GALATIA 5 - Alkitab Singog In Mongondow Masa In Tanaa

Tantú ḷukadai in kabebasanmu

¹ Tanaa kita totu-totuudon nobebas, sin ki Kristus tontaní in nopobebas kon i naton! Tuamai tantúdon ḷukadai in kabebasanmu, bo donaai in moibog bui tonggataan.

² Pokotorop in naa, akuoi, ki Paulus in moguman kon i monimu: Aka moiko bo mokisunat, yo tua in mangaḻenea, ki Kristus in diádon baraguna kon i monimu.

³ Komintanpa doman in akuoi mobogoi in tompoingat kon intau mita inta moramuji mokisunat, sia in musti mopobayá in bayongan inta pinais kon hukum i Musa!

⁴ Aka moiko bo moramuji dumudui kon hukum i Musa sinbá posaḷamaton, yo tua in mangaḻenea hubungan monimu takin i Kristus in nobontowdon. Bo aka natua yo moiko in nobiag bidon kon ḷuai in totabi i Allah.

⁵ Táe aka kon i nami, kami in tongábí moharap mako kon totabi i Allah sin pinodoyon kon pirisaya kon i Kristus, ki Allahbí in mobogoi in kasampatan mobiag moyodame bui takin-Nea.

⁶ Sin aka kita bo ain notobatú takin i Kristus Yesus, yo soaḷ sunaton ande diá sunaton, diábí mobaḻí soaḷ kon i naton. Sin totok moponting in pirisayabí kon i Kristus bo tua in moniata kon tabi naton kon tumpaḷa intau.

⁷ Koḻipod moiko in mosiḷawangan in mogaid kon inta mopia. Yo nongonu sin masai naa moiko in doí bidon dumudui kon onu inta kinoibog i Allah? Ki ine in nopongaru kon i monimu?

⁸ Nopasti bidon kon deemanbí ki Allah inta nogoiní kon i monimu in nogaid kon soaḷ natua!

⁹ Nanaa kain singog in intau, “Ragi topiḻik nokokutad kon bayongan topong inta pomiaan kukis.”

¹⁰ Umpakabí natua táe akuoi in mopirisayabí kon moiko in diápabí tongá mopomaké in raian monimu tontaní, sin kita ain notobatú takin i Kristus. Bo moyakinbí in akuoi kon ki inekabí in intau inta mopotombauk in raian monimu nion, toko hukumonbí i Allah.

¹¹ Bo aka soaḷ akuoi utat mita, nongonubí sin umuranbí saturuon monimu in akuoi aka moguman kon atorang in sunat tua in diábí moponting? Aka akuoi mopotaau in natua, dá onu inta pinotaauku soaḷ kayu pinoyotaḻempang i Kristus, diá bidon mokopomuká kon bobayowan.

¹² Mopiadon totok aka intau mita inta umuran mopotombauk in raian monimu nion, baḷúdon ḷumuai nongkon jamaat!

¹³ Utat mita! Moiko aindon inoiní mobaḻí intau inta nobebas. Táe donaaibí pakéon in kabebasanmu tatua saḷaku kasampatan mogaid kon onukadon in koibog monimu aidan. Táe popobaragunabí in kasampatan tatua motuḷung kon intau táe musti podoyon kon tabi kon tumpaḷa intau.

¹⁴ Bayongan in hukum in agama sinipun kon tobatú parenta tanaa, “Kotabibí in tumpaḷa intau ná kototabimu kon awakmu tontaní.”

¹⁵ Táe aka moiko bo moibog mosi kamburungan ande mosi ḻimodan, yo kopopia sin dikabo moiko in tumpaḷa moyoyang.

Mobiag podudui kon ibog in intau ande podudui kon ibog i Allah

¹⁶ Nanaabí in makusudku: Kobiagdon in moiko podudui kon ibog in Roho i Allah, donaaibí moibog mobiag podudui ibog in intau.

¹⁷ Sin onu inta kinoibog in intau noyoposibí in kinoibog i Allah, andeka nanaa, inta kinoibog i Allah in noyoposibí inta kinoibog in intau naa, tuamai in moiko diá motaau in mogaid kon onu inta koibog monimu.

¹⁸ Táe aka moiko bo moibog kapiton in Roho i Allah, yo moiko in diá bidon mobiag kon bonu in kawasa in hukum i Musa.

¹⁹ Ibog in awak naa ontongon bidon kon oaid mita inta diá mopia, bo moraat bo inta diá doman patus aidan in intau.

²⁰ Mosia in moibog mosumba kon ilah mita ibanea, mongonggaing, moibog mosisaturuan, moibog moropatoi, mointoi kon intau ibanea, ḷagi tumorú, bo tongá morai kon kopontingan tontaní, momoguyaat kon jamaat; bo moibog mopoyoposi kon inta,

²¹ diá mosanang in gina aka mokoontong kon intau ibanea noiḻiu kon batangan, umuran monginum kon inta mokoḷoḷangu, moibo-ibog in rame bo noyagi-yagipa doman in koibog monia. Kon bayongan oaid natua, buikupa doman tongginaan in moiko, ná koḻipod kon tantú mokopoingat, sin intau mita inta nogaid kon soaḷ mita natua diábí mobaḻí umat i Allah.

²² Tongá intau mita inta kinawasa in Roho i Allah, yo nanaabí in aidan monimu: Oyúon totabian, umuran mosanang in gina bo moonow in gina, oyúon kasabaran, mopia in gina, umuran mopia kon tumpaḷa intau, motoindudui,

²³ moompá in dodia, bo mokotahang kon gina. Diábí in hukum agama in molarang kon oaid mita natua.

²⁴ Ki ine inta ain nobaḻí kapunyaan i Kristus Yesus, yo mosia tua ain doman noḷumbú kon tabiat in intau bo bayongan ibog in dunia naa.

²⁵ Aka roho i Allah bo nobogoidon in kobiagan nobagu kon i naton, yo pomayádon mako, sinbá sia in mongawasa kon kobiagan naton.

²⁶ Bo donaaibí in kita kumaḷakuang, mosi posakian kon gina, bo mosi intoian.