GALATIA 4 - Alkitab Singog In Mongondow Masa In Tanaa

^1-2 Nanaa in makusudnea: kon wakutu in adí inta sinantú mogogabat kon kapunyaan in guyanganea nointokpa, sia in nápabí onda bo ata, umpakabí sia tua in kitogi in bayongan yagi-yagi inta sinaḷáan in guyanganea. Sia in umuranpabí ḷukadan mako in intau ibanea modapot in momangartidon in sia andeka bain motompod umurnea inta ain sinantú.

³ Natua doman in kita, kon dodai in diápa moguyang in pirisaya, yo kita in mobaḻípabí ata in Ibilis mita kon dunia naa.

⁴ Táe naonda in motompodon in wakutunea, potabádon i Allah in ki Adí-Nea mamangoi in dunia naa. Ki Adí-Nea tatua in pinononggadí in tobatú bobay inta nobiagpa kon bonu in kawasa in hukum i Musa.

⁵ Sia naa in pinotabá sin mobogoi in kabebasan kon intau mita inta umuranpa nobiag kon bonu in kawasa in hukum i Musa; sinbá kita in mobaḻí ki adí mita i Allah.

⁶ Moiko nion in ki adí mita i Allah, dá pinotabá-Neadon in Roho i Adí-Nea mamangoi kon i naton inta tantú mokuani; Amá, o Amáku.

⁷ Bo moiko in deeman bidon ata, táe nobaḻí bidon adí, dá ki Allah in mobogoibí kon i monimu in bayongan yagi-yagi inta ain sinadia-Nea kon i adí-Nea mita.

Ḻia-ḻiaw in gina i Paulus kon intau mita in Galatia

⁸ Tungkuḷ intua moiko in diápa nonotaau kon i Allah, tuamai moiko in nobaḻí ata in kawasa mita inta inanggap monimu ki allah, táe sabanarnea in deemanbí ki Allah.

⁹ Tongá masa in tanaa, moiko aindon nopirisaya kon i Allah, ande singogon mako mopoḷok, ki Allah ain nonotaau kon i monimu. Táe nongonu sin moiko in buipabí mosumba kon dimukud mita inta moraat tatua?

¹⁰ Moiko in tantúpa moḷukad mako kon singgai mita, ande buḷan mita bo taong inta ain sinantú monimu.

¹¹ Moḻia-ḻiawbí totok in ginaku kon i monimu, dika bo onu inta ain iramujiku kon i monimu mobaḻí diá in baragunanea.

¹² Utatku mita! Poigumonku kon i monimu sinbá moiko in moibog mobaḻí ná akuoi. Sin akuoi ain domandon nobaḻí ná moiko. Bo kinotaauanku in moiko in diápabí kon dodai onda in nogaid kon inta diá mopia kon inakó.

¹³ Tantú kotoropanpabí monimu nongonu sin akuoi in namangoibí nopoyaput in Habar Mopia kon i monimu tungkuḷ intua. Tua in lantaranbí akuoi notakit.

¹⁴ Bo wakutu intua moiko in diá morongó in mamangoimai kon inakó, umpakabí kaadaan awakku tungkuḷ intua nobaḻí totungkuḷ kon i monimu. Nodapotbí in sinarima monimu in akuoi naonda bo notarima kon tobatú malaekat i Allah, sedang noiḻiupa doman kon tua, sinarima monimu in akuoi naonda bo notarimadon kon i Yesus Kristus.

¹⁵ Mosanang totok in moiko tungkuḷ intua, yo tanaa ondadon in pia in gina monimu tatua? Kinotaauanku bidon in kopopia in gina monimu, sin motaaukubí poguman kon tungkuḷ intua moiko in mokobaḻíbí monguil kon batoḷ in mata monimu bo ogoi kon inakó, aka paraḷuonku doman intua.

¹⁶ Yo degá saturuondon monimu in akuoi tanaa mako sin moguman kon totuu kon i monimu?

¹⁷ Intau mita ibanea moramuji totok motayak kon i monimu, táe diábí mopia in makusud monia. Mosia tua in tongábí moibog momontow kon hubungan monimu takin inami, sinbá moiko in moibogdon dumudui kon i monia.

¹⁸ Memang mopiabí aka intau morajing mogaid kon inta mopia, asaḷ bo umuran natua bo donaai tongá aka akuoi in kon yua-yuak monimu.

¹⁹ Uḻe adíku mita inta kinotabiku! Tanaa akuoi in bui notakit sin umuran morai kon i monimu. Takitku naa in naonda bo takit in monononggadí. Moajar totok in porasaanku, aka sipat mita i Kristus bo diápa noitonop kon bonu in gina monimu!

²⁰ Akuoi in moibogdon totok moyodungkuḷ monimu in tanaa mako, sinbá akuoi in motaaudon moyosingog moyogintayowan mako, sin diádon kotaauanku mongo onupa in aidanku moindoimai kon oaid monimu naníon!

Ki Hagar bo ki Sara saḷaku contoh

²¹ Utatku mita inta moibog nobiag kon bonu in kawasa in hukum i Musa, indongogaipa in akuoi! Pogumankudon kon i monimu onu inta sabanarnea pinais kon bonu in hukum i Musa.

²² Kon tua ain pinais kon ki Abraham in kogadí kon doyowa: Inta tobatú nouḻínea kon i atanea, yo tobatú in nouḻínea kon i ibuḷoinea.

²³ Adí inta nongkon bobay ki atanea, oyúon sin pinodoyon kon ibog in intau naa. Táe aka adí inta nongkon i buḷoinea, oyúon sin pinodoyon kon dandi i Allah.

²⁴ Ouman tanaa in mobaḻí oḻinow naton. Bobay doyowa tatua in ná bí onda bo dodandian i Allah doyowa: tobatú in nongkon Buḷud in Sinai tua inta adí kon i Hagar; ki adínea inta pinononggadí saḷaku ata.

²⁵ Dá ki Hagarbí tua in sinangoian Buḷud in Sinai kon butá in Arab. Sia in naonda bo Yerusalem tanaa mako, inta nobiagdon ata.

²⁶ Táe Yerusalem inta kon soroga tuata in Yerusalem inta nobebas, bo siabí tua in ki iná naton.

²⁷ Sin kon Buk Motusi in pinaisdon nanaa, “Koḷungangadon in ginamu bobay bantó, inta diá kon dodai in onda in nononggadí! Kosanangdon bo kopia-piadon in ginamu uḻe iko inta diá kon dodai in onda nokorasa kon roriga in monononggadí! Sin bobay inta sinaḷáan i buḷoinea in mokouḻíbí kon mobayo-bayong in adí nongkon bobay inta nobiag takin i buḷoinea.”

²⁸ Utatku mita! Moiko nion in naonda bo ki Ishak inta pinononggadí pinodoyon kon dandi i Allah.

²⁹ Kon wakutu intua adí inta pinononggadí podudui kon ibog in intau, nomogutú kon adí inta pinononggadí podudui in ibog i Allah, dá natua doman in tanaa mako.

³⁰ Táe tarukirabí inta pinais kon Buk Motusi, nanaa: “Poguntundon in bobay ata tanion takin ki adínea, sin adí inta nongkon bobay ata tatua in diábí motaau mogogabat kon kapunyaan moyotakin in adí inta nongkon bobay nobebas tua.”

³¹ Dá pogumanku utat mita, kita naa in deemanbí ki adí in bobay ata tatua, táe ki adíbí in bobay inta nobebas.