HAKIM MITA 10 - Alkitab Singog In Mongondow Masa In Tanaa

Ki Tola

¹ Naonda in ki Abimelek minatoi, ki Tola ki adí i Pua, nobaḻí itoi sin mopoḷuat kon intau in Israel. Sia naa in ki ompu i Dodo nongkon suku i Isakhar. Sia in nogutun kon Samir kon buḷud in Epraim.

² Doyowa nopuḷú bo toḷu notaong in sia nobaḻí itoi kon yuak in umat Israel, onda intua minatoi in sia bo iḷobong kon Samir.

Ki Yair

³ Nopaḷut mako kon i Tola, ki Yairdon in nobaḻí itoi kon Israel doyowa nopuḷú bo doyowa notaong in koonggotnea. Ki Yair naa in nongkon Gilead.

⁴ Ki adínea ḷoḷaki toḷu nopuḷú in koantónea. Keledai monia totakoian in toḷu nopuḷú in kobayongnea bo toḷu doman nopuḷú in ḻipú monia kon butá in Gilead. Ḻipú mita tatua sinangoianpabí ḻipú mita i Yair.

⁵ Ki Yair in minatoi domandon, bo iḷobong kon Kamon.

Ki Yepta

⁶ Umat in Israel buidon nomia kon dosa kon i Tuhan. Mosia in diádon noindoimai kon i Tuhan bo doí domandon nosumba kon i Tuhan. Mosia in nosumbadon kon dewa mita i Baal bo Asytoret, bo dewa doman in bangusa in Siria, Sidon, Moab, Amon bo Pilistin.

⁷ Tuamai in sinumorú in ki Tuhan kon umat in Israel, dá pinomayá-Neadon mako in bangusa in Pilistin bo bangusa in Amon nongawasa kon i monia.

⁸ Mopuḷú bo waḷu notaong in bangusa doyowa tatua nopoyoyigamai kon bayongan intau in Israel inta nogutun kon Gilead, tuata in butá in intau Amori kon dotá in pomukan kon Ongkag in Yordan. Moraatdon totok in pinogogaid monia kon intau in Israel.

⁹ Intau in Amon nodapot in iḷumoḷan kon Ongkag in Yordan sin mayá monubu kon suku in Yohuda, Benyamin bo Epraim dá umat in Israel totokdon in mororiga.

¹⁰ Bo umat in Israel nokuanidon kon i Tuhan, kainia, “Kami aindon nogaid kon dosa kon ini-Mu, sin kami in diádon noindoimai kon ini-Mu, o Allah nami. Kami in nosumbadon kon dewa mita i Baal.”

^11-12 Ki Tuhan notubag, “Koḻipod in moiko sinonggata in bangusa Mesir, Amori, Amon, Pilistin, Sidon, Amalek bo bangusa in Maon. Bo kon tungkuḷ intua moiko nokuani nokituḷung kon i-Nakó, degá natua ma? Tungkuḷaika torop, mongo diá pinosaḷamat-Ku in moiko nongkon kawasa monia?

¹³ Umpaka natua, yo moiko in umuranpabí doman nonoḻikudmai kon i-Nakó, bo minayá nosumba kon dewa mita. Yo naa in doí bidon in Akuoi mopoḷuat kon i monimu.

¹⁴ Bayádon kon dewa mita inta piniḻí monimu tatua. Pokuanidon kon i monia! Bio-biódon mako bá mosiadon in motuḷung kon dodai in moiko mobiag mororiga.”

¹⁵ Táe umat in Israel noguman kon i Tuhan, “Kami naa in binaradosadon, Tuhan. Aidaidon onu kabí in koibog-Mu aidan, asaḷ bo Iko Tuhan moibogpa motuḷung kon inami singgai in naa.”

¹⁶ Onda intua mosia noḷumbúdon kon bayongan patong berhala, bo nosumbadon bui kon i Allah. Dá inagíandon in tabi in ki Allah nokoontong kon i monia kon bonu in roriga.

¹⁷ Kon dodai intua tontara in Amon nosadiadon sin mayá moparang. Mosia in nononḷoḷaigan kon Gilead.

¹⁸ Kon tua in rayat bo itoi mita nongkon suku mita in Israel nosiḻibóandon mongo oyúon in kon sigad monia tua in mobarani mayá moparang moḷawang kon bangusa in Amon. Aka oyúon in mobarani dá intau tatua in baḻíondon itoi kon bayongan in intau inta kon Gilead.