GALATIA 1 - Alkitab Singog In Mongondow Masa In Tanaa

^1-3 Utatku mita jamaat i Allah inta kon Galatia. Akuoi ki Paulus takin bayongan utat naton intau Keresten inta koyota-yotakinku, moharap mako sinbá ki Allah, ki Amá naton bo ki Tuhan Yesus Kristus in umuran mako mobogoi in barakat bo totabi kon i monimu komintan. Akuoi naa in nobaḻí rasul deemanbí ibog in intau andeka intau in nopobaḻí kon inakó, táe ki Yesus Kristusbí bo ki Allah inta ki Amá naton, inta nomiag doman bui kon i-Nia nongkon sigad in intau minatoi.

⁴ Ki Kristus in dinumudui kon koibog i Allah, ki Amá naton, sahingga in Sia noposarakan in awak-Nea tontaní nobaḻí kuruban potobut kon taḷá mita naton, sinbá kita in posaḷamaton nongkon kaadaan masai naa inta diádon mopia naa.

⁵ Dinayo-dayowdon in ki Allah nodapot in koyoyangan dunia naa! Amin.

Tongábí tobatú in Habar Mopia

⁶ Akuoi in moherangbí totok kon i monimu utat mita! Moiko nion inoiní i Allah tongábí pinodoyon kon tabi i Yesus Kristus, táe nongonubí sin moiko in noḻikatbí totok in nonoḻikud kon i-Nia bo minayá nokidongog poḷat dinumudui kon habar inta kai monia in “habar mopia” doman, bokaka deemanbí nongkon i Allah.

⁷ Sabanarnea diábí in “habar mopia ibanea mako”. Tongá oyúon in intau namangoi mopotombauk in pirisaya monimu. Makusud monia tua in mopoyotaḷá in “habar mopia” i Kristus.

⁸ Táe intau inta nopoyaput in kai monia “habar mopia” inta noyoposi in Habar Mopia inta pinoyaput nami tua in igumonku mako bá hukumon i Allah in sia, kami kabí tontaní andeka malaekat nongkon soroga!

⁹ Ná inta ain pinoguman nami koḻipod, bo tanaa komintanpa doman in pogumanku: Aka oyúon intau in mamangoi mopoyaput in “habar mopia” táe noyoposi in Habar Mopia inta aindon pinoyaput nami kon i monimu, yo igumonku mako in hukumon i Allah in sia tua!

¹⁰ Yo naonda degá in naa: Motayak degá in akuoi kon inta mokosanang kon gina in intau andeka inta mokosanang kon gina i Allah? Andeka ontongon monimu degá akuoi in mokopopia kon intau, sinbá kosanang in intau? Aka natua in oaidku, yo akuoi naa in deemanbí bobantung i Kristus.

Kinobobaḻí i Paulus rasul

¹¹ Moiko uḻe utatku mita musti monotaau kon Habar Mopia inta pinoyaputku kon i monimu tua in deemanbí nongkon intau.

¹² Sin tua in deemanbí inogoi in intau kon inakó, bo deemanbí doman intau in notundú kon inakó, táe tua in nouḻíku sin ki Yesusbí tontaní in nobogoi kon inakó.

¹³ Kinodongogan bidon monimu in kobobiagku koḻipod wakutu in akuoi agamapa Yahudi. Wakutu intua diábí in tabiku in momogutú kon jamaat mita i Allah, totokbí in ramujionku putúan in mosia.

¹⁴ Bo aka tongá mopobayá in parenta in agama Yahudi, yo noiḻiubí in akuoi kon intau mita in Yahudi inta topobiagku. Bo akuoi in totok doman moḷukad kon adat in mogoguyang nami.

¹⁵ Tongá pinodoyonbí kon tabi i Allah, sahingga in piniḻí-Nea in akuoi kon tungkuḷ in kon bonupa in sian i ináku. Inoiní-Nea in akuoi sin mogaid kon oaidan-Nea.

¹⁶ Pinoontong-Nea kon i nakó in ki Adí-Nea sinbá Habar Mopia soaḷ ki Adí-Nea bayáanku poyaputon kon intau mita inta deeman Yahudi. Bo wakutu intua akuoi in diábí minayá kon i ineka sin noigum kon tonggina.

¹⁷ Ná doman tua, akuoi in diábí minayá in Yerusalem bo notayak kon i monia inta munadon nobaḻí rasul. Táe akuoi in minayábí in butá Arab, bain nongkon tua bo akuoi in minayá bui in Damsyik.

¹⁸ Bo toḷu notaong noiduduimai, akuoi minayá in Yerusalem sin mokipodungkuḷ kon i Petrus. Akuoi in nogutun takinnea mopuḷú boḻima nosinggai.

¹⁹ Tongá akuoi in diábí noyodungkuḷ in rasul mita ibanea koḻikudbí in ki Yakobus, ki utat i Tuhan Yesus.

²⁰ Kon tayowon i Allah, pogumankudon kon i monimu, kon onu in pinaisku kon i monimu naa in totuubí, deemanbí tongá uboḷ!

²¹ Noiduduimai kon tua akuoi in minaya-mayá mako in ḻipú mita inta kon Siria bo Kilikia.

²² Táe wakutu intua jamaat mita inta kon Yudea, diápabí nonotaau kon inakó, sin diápa inontong monia.

²³ Mosia in tongábí nokodongog kon guman in intau, “Kon siabí tua inta koḻipod nomogutú kon i monia, táe tanaa mako sia nopoyaput in kaparcayaan inta koḻipod ḷongasionnea totok inggamáan.”

²⁴ Dá mosia totokdon in nodayow kon i Allah sin akuoi in nopirisaya domandon kon tua.