EZRA 6 - Alkitab Singog In Mongondow Masa In Tanaa

Parenta i Kores nouḻí kon bonu in pototagúan kon surat mita

¹ Noiduduimai kon tua podudui in parenta i Datu Darius, sinarididon kon bonu in pinotagúan kon surat kon dodatuan inta sinagú kon Babel.

² Táe pinomaisan kon tua in deemanbí nouḻí kon Babel, táe kon kotábí in Ahmeta kon butá in Media. Pais tatua in pinais kon tobatú ḻitodan bo nanaa in singognea,

³ “Kon taong imitánea kon pinomarentaan i Datu Kores, sia in nopoḷuai in parenta sinbá Baḷoi Tuhan kon Yerusalem posindogondon bui mobaḻí tampat in intau modia kon sosumba bo motubá kon kuruban. Koḷantud in Baḷoi tatua in mustibí 27 nometer bo kooḷadnea in musti doman 27 nometer.

⁴ Dindingnea mita in musti pomiaan nanaa: kon tudu in pomuḷoi in toḷu nogaip in batu musti popoaip doman in kayu togaip. Bain doit in dodatuan in poguboḻi kon tua mita.

⁵ Bo pakakat doman mita in buḷawan bo saḷaka inta pinaké kon Baḷoi Tuhan bo inta ain ginamá nongkon Yerusalem i Datu Nebukadnezar bo dinia pinobayá in Babel, musti pobuion kon tampatnea inta muna.”

Ki Darius nomarenta sinbá mongingguput kon oaidan

⁶ Onda intua ki Darius nokidia in tubag nanaa, “Kon i Tatnai, gubernur in propinsi in Eprat Toyopan, bo kon i Syetar-Boznai, bo pojabat mita kon Eprat Toyopan. Dika monuyayow kon intau mita in Yahudi tatua,

⁷ bo dika moḷamboi kon pogaidan monia kon Baḷoi pooibadaan monia. Pomayádon mako in ki gubernur in Yohuda bo itoi mita in Yahudi in moposindog bui in Baḷoi tatua.

⁸ Poyotakinon in naa akuoi momarenta kon i Utat mita mobantung kon i monia mogaid kon oaidan monia tatua takin aid nanaa: Bayongan in boḻi in oaidan poposindogan bui in Baḷoi tatua musti gamáan nongkon pajak in negara kon propinsi in Eprat Toyopan bo musti uboḻian kon intau mita tatua takin diábí baḷú-baḷuian in wakutunea.

⁹ Koḻikud intua onukabí in paraḷuon podudui inta pinoguman in imang mita kon Yerusalem, ná umpamanea sapi koḷakian inta noguodpa, domba koḷakian bo ki adí in domba sin pakéon kuruban posumba kon i Allah inta nongawasa kon soroga, gandum doman, simuton, anggur bo ḷana zaitun, musti ogoi kon i monia pomuḷoi in singgai diábí in taḻiban.

¹⁰ Aidai intua komintan sinbá mosia in motaau moposumba in kuruban inta mokosanang kon i Allah inta nongawasa kon soroga, bo bá mosia in mopoigum in barakat kon inakó bo kon i adíku mita ḷoḷaki.

¹¹ Akuoi in momarenta sinbá intau inta ḻimimpat kon parenta tanaa yo nongkon baḷoinea in rabuton in oigi tobatú, tonggoruitan in popodnea, bo popoturak kon awak in intau tatua modapot in moiḷambai. Baḷoinea in musti kokaion bo baḻíon yoyatan.

¹² Igumon mako ki Allah inta ain nomiḻí kon Yerusalem mobaḻí tampat pososumbaan kon i-Nia, moyopú kon batúan datu andeka bangusa inta mokobaḻí ḻimimpat kon parenta tanaa bo monungkuḷ morimumud kon Baḷoi Tuhan kon Yerusalem tatua. Akuoi, ki Darius, ain nobogoi in parenta tanaa. Aidai kopiaan totok.”

Baḷoi Tuhan sinoguḷapatan

¹³ Parenta i Datu Darius tatua in inaidan kinotaridi totok i Tatnai, gubernur in Eprat Toyopan, bo i Syetar-Boznai bo totakin mita monia.

¹⁴ Binantungan i Nabi Hagai bo i Zakharia, itoi mita in Yahudi nongingguput kon pinogaidan kon Baḷoi Tuhan tatua. Mosia in ḷagi noginḷapat kon Baḷoi tatua podudui in parenta i Allah Israel bo i Kores, i Darius bo i Artahsasta, datu mita in Persia tatua.

¹⁵ Baḷoi Tuhan tatua in noḷapat kon singgai intoḷunea kon buḷan Adar kon taong inggonomnea kon pinomarentaan i Datu Darius.

¹⁶ Onda intua takin pia in gina intau mita in Israel, imang mita, intau mita in Lewi bo bayongan intau inta nobui nongkon pinoḷumbúan in nokopoḷapat kon Baḷoi Tuhan tatua.

¹⁷ Kon pinonoguḷapatan tatua mosia in noposumba kon i Tuhan in sapi koḷakian 100, domba koḷakian 200 bo ki adí in domba 400. Bo inta pinaké kon kuruban pinongampungan kon dosa, pinosumba in mopuḷú bo doyowa in bembé koḷakian, bembé tobatú in kon batúan in suku Israel.

¹⁸ Bo inta pinaké kon pinogundoian kon bonu in Baḷoi Tuhan mosia in nopoyotondí kon imang mita bo intau mita in Lewi podudui in atorang inta pinais kon bonu in buk i Musa.

Pinoramean kon Paska

¹⁹ Kon singgai impuḷú bo opat buḷan imitánea kon taong noiduduimai, intau mita inta ain nobui nongkon pinoḷumbúan, nomia kon rame in Paska.

²⁰ Bayongan in imang bo intau mita in Lewi ain nogaid kon upacara pinondaritan kon awak dá inanggapdon nodarit. Noiduduimai kon tua intau mita in Lewi tatua in noratá kon biag mita inta pakéon kon kuruban Paska kon imang mita, kon i monia tontaní bo kon bayongan intau mita inta nongkon pinoḷumbúan.

²¹ Kuruban mita tatua in kinaan in bayongan in intau Israel inta nobuidon nongkon pinoḷumbúan bo in intau mita inta nogutun kon tua inta ain nonaḷámai kon kobobiag monia inta binaradosa bo namangoi sin mosumba kon i Tuhan, Allah in Israel.

²² Pitu nosinggai in koonggotnea in mosia takin sanang in gina norame kon Singgai moḷoben in Roti diá Iragian. Mosanang totok in gina monia sin ki Tuhan ain nopobaḻí kon i datu in Asyur mopia in gina kon i monia dá notuḷungdon kon i monia kon oaidan noposindog bui in Baḷoi Tuhan, Allah in Israel.