson in nopotaau in mangaḻenea tatua kon intau mita in Pilistin.

¹⁸ Dá, kon singgai noginpitu kon dodai in mata in singgai diápa sinumoyop, intau mita in kotá tatua noguman kon i Simson, “Onu in moromi-romimit nongkon biluk? Bo onu doman in moropo-ropot nongkon singa?” Ki Simson notubag, “Aka moiko diá nopongata kon i buḷoiku, yo diábí kinotaauan monimu in mangaḻe in tangkí tatua!”

¹⁹ Bo daḻídon in ki Simson nobaḻí noropot sin kinawasadon i Tuhan, bo minayá in sia in Askelon. Kon tua in sia noḻimod kon toḷu nopuḷú in intau ḷoḷaki inta nogiḷambung mongo gaga. Ginamánea in pakeang mita tatua bo inogoi kon i monia toḷu nopuḷú inta nopotaau in mangaḻe in tangkínea. Nopaḷut mako kon tua, sia nobui kon baḷoinea takin noyaat in gina.

²⁰ Bo inogoidon i nunuton i Simson in ki buḷoinea tatua kon ḷoḷaki ibanea inta nobaḻí bongkiḻí i Simson kon dodai in pinonikaannea.