ESTER 9 - Alkitab Singog In Mongondow Masa In Tanaa

Aid in intau Yahudi kon musung mita monia

¹ Imbuitnea noiyaputdon in singgai impuḷú botoḷúnea buḷan in Adar, singgai inta ain sinantú kon popoaidan in parenta i datu kon intau mita in Yahudi. Singgai tatua in inoḷa-oḷatdon mako in musung mita in bangusa Yahudi sin mongawasa kon bangusa tatua. Táe noniata magí yo intaubí in Yahudi in nonaḷow kon i monia.

² Kon batúan in kotá, intau mita in Yahudi noyosipun bo notobatú sin monayow kon intau mita inta nonomayá kon inta moraat kon i monia. Bangusa mita kon ondakabí nobaḻídon noondok kon i monia dá diádon in tobatúmai in mokobaḻí monayow kon i monia.

³ Nodapot in bayongan intau moḷoben in propinsi, gubernur mita, bupati bo pojabat mita in dodatuan motongod kon intau in Yahudi sin komintan moondok kon i Mordekhai.

⁴ Kon sinangkub in dodatuan, kinotaauan in intau mita kon ki Mordekhai tua in moḷobenbí totok in pongarunea kon komaḻig bo kodugang-kodugang domandon in kawasa nea.

⁵ Natuata in nobaḻí, bangusa in Yahudi in motaaubí in mogaid kon onu in koibog monia popoaid kon musung monia, mosia in monubu momaké in pitow bo poḷat moḻimod.

⁶ Kon Susan, ibukotá in Negara, intau in Yahudi in noḻimod kon ḻima nogatut in intau.

^7-10 Kon sigad monia tua in noitakin doman in ki adí mita i Haman taya mopuḷú ki adí i Hamedata, musung moḷoben intau in Yahudi. Naa in tangoi monia: ki Parsandata, ki Dalpon, ki Aspata, ki Porata, ki Adalya, ki Aridata, ki Parmasta, ki Arisai, ki Aridai bo ki Waizata. Táe intau in Yahudi in diábí nogagow.

¹¹ Kon singgai doman tatua pinotaau in intau kon i datu in kobayong in intau mita inta kinoḻimodan kon Susan.

¹² Guman i Tuang datu kon Ratu Ester, “Tongá kon Susan intau mita in Yahudi ain nokoḻimod kon 500 in intau, noitakin doman in ki adí i Haman taya mopuḷú. Apa doman kon propinsi mita! Diádon kinotaauanku mongo onu in inaidan monia! Dá, onupa doman in igumonmu in tanaa? Pogumandon, notantúbí kon tarimaanmubí!”

¹³ Ki Ester in notubag, “Aka mosanang in gina i Tuang, yo intau mita in Yahudi inta nogutun kon Susan naa ikoḷom doḷo-doḷom in buipa ogoi mogaid kon ná inta inaidan monia singgai in naa. Bo mayat mita i adí i Haman tua in popobambédon kon oigi pobobambéan mita.”

¹⁴ Bo ki datu in nobogoi in parenta mogaid kon onu inta pinoigum i Ester; surat parenta kon kotá in Susan pinoḷuaidon bo mayat i adí i Haman taya mopuḷú tua in binambé.

¹⁵ Dá kon singgai impuḷú bo opatnea kon buḷan in Adar, intau mita in Yahudi kon Susan in noyosipundon bui bo noḻimod kon 300 in intau kon kotá tatua. Bo tanaa in diábí doman in mosia nogagow.

¹⁶ Intau mita in Yahudi inta nogutun kon propinsi mita in noyosipundon bo moḷawang kon musung monia. Mosia in nonaḷow kon musungnea bo nokoḻimod kon 75.000 in intau inta moyaat in gina kon i monia. Táe mosia in diábí nogagow.

¹⁷ Tua in nobaḻí kon singgai impuḷú botoḷúnea kon buḷan in Adar. Singgai noiduduimai, kon singgai impuḷú boopatnea, mosia in diábí noḻimod kon tobatúmai in intau, táe noramebí kon singgai tatua takin ḷunganga in gina.

¹⁸ Táe intau in Yahudi inta kon Susan in nomia kon singgai ponanoban kon singgai impuḷú boḻimanea nobaḻí singgai moḷoben, sin mosia in noḻimodon kon musung kon singgai impuḷú botoḷúnea bo impuḷú boopatnea, bo nogogai kon singgai impuḷú boḻima.

¹⁹ Tuamai in intau Yahudi inta nogutun kon kotá mita mointok nomia kon tompoingat kon singgai impuḷú boopatnea kon buḷan Adar nobaḻí singgai inta nokoḷunganga, singgai poramean poḷat mosiogoian in tombuinag ná kokaanon mita.

Pinonanoban kon Singgai Moḷoben Purim

²⁰ Nopaḷut mako kon tua ki Mordekhai in nomais kon bayongan inta nobaḻí tatua bo nokidia in surat kon bayongan in intau Yahudi kon sinangkub in dodatuan Persia, pinomayá inta noyayú andeka inta nodiug.

²¹ Tombonu in surat tatua in parenta kon monanob kon singgai noginpuḷú boopat bo noginpuḷú boḻima kon buḷan Adar pomuḷoi in taong.

²² Sin kon singgai mita tatuata in mosia nonaḷow kon musung mita monia, dá robonoḷ bo nakit in gina monia nobaḷui pia bo sanang in gina. Tuamai mosia in mustibí momia kon ponanoban kon singgai mita tatua pongin bobutungan bo mongaan poḷat mosiogoian in kaanon bo mosilai kon totuḷung kon intau nobiag nobogá.

²³ Intau in Yahudi in dinumudui kon parenta i Mordekhai tua bo nobaḻídon adat in pinoramean tatua kon pomuḷoi in taong.

Tariangkum

²⁴ Ki Haman ki adí i Hamedata, buí i Agag, musung moḷoben in intau Yahudi, ain nopogonik in undi inta sinangoian doman “purim” sin monantú kon singgai poḻimodan kon intau in Yahudi; sia in nonomayádon kon momutú kon i monia.

²⁵ Táe ki Ester in minayá kon tayowon i datu, bo ki datu in nobogoi in parenta pinais inta nokopopisí kon tomayá moraat inta inaidan i Haman in bui noiuma kon inia tontaní, dá sia bo ki adínea mita in pinopobambé kon oigi pobobambéan.

²⁶ Tuamai in singgai mita moḷoben tatua in sinangoian Purim. Surat i Mordekhai bo bayongan inta ain kinoyitakan in intau Yahudi,

²⁷ nokopopisídon kon mosia in nogaid kon atorang tobatú kon i monia tontaní, kon buí monia bo kon bayongan in intau inta dumugang agat in intau in Yahudi. Podudui in atorang tatua pomuḷoi in taong mosia in mustibí momia kon rame in doyowa nosinggai inta ain sinantú i Mordekhai.

²⁸ Sinantú domandon kon singgai mita in Purim tatua in mobaḻídon singgai Moḷoben mononoi inta musti umuran toropon bo pomiaan kon ponanoban in batúan motoḷuadí in Yahudi kon bayongan in topobiag kon batúan in propinsi bo kon batúan in kotá.

²⁹ Koḻikud intua, pinoyotakin in surat i Mordekhai, ki Ratu Ester adí i Abihail in nomais kon surat nogindua, inta noginrigon kon tombonu in surat i Mordekhai soaḷ Purim tatua.

³⁰ Surat tatua in pinoki dia kon bayongan in intau in Yahudi, bo salinannea mita in pinoki dia kon 127 in propinsi in dodatuan Persia. Surat tatua in sinakinan in sambayang sinbá intau in Yahudi umuran mobiag motompia bo moaman.

³¹ Surat tatua in noguman doman sinbá mosia bo buí monia in mustibí monanob kon singgai mita in Purim podudui in singgainea, ná doman mosia monorop kon singgai mita popuasaan bo singgai mita ponogumatoian. Tuata in tombonu in surat i Mordekhai bo i Ratu Ester.

³² Parenta i Ester inta nonantú kon atorang mita in Purim, in pinais kon bonu in buk.