GALATIA 3 - Alkitab Singog In Mongondow Masa In Tanaa

Pinosaḷamat sin pinodoyon kon pirisaya

¹ Utat mita intau in Galatia! Moiko nion in totuudon mobodok! Ki ine degá in nopongaru kon i monimu? Eta kinoḻiongandon monimu inta pinogumanku kon tayowonmai monimu. Akuoi in noguman kon ki Kristus aindon pinopopakú kon kayu pinoyotaḻempang!

² Oyúonpa in ḻibóonku kon i monimu: Degá moiko nion in notarima kon Roho i Allah sin dinumudui kon hukum i Musa, andeka nokodongogdon in moiko kon Habar Mopia nongkon i Allah bodongka nopirisayadon kon i Kristus?

³ Nongonu sin nobodokbí natua in moiko? Kobobiag monimu ain pinangkoi monimu kon bonu in Roho i Allah, yo nongonu sin moiko moibogpabí mopongata in ropot monimu tontaní in motayak kon kobiagan mopia?

⁴ Degá iraimai monimu yo diábí in mangaḻe in bayongan inta ain kinorasaan monimu tua? Diábí kumaan kon akaḷ aka diá in baragunanea!

⁵ Ki Allah ain nobogoi in Roho-Nea kon i monimu bo ain nogaid kon soaḷ mita inta mokoherang kon sigad monimu. Yo degá inaidan i Allah intua sin moiko in dinumudui kon hukum i Musa? Andeka moiko in nokidongog kon Habar Mopia tatua bo nopirisaya kon i Kristus?

⁶ Natua doman in oaid i Abraham – wakutu in “sia nopirisaya kon i Allah. Popisí in pirisayanea tatua dá sinarima i Allah in sia nobaḻí intau inta mokosanang kon gina-Nea.”

⁷ Yo bá kotaauan monimu kon intau inta totu-totuu mopirisaya kon i Allah, yo mosia tua in buí i Abraham.

⁸ Bo kon Buk Motusi aindon pinais muna kon ki Allah in moposaḷamatbí kon intau mita inta deeman Yahudi, sin pirisaya monia kon i-Nia. Habar Mopia tatua aindon pinotaau muna kon i Abraham, tua inta mangaḻe in singog tanaa, “Barakat i Allah kon bayongan intau kon dunia naa in moponag mongin inimu.”

⁹ Dá mosia inta mopirisaya, barakatan moyotakin i Abraham, intau inta totok in mopirisaya tua.

¹⁰ Sin intau inta nobiag bo tantú dinumudui kon hukum i Musa, komintanbí nobiag kon bonu in kutukan. Sin kon Buk Motusi ain pinais, “Intau inta diá mosatia in dumudui kon bayongan inta ain pinais kon buk in hukum i Musa, yo kutukon i Allah!”

¹¹ Bo bá kotaauandon monimu in naa, diábí tobatúmai intau in posaḷamaton sin sia ain dinumudui kon hukum i Musa. Tanaa mita ain pinais kon Buk Motusi, “Tongábí intau inta mopirisaya kon i Allah in motaau moyodame i Allah!”

¹² Táe hukum i Musa in diábí pinodoyon kon pirisaya. Sin kon Buk Motusi ain pinais, intau inta dinumudui kon hukum i Musa, mobiag sin hukum tatua.

¹³ Táe ki Kristus ain nomilat kon i naton nongkon kutukan in hukum i Musa tatua. Sia nopomayádon mako in awak-Nea tontaní kinutuk sinbá kita in mopilat kon kutukan. Sin kon Buk Motusi ain pinais, “Kinutukdon in intau inta minatoi binambé kon kayu pinoyotaḻempang.”

¹⁴ Tua komintan inaidan i Kristus Yesus sinbá barakat inta pinodandi i Allah kon i Abraham ogoi doman kon intau mita inta deeman Yahudi. Natua in pinogogaid-Nea, sahingga kita inta mopirisaya kon i Allah, motaau motarima kon Roho inta pinodandi i Allah.

Hukum i Musa andeka dandi i Allah

¹⁵ Utat mita! Tanaa akuoi in momaké in contoh, inta nobaḻímai kon i naton pomuḷoi mako. Aka intau bo ain nogaid kon dodandian bo dodandian tatua aindon nosah, dá diá bidon tobatúmai in kon sigad monia tua in motaau monginggamá andeka modugang kon dodandian tatua.

¹⁶ Ki Allah ain nobogoi in dandi-Nea mita kon i Abraham bo kon buínea mita. Kon dodandian tatua diábí in pinoguman nanaa, “bo kon intau mita inta buí i Abraham”. inta aka tomangaḻean yo moantó in intau. Nanaabí in pinais, “bo kon intau inta buí i Abraham”. mangaḻenea in tongábí tobatú in intau, tuata in ki Kristus.

¹⁷ Makusudku nanaa: Dandi i Allah aindon inaidan bo aindon muna pinosah. Tuamai hukum i Musa inta inogoi kon taong 430 noiduduimai, diábí motaau monginggamá kon tua andeka momopat kon dandi i Allah tatua.

¹⁸ Sin aka onu inta ain sinantú i Allah ginamá nongkon hukum i Musa dá tua in deemanbí pinogintompod kon onu inta ain pinodandi. Tongá lantaran ki Allah ain nodandi kon i Abraham dá inogoi-Neabí intua komintan kon inia.

¹⁹ Dá aka natua yo onu in mangaḻe pinobogoian kon hukum i Musa? Nanaabí, hukum tatua pinodugang sinbá kotaauan oaid inta noitaḷá, nodapot kon buí inta pinodandi moiangoidon. Hukum i Musa tatua pinogumanbí in malaekat mita kon intau mita.

²⁰ Tuamai mustibí oyúon in posibotak bain tua bo baraguna in intau mononigad. Táe ki Allah in diábí nomaké in mononigad, Siabí tontaní in namangoi.

Kobobaraguna in hukum agama

²¹ Aka natua yo noyoposi degá in hukum i Musa bo dandi i Allah? Tantú diábí! Sin aka kuma hukum i Musa mobogoi in kobiagan kon intau, dá intau in motaaubí moyodame i Allah bo inta dumodudui kon hukum i Musa tatua.

²² Tongá kon bonu in Buk Motusi pinaisdon kon bayongan intau kinawasadon in aid diá mopia. Tuamai totabi inta pinodandi bo inta pinodoyon kon pirisaya kon i Yesus Kristus inogoi kon i monia inta mopirisaya.

²³ Wakutu in kita diápa mopirisaya kon i Kristus kita in umuranpabí nokadai kon hukum i Musa; kita naonda bo kinurung modapot in pirisaya naton tatua pinoniata.

²⁴ Dá hukum i Musa in nobaḻí moḷoḷukad kon i naton modapot in ki Kristus namangoi, sinbá kita in posaḷamaton i Allah sin kita in nopirisaya kon i Kristus.

²⁵ Tanaa mako wakutuneadon in intau mopirisaya kon i Kristus, dá kita in diá bidon iḷukadan mako in hukum i Musa.

²⁶ Moiko bo ain nopirisaya kon i Yesus Kristus, dá moiko ain notobatú takin-Nea; sahingga in moiko nobaḻídon ki adí mita i Allah.

²⁷ Moiko komintan aindon binaptis pinodoyon kon tangoi i Kristus, dá sipat mita i Kristus oyúon bidon kon i monimu.

²⁸ Tuamai intau in Yahudi andeka intau in Yunani, diá bidon in yoposinea bo diábí domandon in sinangoian ata andeka intau nobebas, ḷoḷaki andeka bobay. Moiko komintan ain bidon notobatú takin i Kristus Yesus.

²⁹ Bo aka moiko bo ain nobaḻí kapunyaan i Kristus, dá moiko in buíbí i Abraham, tuamai moiko in motarima kon onu inta pinodandi i Allah.