HABAKUK 3 - Alkitab Singog In Mongondow Masa In Tanaa

Sambayang i Habakuk

¹ Naa in sambayang i Nabi Habakuk:

² O Tuhan, dinongogkudon onu inta inaidan-Mu, dá moodom in korasaanku kon gina. Igumon mako aid moḷoben tatua in bui aidan-Mu bo poniata-Mu kon kinobiagan nami naa. Igumon mako kotabi-Mu in kami umpakabí mopatú in gina-Mu.

³ Iko in ki Allah Inta Totok in motusi namangoi nongkon Téman, Iko in namangoi nongkon buḷud in Paran. Ḷangit kinokoḷoban in koagung-Mu; butá nopuḻing in dodayow kon ini-Mu.

⁴ Iko in namangoi takin bayag motarang, nongkon ḻima-Mu ḷumuai in sindar nobayag, kon tuata in pinobunian-Mu kon kawasa-Mu.

⁵ Pinotabá-Mu in panyaki minayá inumuna kon ini-Mu bo popatoi in dumuduianmai kon tumi-Mu.

⁶ Aka Iko tumogon, moḷundan in butá; aka Iko mobobui, yo modoḻiok in bangusa mita. Buḷud mita inta mononoi in mobota-botak; tombuḷudpa mita inta mononoi in umompábí doman, kon tombuḷud mita tatuata Iko in mayá nongkon dungkuḷpabímai.

⁷ Inontongku in rayat in Kusyan inaputan in ondok, bo intau in Midian urot mako.

⁸ O Tuhan, popisí degá in dagat bo sinumorú in Iko? Ongkag mita degá in nokopopisí kon ini-Mu sinumorú? Sinakoian-Mu in goḷom naonda bo kabaḷo bo kereta in parang, kon dodai in umat-Mu pinountung-Mu.

⁹ Puḷu in piot-Mu in sinadia-Mudon, piot-Mu aindon sinadia popopiot. Bo butá in binotak-Mu nobaḻí ongkag mita.

¹⁰ Nokoontongmai kon ini-Mu, buḷud mita in nodandú nongkon ḷangit noḷabú in uyan naonda bo pinopobutak. Tubig kon ḻimonag in butá moboḷontung in singognea, bokoḷnea in molitodanmai bo monomburá.

¹¹ Sindar in piotnea mita moḻikat totok, ginubat-Mu mopouḻi-uḻinag, dá nogogaidon in mata in singgai bo buḷan kon tampatnea.

¹² Takin torú Iko in noḻibu kon butá; bangusa mita iruntai-Mu takin yaat in gina.

¹³ Iko in minayá inumuna sin mopoḷuat kon umat-Mu bo moposaḷamat kon datu inta piniḻí-Mu. Binout-Mu nodapot in noḷabú in itoi in intau moraat, nodait-Mu iyompat in bayongan dumoduduinea.

¹⁴ Piot-Mu mita noiḷambai kon itoi in tontara in musung kon tungkuḷ in tontaranea namangoi ná koropot in deḷang, sinbá kami in porariton. Mosia in kinumosing takin ḷunganga in gina naonda bo intau inta umado-adop mondorot kon intau inta bogá.

¹⁵ Takin kabaḷo-Mu iritakan-Mu in baḷangon bo dagat inta nobudó in nonomburá.

¹⁶ Nokodongogmai kon tua, inagían in ondok in akuoi bo bibigku in motondodaḷó. Akuoi in nobaḻí noḻemé diádon in ropot, sioḷku in noipintud, kon ondaka in bayáanku. Oḷatonkubí takin gina moodom in hukuman i Allah kon mononubu.

¹⁷ Umpaka pangkoi in ara diá in bungainea bo pangkoi in anggur diá in anggurnea, umpaka bungai in zaitun diá in notuoi bo bungai in gandum kon gobá mokokudai kon gina, umpakabí domba mita minatoidon komintan bo kobang in bobiagon diá in bonunea,

¹⁸ ginaku in umuranbí moḷunganga, sin Iko in ki Tuhan mopoposaḷamatku.

¹⁹ Iko in nobogoi in ropot kon inakó naonda bo sioḷ in rusa, sioḷku in iniyotonan-Mu. Kinapit-Mu in akuoi sinbá moodom kon dodai in minayá kon buḷud.