HAKIM MITA 11 - Alkitab Singog In Mongondow Masa In Tanaa

¹ Ki Yepta in tontara tobatú in motorindog bo mobarani. Sia in nogutun kon Gilead. Ki amánea in ki Gilead in tangoinea táe ki inánea in sundaḷ.

² Ki amánea in kogadí doman kon adí mita ḷoḷaki ibanea nongkon i buḷoinea inta sinonibuḷoinea. Naonda in adí mita tatua nongo itoidon, pinoguntundon monia in ki Yepta nongkon baḷoi amánea. Guman monia kon inia, “Iko in diábí mokouḻí kon tonsilai onuka nongkon i amá nami, sin iko nion in adíbí nongkon bobay ibanea.”

³ Tuamai in ki Yepta nonaḷámaidon kon i utatnea mita bo minayá nogutun kon butá in Tob. Kon tua topaanan in intau moraat dinumugang kon inia bo minayá in mosia nogagow.

⁴ Diá noonggot kon tua intau in Israel sinubu in intau in Amon.

⁵ Naonda intua nobaḻí, intau mita inta sinongguyanga kon Israel inta kon Gilead minayá bo nonongganut kon i Yepta nonaḷámaidon kon butá in Tob.

⁶ Mosia in noguman, “Kami in diádon mayá moḷawang kon intau in Amon.”

⁷ Táe ki Yepta in notubag, “Akuoi naa in kinodoíbí monimu ma? Moiko in nopoguntundon kon inakó nongkon baḷoi i amáku. Yo nongonubí sin tanaa in naonda in kino antugandon in roriga in moiko, yo mamangoibí kon inakó?”

⁸ Mosia notubag, “Kami naa in namangoi sin ibogon nami in ikodon in mobaḻí itoi kon bayongan intau in Gilead sin mayá monubu kon bangusa in Amon tanaaya domandon.”

⁹ Tubag i Yepta, “Aka moikobí in modia kon inakó mobui kon Gilead sin mayá monubu kon bangusa in Amon, bo pountung i Tuhan in kita, yo akuoidon in mobaḻí pongawasa kon i monimu komintan.”

¹⁰ Mosia in notubag, “Moibog in kami. Ki Tuhandon in nobaḻí sakusi.”

¹¹ Dá nobuatdon in ki Yepta noyotakin in intau mita inta sinongguyanga kon Gilead. Bo sia in binaḻídon in intau mita in Gilead pongawasa bo itoi. Bo kon tayowon i Tuhan kon Mizpa, ki Yepta nopoigum in tuntutannea mita kon intau mita in Gilead.

¹² Nopaḷut mako kon tua ki Yepta nopotabá in intau minayá kon i datu in Amon sin moguman nanaa, “Onu in taḷá nami nodapot in moiko in monububí kon butá nami?”

¹³ Ki datu in Amon notubag kon totabá mita tatua, “Naonda in umat in Israel namangoi nongkon Mesir, mosia in nogamá kon butá nami, pinangkoi kon Ongkag in Arnon nodapot kon Ongkag in Yabok bo Ongkag in Yordan. Yo tanaa in pobuidon intua takin dame.”

¹⁴ Bo ki Yepta in bui nopotabá kon intau mita minayá kon i datu in Amon

¹⁵ sin motubag nanaa, “Umat in Israel in diábí nogagow kon butá intau in Moab andeka butá intau in Amon.

¹⁶ Naonda in intau Israel nonaḷámai kon Mesir, mosia nopobayá ná Ḷuok in Akaba nongin padang gurun bodongka nodapot in Kades.

¹⁷ Onda intua mosia nopotabá in intau minayá kon i datu in Edom sin mopoigum bá ogoinea tumaḻib kon butánea. Táe diá inogoinea in mosia tumaḻib. Onda intua mosia in nopoigum doman natua kon i datu in Moab, táe diá doman inogoi i datu in Moab in mosia tumaḻib kon butánea. Tuamai umat in Israel nogutun kon Kades.

¹⁸ Onda intua mosia nongingguputdon kon bobayáan monia nongin padang gurun, tongá diábí sinumaḻib kon butá in Edom bo Moab, táe noḻibudon nodapot kon dotá in pomukaan kon Moab, kon ḷoḷan in Ongkag in Arnon. Mosia nononḷoḷaigan kon tua, táe diábí iḷumoḷan kon ongkag tatua, sin butá tatua in noituotdon kon butá in Moab.

¹⁹ Nopaḷut mako kon tua umat in Israel nopotabá in intau minayá kon i Sihon, datu in Amori kon Hesybon sin mopoigum sinbá ogoi mongin butá in Amori, sin mosia in mayádon kon butá monia tontaní.

²⁰ Táe diá inogoi i Sihon sin diá in sia mopirisaya kon mosia tua in tongábí tumaḻib. Sedang bo pinotabáneadon in tontara mita noposindog in tampat pososipunan kon Yahas bodongka nonubu kon Israel.

²¹ Táe ki Tuhan, Allah in Israel, nobogoi in kauntungan kon umat in Israel kon tungkuḷ in noparang takin i Sihon bo tontaranea mita. Bo nouḻídon in Israel in butá mita in intau in Amori inta nogutun kon butá tatua.

²² Butá in Amori tua in iḻitúan monia pinangkoi kon Arnon kon dotá in toḷatan, nodapot kon dotá in utuan kon Ongkag in Yabok, bo nongkon padang gurun kon dotá in pomukaan, nodapot kon Ongkag in Yordan kon dotá in toyopan.

²³ Dá ki Tuhan, Allah in Israel, Sia tuata inta nopoguntun kon intau mita in Amori popisí in kopontingan in umat i Tuhan.

²⁴ Bo degá iko in tanaa moibogdon bui mogamá? Butá inta inogoi i Kamos, dewamu tua, kon inimu in motaaubí umuran mobaḻí kapunyaan monimu. Tongá onu inta ain inogoi i Tuhan, Allah nami kon i nami, in umuranbí tahangon nami.

²⁵ Inanggapmu kon ikobí in mopia-pia in ki Balak adí i Zipor, datu in Moab? Ki Balak in diábí dodai in onda moḷawang ande momarang kon inami.

²⁶ Toḷu nogatut notaong in koonggotnea Israel nongawasa kon Hesybon bo Aroër takin ḻipú mita inta kon ḻibuneamai, bo bayongan in kotá mita inta kon bingkí in Ongkag in Arnon. Bo nongonu sin kon dodai intua diábí ginamámu bui?

²⁷ Diábí, kami in diábí kotaḷá kon inimu. Ikobí nion in kotaḷá sin ain nonubu kon inami. Ki Tuhanbí in hakim singgai in naa inta monantú kon pelekara kon sigad in bangusa in Israel bo bangusa in Amon.”

²⁸ Táe datu in Amon doí mopandungmai kon koyow i Yepta tatua.

²⁹ Onda intua Roho i Tuhan nongawasadon kon i Yepta. Dá minayádon in ki Yepta kon butá in Gilead bo Manasye onda intua nobui kon Mizpa kon Gilead. Nongkon tua nongingguputdon in sia kon bobayáannea nopobayá in butá in bangusa in Amon.

³⁰ Ki Yepta nodandi kon i Tuhan nanaa, “Aka ogoi i Tuhan in akuoi monaḷow kon intau in Amon,

³¹ bo mobui in akuoi takin mosaḷamat, dá ki inekabí in muna-munamai ḷumuai nongkon baḷoiku sin motomu kon inakó, yo posumbakudon in sia mobaḻí kuruban tubáan kon i Tuhan.”

³² Bo ki Yepta iḷumoḷan kon Ongkag in Yordan sin monubu kon intau in Amon, bo pinopountung i Tuhan in sia.

³³ Ki Yepta nonubu kon i monia inimibo-ibog nongkon Aroër nodapot kon butá kon diugmai in Minit – tua komintan in doyowa nopuḷú in kotá – bo nodapot in Abel-Keramim. Nobayong totok in intau in Amon in minatoi, dá sinaḷowdon in intau in Israel in mosia.

Adí mongodeaga i Yepta

³⁴ Naonda in ki Yepta nobui nongkon Mizpa, ki adínea mongodeaga namangoi nonontomu kon inia sindaḷan nomanari takin notobog kon rebana. Tongábí totobatú tua in ki adínea bobay.

³⁵ Naonda in inontong i Yepta in sia, noajardon totok in gina i Yepta dá sia nomisi-misídon kon ḷambungnea, poḷat noguman, “Kaasí adíku, morumbundon in dodobku! Nongonu sin mustibí iko in mokororiga totok kon ginaku? Akuoi ain nongibot kon i Tuhan, bo diá bidon intua motaauku inggamáan bui!”

³⁶ Bo guman in adí bobay tatua kon i Yepta, “Ki amá ain nongibot kon i Tuhan, bo inogoidon i Tuhan in ki Amá notuḻí kon aid moraat in intau mita in Amon, musung i Amá tua. Dá, onu inta ain pinodandi i Amá, mustibí aidan i amá.”

³⁷ “Tongá,” kain guman in adí bobay tatua bui, “tobatú in poigumonku: Ogoiaipa akuoi in wakutu doyowa nobuḷan modondaḷoi magí-mako kon buḷud takin yobayatku mita. Kon tua in akuoi mongombaḷdon kon kamangku naa, sin akuoi in matoidon kon dodai in akuoi diápa pobuḷoion.”

³⁸ Dá inogoi i Amánea in sia, bo inatodneadon in minayá. Mongodeaga tatua takin yobayatnea mita minayádon in buḷud sin mongoibú kon gina kon tua, sin sia in matoidon kon dodai in diápa pobuḷoion bo kogadí.

³⁹ Naonda in notompodon doyowa nobuḷan, minayádon bui in sia kon i amánea, bo inaidandon i amánea in onu inta ain pinodandinea kon i Tuhan. Dá minatoidon in mongodeaga tatua kon dodai in diápa kobuḷoi. Tuabí in pinomangkoian kon nongonu sin kon yuak in intau in Israel, biasamai

⁴⁰ adí mita mongodeaga mayá kon bonu in opat nosinggai pomuḷoi in taong sin mopongoibú in gina monanob kon i adí i Yepta kon Gilead.