EZRA 1 - Alkitab Singog In Mongondow Masa In Tanaa

Ki Kores nobogoi kon intau in Yahudi nobui kon butá monia

¹ Kon taong imitánea kon pinomarentaan i Kores, datu in Persia, Ki Tuhan nogaid kon onu inta ain siningog-Nea pinongin i Nabi Yeremia. Ki Tuhan in nopogonú kon gina i Kores sinbá mopoḷuaidon in parenta tobatú inta binaca kon sinangkup in dodatuan nea. Nanaa in tombonunea:

² “Naa in parenta i Kores, datu in Persia. Ki Tuhan, Allah inta nongawasa kon soroga ain nomaḻí kon inakó datu kon sinangkup in dunia, bo nopotabá kon inakó moposindog in baḷoi kon i-Nia kon Yerusalem kon butá in Yohuda.

³ Igumon mako ki Allah moḷukad kon i monimu komintan inta nobaḻí umat-Nea. Moiko in mustibí mobui kon Yerusalem bo moposindog bui in Baḷoi Tuhan, Allah in Israel, ki Allah inta nogutun kon Yerusalem.

⁴ Aka oyúon in umat-Nea tobatú kon pinoḷumbúan tanaa in moparaḷu kon totuḷung sinbá mokopobuipa, dá topodiugnea mita in mustibí mobogoi in totuḷung tatua. Mosia in mustibí mobogoi in saḷaka bo buḷawan, tongkaaḷ kon daḷan takin doman biag pododatogan, bo sosumba doman inta pakéon kon Baḷoi Tuhan kon Yerusalem.”

⁵ Noiduduimai kon tua tongguḷu mita in inanakan nongkon suku i Yohuda bo i Benyamin, imang mita bo intau mita in Lewi, bo kon batúan in intau inta pinopogonúan i Allah, nonouḷut sin mobui kon Yerusalem bo moposindog bui in Baḷoi Tuhan.

⁶ Bayongan in topodiug monia notuḷung doman kon i monia poḷat nobogoi in pakakat mita, ná pakakat mita saḷaka bo buḷawan, tongkaaḷ kon daḷan, biag pododatogan, kapunyaan ibanea bo sosumba mita inta ogoi kon Baḷoi Tuhan.

⁷ Ki Kores nopoḷuai in mangko mita bo galas mita inta paraḷu pakéon kon Baḷoi Tuhan kon Yerusalem. Pakakat mita tatua in inakutdon i Datu Nebukadnezar bo inukat kon bonu in kuil i dewanea mita tontaní.

⁸ Ki Kores in nokitoinut in pakakat mita tatua kon i Mitredat, tongguḷu in intau inta kitogi totaau in pakakat mita in dodatuan. Noiduduimai kon tua ki Mitredat nomais kon pakakat mita tatua bo pinoki ogoi kon i Sesbazar, gubernur in Yohuda.

^9-10 Naa inta pinais tua: mangko mita buḷawan pakéon kon upacara sosumba 30 mangko mita saḷaka inta pakéon kon upacara sosumba 1.000 mangko mita ibanea 29 mangko mita mointok nongkon buḷawan 30 mangko mita mointok nongkon saḷaka 410 pakakat mita ibanea 1.000

¹¹ Tua komintan kobayongnea in 5.400 in mangko buḷawan bo saḷaka takin pakakat mita ibanea. Bayongan tua in dinia i Sesbazar kon tungkuḷ in sia takin intau mita inta iḷumbú ibanea nobuat nongkon Babel minayá in Yerusalem.