EZRA 10 - Alkitab Singog In Mongondow Masa In Tanaa

Tomayá i Ezra mopogogai in tonibuḷoi natua

¹ Koyogot in ki Ezra nosambayang koomba-ombaḷ bo nongaku kon dosa kon tayowon in Baḷoi Tuhan, nobayong totok in intau in Israel in namangoi noyosipun, pinomayá ḷoḷaki andeka bobay bo adí mita. Mosia in iḻimibu kon inia poḷat doman nongombaḷ inimibo-ibogbí.

² Onda intua ki Sekhanya ki adí i Yehiel nongkon inanakan i Elam, noguman kon i Ezra, “Kami in binaradosadon kon i Tuhan popisí in nononibuḷoidon kon bangusa ibanea. Umpaka natua táe oyúonpabí in kamang kon Israel.

³ Koḻigai in kita mongibot kon i Allah, kon kita in mopoguntunbí kon bayongan in bobay tatua takin adí mita monia. Kami in dumuduibí kon bayongan in tongginamu bo tonggina in intau mita ibanea inta nohoromat kon parenta i Allah. Kami in dumuduibí kon hukum i Allah.

⁴ Ikobí in musti mopobayá. Kami in totu-totuubí mobantung kon inimu. Aidaidon intua komintan dapot in moḷapat.”

⁵ Dá nomangkoidon nopobayá in oaidannea in ki Ezra. Pinotabánea in imang mita tongguḷu, intau mita in Lewi bo intau mita in Israel ibanea in nongibot kon mosia in mopobayábí in onu inta pinoigum i Sekhanya tatua.

⁶ Naonda in mosia nongibot, minayá in ki Ezra nongkon tayowon in Baḷoi Tuhan bo sinumuot kon bonu in tampat pinogutunan i Yohanan ki adí i Elyasib bo nosiug kon tua. Sia in doíbí nongaan andeka nonginum popisí in norobonoḷ totok in ginanea in noraimai kon oaid in intau mita inta iḷumbú tatua.

⁷ Onda intua pinotaau-taaudon mako in tobatú parenta kon sinangkup in Yerusalem bo Yohuda kon bayongan in intau inta ain nobui nongkon pinoḷumbúan, sinbá moyosipun kon Yerusalem.

⁸ Ki ine in diá mamangoi kon bonu in toḷu nosinggai, daiton gamáan in bayongan kapunyaannea bo sia in diá bidon inanggap agat in intau in Israel. Parenta tatua in sinekeng in itoi mita in rayat.

⁹ Naonda in toḷudon nosinggai, kon singgai in doyowa nopuḷú buḷan in siownea, bayongan intau ḷoḷaki inta nogutun kon butá in Yohuda bo Benyamin in namangoi in Yerusalem bo noyosipun kon bosí in Baḷoi Tuhan. Kon dodai intua nonguyan norogot totok. Bayongan in intau nongourotdon popisí in motumping totok bo popisí doman in moponting totok in pinoyodungkuḷan tatua.

¹⁰ Onda intua ki Ezra in sinimindog bo nosingog kon i monia. Sia in noguman, “Moiko in binaradosadon bo nodugangdon kon taḷá in Israel popisí in nononibuḷoidon kon bobay mita in bangusa ibanea.

¹¹ Tuamai, akudon in dosamu kon i Tuhan, Allah inta sinumba in mogoguyang naton, bo aidaidon onu inta mokosanang kon gina-Nea. Pokoyayúdon kon intau ibanea inta nogutun butá naton bo untundon in ki buḷoimu mita inta nongkon bangusa ibanea tatua.”

¹² Intau mita tatua in notubag noropot, “Duduianbí nami in tongginamu.”

¹³ Bo mosia in noguman bui, “Táe inta namangoi in naa in nobayong totok bo uyan in morogot doman totok. Diábí in kami mokotahang in simindog kon ḷuai nanaa. Apa doman pelekara tanaa in diábí kotoimpaḷutan kon bonu in tosinggai andeka doyowa nosinggai, sin nobayongbí totok in kami in noiḷautdon nogaid kon dosa tanaa.

¹⁴ Ogoidon in itoi nami in mogutun kon Yerusalem bo mogimpaḷut kon soaḷ tatua. Bo kon batúan in intau kon kotá mita nami, inta kobuḷoi nongkon bobay in bangusa ibanea, in mustibí mamangoi podudui in wakutu inta ain sinantú, moyotakin in itoi mita bo hakim mita in kotánea-kotánea. Tua in aidan sinbá ki Tuhan Allah in diádon tumorú bui kon i naton popisí in pelekara tatua.”

¹⁵ Diábí tobatúmai in intau in nopoyaput in simbayow kon tomayá tatua, koḻikudbí in ki Yonatan ki adí i Asael bo ki Yahzeya ki adí i Tikwa, sinongod in intau in Lewi taya dua, inta ki Mesulam bo ki Sabetai.

¹⁶ Intau mita iḷumbú inta ain nobui tatua in umuranbí mopobayá in tomayá tatua, tuamai in ki Imang Ezra in nomiḻí kon tongonumai in intau kon sigad in tongguḷu mita in inanakan, bo nomais kon tangoi monia. Kon singgai imitánea buḷan impuḷúnea mosia in nomangkoidon nosidang sin monaridi kon pelekara tatua.

¹⁷ Kon bonu in toḷu nobuḷan noiduduimai nopaḷutdon monia pinirikisa in bayongan in ḷoḷaki inta ain nononibuḷoi kon bobay mita nongkon bangusa ibanea.

Intau mita inta nobuḷoi kon bangusa ibanea

¹⁸ Naa in tangoi in intau mita inta kobuḷoi kon bobay nongkon bangusa ibanea: Imang mita, pinais takin inanakannea: Inanakan i Yesua takin ki utatnea mita, ki adí mita i Yozadak: ki Maaseya, ki Eleazer, ki Yarib bo ki Gedalya.

¹⁹ Mosia in nodandi kon monggaatbí kon i buḷoi monia, bo mosia in noposumba in domba koḷakian sin pokuruban kon pongampungan kon dosa monia.

²⁰ Inanakan i Imer: ki Hanani bo ki Zebaja.

²¹ Inanakan i Harim: ki Maaseya, ki Elia, ki Semaya, ki Yehiel bo ki Uzia.

²² Inanakan i Pasyhur: ki Elyoënai, ki Maaseya, ki Ismael, ki Netaneel, ki Yozabad, bo ki Elasa.

²³ Intau mita in Lewi: Ki Yozabad, ki Simei, ki Kelaya (dinonoi doman ki Kelita), ki Petahya, ki Yuda bo ki Eleazer.

²⁴ Mododondong mita: Ki Elyasib Moḷoḷukad mita kon bonawang in baḷoi Tuhan: Ki Salum, ki Telem bo ki Uri.

²⁵ Intau mita in Israel inta ibanea: Inanakan i Paros: ki Ramya, ki Yezia, ki Malkia, ki Miyamin, ki Eleazar, ki Malkia bo ki Benaya.

²⁶ Inanakan i Elam: ki Matanya, ki Zakharia, ki Yehiel, ki Abdi, ki Yeremot bo ki Elia.

²⁷ Inanakan i Zatu: ki Elyoënai, ki Elyasib, ki Matanya, ki Yeremot, ki Zabad bo ki Aziza.

²⁸ Inanakan i Bebai: ki Yohanan, ki Hananya, ki Zabai bo ki Atlai.

²⁹ Inanakan i Bani: ki Mesulam, ki Malukh, ki Adaya, ki Yasub, ki Seal bo ki Yeramot.

³⁰ Inanakan i Pahat-Moab: ki Adna, ki Kelal, ki Benaya, ki Maaseya, ki Matanya, ki Bezaleel, ki Binui bo ki Manasye.

^31-32 Inanakan i Harim: ki Eleazer, ki Yisia, ki Malkia, ki Semaya, ki Simeon, ki Benyamin, ki Malukh bo ki Semarya.

³³ Inanakan i Hasum: ki Matnai, ki Matata, ki Zabad, ki Elipelet, ki Yeremai, ki Manasye bo ki Simei.

^34-37 Inanakan i Bani: ki Maadai, ki Amram, ki Uel, ki Benaya, ki Bedeya, ki Keluhu, ki Wanya, ki Meremot, ki Elyasib, ki Matanya, ki Matnai, ki Yaasai.

^38-42 Inanakan i Binui: ki Simei, ki Selemya, ki Natan, ki Adaya, ki Makhnadbai, ki Sasai, ki Sarai, ki Azareel, ki Selemya, ki Semarya, ki Salum, ki Amarya bo ki Yusup.

⁴³ Inanakan i Nebo: Ki Yeiel, ki Matica, ki Zabad, ki Zebina, ki Yadai, ki Yoël bo ki Benaya.

⁴⁴ Intau mita tatua komintan nononibuḷoi kon bobay nongkon bangusa ibanea. Dá ki buḷoi mita monia tatua in ginaatdon bo inuntun noyotakin in adí mita monia.