EZRA 9 - Alkitab Singog In Mongondow Masa In Tanaa

Dinongog i Ezra kon oyúon in intau Yahudi notonibuḷoi in intau deeman Yahudi

¹ Naonda intua komintan nodaitdon inaidan, tongonumai in intau inta sinon itoi kon bangusa in Israel namangoi kon inakó. Mosia in nopotaau kon inakó kon rayat in Israel, noitakin doman in imang mita, bo intau mita in Lewi in diábí sinumondí kon bangusa mita inta nogutun kon diugmai tua, inta bangusa in Amon, Moab, Mesir, Kanaan, Het, Peris, Yebus bo Amori. Nodapotbí in imang mita bo intau mita in Lewi sinumakin doman nomia kon natua. Mosia komintan in nogaidon kon aid mita inta mokorongó inta inaidan in bangusa mita tatua.

² Intau ḷoḷaki in Yahudi notonibuḷoidon in bobay in bangusa ibanea, dá umat inta sinondídon kon i Tuhan in diádon notapis. Nodapotbí inta muna-munamai nomia kon natua in intaubí mita inta sinon itoi bo pojabat in Israel.

³ Nokodongogmai kon tua, norobonoḷ in ginaku dá binerakku in ḷambungku bo norabut kon buok dapot in kumiku, bodongka iḻimitú takin gina inta morobonoḷ totok.

⁴ Tantú in akuoi iḻimitú mako natua nodapot in wakutu pobogoian in sosumba kuruban ḷoḷabungnea. Bo namangoidon in intau mita iḻimibu kon inakó. Mosia inangoian in ondok nokodongog kon gogondok i Tuhan popisí in dosa in intau mita inta ain nobui nongkon pinoḷumbúan tatua.

⁵ Naonda in kuruban ḷoḷabungnea nomangkoidon pinosumba, sinimindogdon in akuoi nongkon iḻitúanku koina bo takin ḷambung inta noberak, sinumungkud in akuoi bo nopotonggó in ḻimaku kon i Tuhan Allahku.

⁶ Akuoi in noguman, “Oo Allahku, akuoi naa in mooyá in dumungá kon tayowon-Mu. Dosa nami in moyo-moyoguntuḷdon kon tudu in uḷu nami noidapotdon in ḷangit.

⁷ Pinangkoipa kon mogoguyang nami nodapot in masa in naa, kami in umat-Mu inta binaradosa kon ini-Mu. Tuamai in kami, datu mita bo imang mita nami in sinaḷowdon in datu mita in bangusa ibanea. Kami in iḻimod, pinogagowan bo dinia nobaḻí intau inta dinakop. Kami in totokdon in siningkuḻe, ná doman kaadaan singgai in naa.

⁸ Táe tanaa, o Tuhan Allah nami, Iko in bagubí nonotabi kon inami. Pinoḷuat-Mu in tongonumai in intau nongkon sigad nami nongkon pinononggataan sinbá mobiag motompia kon tampat inta sinondí tanaa. Inogoian-Mudon in kami in kobiagan mobagu.

⁹ Kon tungkuḷ in kami kon pinononggataanpa, diábí sinaḷáan-Mu in kami. Binaḻí-Mu in kami kinotabi in datu mita in Persia bo pinomayá mako in nobiag bo noposindog bui in Baḷoi-Mu inta dongkadon rumbunnea tua. Iḷukadan-Mu in kami in kon naa, kon Yohuda bo kon Yerusalem.

¹⁰ Táe tanaa, o Tuhan Allah, naonda in bayongan inta nobaḻí tatua, onu in motaau nami singogon? Kami in buidon nonaḷámai kon parenta-Mu mita,

¹¹ inta inogoi-Mu kon inami pinongin nabi, mogogundoi-Mu mita. Mosia in nopotaau kon inami kon butá inta bain pogutunan nami in diá nodarit popisí in bayongan intau inta nogutun kon tua nongkon popod tobatú nodapot in popod ibanea in nogaidon kon inta mokotor bo inta moraat.

¹² Nabi mita tatua in nogimaḷow kon inami sinbá diá motonibuḷoi in intau mita tatua, andeka mobantung kon i monia sinbá mobiag mooyúon bo motompia. Aka kami in motoindudui, kami in mobaḻídon moropot bo mokaandon kon bungai in pinomuḷa kon butá tatua bo mobogoi kon buí nami modapot in mononoi.

¹³ Kami in binaradosadon bo iḻimimpatdon kon hukum-Mu, bo Iko in nohukumdon kon inami. Táe kinotaauanbí nami, o Allah nami, kon hukuman inta inogoi-Mu tua in diábí ná kobogat in inta musti tarimaan nami, nodapotbí in kami in pinosaḷamat-Mupabí.

¹⁴ Dá, naondabí kon kami in musti monaḷámai bui kon parenta-Mu mita bo bui motonibuḷoi moyotakin in intau mita inta moraat tatua? Aka aidan nami intua, yo notantú bidon kon totokdon in tumorú in Iko dá rimumudon-Mudon in kami komintan diádon tobatúmai in bióon-Mu mako mobiag.

¹⁵ Tuhan, Allah in Israel Iko in moadil, umpaka natua pinomayá-Mubí mako in kami in nobiag. Kami in mongaku kon taḷá nami kon ini-Mu; diádon in kami mokobaḻí in tumayow kon ini-Mu.”