HAKIM MITA 13 - Alkitab Singog In Mongondow Masa In Tanaa

Ki Simson pinononggadí

¹ Intau in Israel buidon binaradosa kon i Tuhan, bo ki Tuhan in nopomayádon mako kon intau in Pilistin nongawasa kon i monia opat nopuḷú notaong in koonggotnea.

² Kon tungkuḷ intua oyúon in ḷoḷaki tobatú kon kotá in Zora. Ki Manoah in tangoinea, nongkon suku i Dan. Bantó in ki buḷoinea.

³ Táe kon singgai tobatú malaekat i Tuhan nokipogontong kon i buḷoinea bobay bo poḷat noguman, “Naa in koonggotnea iko in diábí nokouḻí kon adí, táe diá bidon moonggot bo iko in monogusiandon, bo mokouḻí kon adí ḷoḷaki.

⁴ Tuamai ḷukadaidon kopiaan in awakmu. Dika monginum kon anggur ande oinumon inta mokoḷoḷangu, ande kokaanon inta pinoton.

⁵ Naonda in adí tatua pononggadíondon, donaai mokoimontanmai in monggonsing kon buoknea, sin pinangkoipa kon bonu in sian sia aindon sinantú mobaḻí intau nazir. Siadon in moḷongasi totok sin mopoḷuat kon intau in Israel nongkon kawasa in intau in Pilistin.”

⁶ Nopaḷut mako kon tua ki buḷoi Manoah minayá kon i buḷoinea bo noguman, “Uḻe, totabá i Allah in namangoi kon inakó; batangannea in ná malaekat i Allah, dá inagían in ondok in akuoi. Diábí in akuoi noḻibó mongo nongkon onda in sia, bo diábí doman pinogumannea in tangoinea kon inakó.

⁷ Táe sia in noguman kon inakó kon akuoi in monogusiandon bo mokouḻí kon adí ḷoḷaki. Sia in noguman doman kon akuoi in diábí motaau in monginum kon anggur andeka oinumon ibanea inta mokoḷoḷangu, andeka mokaan kon kaanon inta pinoton, sin adí tatua in mustibí ogoi kon i Allah sin mobaḻí intau inta mogogundoi kon bonu in sia mobiagpa.”

⁸ Nokodongogmai kon natua, nosambayangdon in ki Manoah kon i Tuhan, nanaa, “Tuhan, aka motaau yo buipa potabá-Mu mangoi in mogogundoi-Mu tatua kon inami sin mopotaau kon onu in musti pomiaan nami kon adí tatua naonda in sia pononggadí.”

⁹ Dinuduian i Allah onu in pinoigum i Manoah. Malaekat i Tuhan tatua namangoi bui kon dodai in ki buḷoi Manoah tua ḻimitú mako kon gobá. Kon dodai intua ki buḷoinea ḷoḷaki diá in kon tua.

¹⁰ Dá, noribatuk in sia minayá nopotaau intua kon i buḷoinea, “Uḻe, indoiaika, dá intau inta koḻipod namangoi kon inakó tatua, namangoi bui!”

¹¹ Bo ki Manoah ḷagidon dinumudui kon i buḷoinea. Sia dinimiug kon intau tatua bo noḻibó, “Ki Tuangdon degá inta nodia kon habar kon i buḷoiku?” “Totuu,” tubagnea.

¹² Bo ki Manoah noḻibó, “Aka mobaḻídon onu inta pinoguman i Tuang tua, yo onu in musti pomiaan in adí tatua? Naonda degá in kobiagannea moiduduimai?”

^13-14 Tubag in malaekat i Tuhan tatua, “Ki buḷoimu in diábí motaau in monginum kon anggur andeka oinumon inta mokoḷoḷangu, bo diá doman motaau in mokaan kon onuka inta nongkon pangkoi in anggur, andeka onu inta pinoton kon hukum in agama. Musti aidannea in bayongan inta ain pinogumanku kon inia, bo ḷukadannea sinbá diá in kotaḻibannea.”

¹⁵ Bo guman i Manoah kon i-Nia, “Oḷatpa Tuang motoyong. Podungúanpa nami kon bembé batánea in ki Tuang.”

^16-17 Táe malaekat i Tuhan tatua noguman, “Umpakabí in akuoi mogoḷat kon naa, yo akuoi in diábí mokaan kon onu bo onu inta oḷudonmu. Táe aka iko bo umuran doman moibog mogoḷud, yo oḷudon intua mobaḻí kuruban payongon, bo posumbadon kon i Tuhan.” Diápabí kinotaauan i Manoah kon inta noyosingogneamai tua in malaekatbí i Tuhan. Dá sia in noguman, “Aka natua, dá potaaupa in tangoi i Tuang, sinbá aka mobaḻídon in onu inta ain pinoguman i Tuang tatua, yo motaau in kami mopomulia kon i Tuang.”

¹⁸ Malaekat tatua noḻibó, “Nongonu sin moibogbí in iko monotaau kon tangoiku? Tangoiku tua in mokoherangbí.”

¹⁹ Dá ki Manoah nogamádon kon bembé batánea tobatú bo gandum topiḻik, bo inukatnea kon tudu in batu bo pinosumbanea kon i Tuhan, kon i Tuhan inta nomia kon onu mita inta mokoherang.

^20-21 Kon dodai in tuḷú tatua nodokot monik nongkon mezbah tatua, ki Manoah bo ki buḷoinea nokoontong kon malaekat tatua noponik kon bonu in dokot in tuḷú tatua, nopobayá in ḷangit. Bain tua bo kinotaauan i Manoah kon malaekatbí i Tuhan intua; dá sia bo ki buḷoinea sinumungkudon bo nosumba. Diádon dodai in onda in mosia nokoontong kon malaekat tatua bui.

²² Bo ki Manoah in noguman kon i buḷoinea, “Matoidon in kita sin kita in nokoontongdon kon i Allah!”

²³ Ki buḷoinea notubag, “Aka ki Tuhan moibog moḻimod kon i naton, yo tantú doíbí in sia notarima kon kuruban inta pinosumba naton kon i-Nia tatua; Sia in diábí doman mopoontong in bayongan in naa kon i naton andeka mopotaau in bayongan inta ain pinoguman-Nea kon i naton.”

²⁴ Tongonumai nobuḷan noiduduimai ki buḷoi Manoah tatua nopononggadídon in adí ḷoḷaki bo sinangoiannea ki Simson in adí tatua. Adí tatua noitoidon bo binarakatan i Tuhan;

²⁵ bo naonda in sia kon pinononḷoḷaigan in suku Dan, inta noiukat kon sigad in Zora bo Eshtaol, Roho i Tuhan nomangkoidon nobogoi in ropot kon inia.