GALATIA 2 - Alkitab Singog In Mongondow Masa In Tanaa

Ki Paulus kon sigad in rasul mita

¹ Naonda in mopuḷúdon bo opat notaong kon tua, akuoi in bui minayá in Yerusalem takin i Barnabas, bo i Titus.

² Akuoi in minayá in Yerusalem sin ki Allahbí in nopotabá. Bo kon tobatú pinoyodungkuḷan takin itoi mita kon tua, akuoi noginsilang kon Habar Mopia inta pinoyaputku kon intau mita inta deeman Yahudi. Sin doíbí in akuoi aka usahaku koḻipod bo masa in tanaa, tongá mobaḻí diá baraguna.

³ Ki Titus inta noyotakinku tua intau in Yunani táe diábí in sia pinoki sunatku ná kon atorang in agama Yahudi,

⁴ umpakabí oyúon intau in totok momakisa kon inia. Mosia tua in intau mita inta umuran kumapog kon i naton bo mongaku kon mosia in ki utat naton. Mosia tua in umuni-uni mako monarukira kon onukabí in aidan naton saḷaku intau inta ain notobatú takin i Kristus Yesus. Ibogon monia in kita mobui kon kaadaan naton koḻipod saḷaku ki ata monia,

⁵ táe topiḻikmai diábí in kami umundok kon i monia, sin ibogon nami Habar Mopia tatua in tantúbí moitutui bo moitonop mako kon gina monimu.

⁶ Bo soaḷ mosia inta inanggap in intau mita mongoponting – tua in diábí mobaḻí soaḷ kon inakó, sin aka kon inakó yo diábí in yoposi intau, intau moḷoben ande intau moyangkó, sin ki Allah in diábí momiḻí kon intau.

⁷ Nodapotbí, ináku bidon in intau mita inta nobaḻí itoi, kon ki Allahbí in nobogoi in oaidan kon inakó sinbá akuoi in mayá mopoyaput in Habar Mopia kon intau mita inta deeman Yahudi, naonda bo ki Allah inta nopotabá kon i Petrus minayá nopohabar in Habar Mopia kon yua-yuak in intau Yahudi.

⁸ Sin ki Allah inta nobogoi kon i Petrus in ropot bá mobaḻí rasul kon sigad in intau mita Yahudi, Siabí doman tua inta nobogoi in ropot kon inakó sinbá mobaḻí rasul kon yua-yuak in intau deeman Yahudi.

⁹ Bo naonda in nokoontong kon totabi inta inogoi i Allah kon i nakó, dá ki Yakobus, ki Petrus, bo ki Yohanes inta nobaḻídon itoi kon jamaat, nopirisayadon kon ki Allahbí in nobogoi oaidan tanaa kon inakó. Sahingga in nodati in mosia kon i naminda i Barnabas saḷaku tanda yoyobayatan. Bo nosatuju bidon in kami kon kami in mayá mopohabar in Habar Mopia kon yua-yuak in intau mita inta deeman Yahudi, bo mosia in mayá kon sigad in intau mita in Yahudi.

¹⁰ Tongá topasaḷ in pinoigum monia kon i nami, musti tarukiraan in intau mita bogá. Bo memang tuabí doman inta kinoibo-ibogku aidan.

Ki Paulus nonogur kon i Petrus

¹¹ Wakutu in ki Petrus namangoi in Antiokhia, taran-tarangandon sinoboḷowku in sia, sin noitaḷádon in oaidnea.

¹² Sin muna-munamai in sia nongaan noyotakin in intau mita inta diá sinunat. Táe naonda in noiangoidon intau mita inta pinotabá i Yakobus, sia in iyumayúdon kon utat mita inta diá sinunat bo doí domandon nongaan noyotakin monia, sin sia moondok kon intau mita inta nomakisa sinbá bayongan intau musti sunaton.

¹³ Intau mita in Yahudi ibanea dinumudui domandon kon aid i Petrus natua, sahingga in ki Barnabas noidudui doman kon aid monia natua.

¹⁴ Bo naonda inontongku in oaid monia inta diá noyokaan in onu inta sinundú kon Habar Mopia i Tuhan, dá akuoi in noguman nanaa kon i Petrus kon tayowon intau moantó inta kon tua, “Aka kobobiagmu uḻe saḷaku intau in Yahudi, naonda bo kobobiag in intau inta deeman Yahudi, yo nongonu sin iko in momakisabí kon intau ibanea sinbá mobiag naonda bo kobobiag in intau Yahudi?”

Intau Yahudi bo deeman, tumpaḷa posaḷamaton sin mopirisaya kon i Kristus

¹⁵ Aka podudui in buí, yo kami naa intaubí in Yahudi bo deemanbí “intau deeman Yahudi inta binaradosa”.

¹⁶ Umpaka natua yo kinotaauanbí nami kon diábí in tobatúmai intau in posaḷamaton i Allah sin dinumudui kon hukum i Musa. Táe intau posaḷamatonbí sin pirisaya kon i Yesus Kristus. Tuamai kami tontaní in nopirisayadon kon i Yesus Kristus, sinbá kami in posaḷamaton doman, deemanbí posaḷamaton sin dinumudui kon onu inta kon hukum i Musa.

¹⁷ Táe aka kami inta umuran moramuji mobiag moyodame i Allah bo motobatú i Kristus. Táe kino kadapatan doman in nogaid kon inta diá noitutui, ná aid in “intau mita baradosa” bo ná doman intau mita deeman Yahudi, yo motaau degá in singogon kon ki Kristusbí in nokopopisí sahingga in nogaid in kami kon inta noitaḷá? Tantú diábí motaau!

¹⁸ Sin aka akuoi bo moramujibí bui moposindog kon onu inta ain irumbunku, yo tua in mangaḻenea kon akuoi in aindon nobaḻí intau inta nomaḷawang kon hukum i Musa.

¹⁹ Sin akuoi ain minatoi kon hukum in Musa tatua – sin kopontingan in hukum tatua – sinbá akuoi in mobiagdon motoindudui kon i Allah. Akuoi aindon pinopopakú kon kayu pinoyotaḻempang takin i Kristus.

²⁰ Tongá akuoi in nobiag, táe deeman bidon akuoi, sin ki Kristus bidon in naa kon awakku. Bo kobobiagku tanaa mako in kobobiag bidon inta pinodoyon kon pirisayaku kon i Adí i Allah inta notabi kon inakó, bo inta ain noposarakan in awak-Nea tontaní sin kopontinganku.

²¹ Diábí sinolakku in totabi i Allah. Sin aka kuma bo oyúon in kasaḷamatan aka dumudui kon hukum in agama, yo diá bidon mangaḻe in kinopatoian i Kristus!