ESTER 8 - Alkitab Singog In Mongondow Masa In Tanaa

Bangusa in Yahudi pinoki tayowan in musungnea

¹ Kon singgai tatua ki Datu Ahasyweros nobogoi kon i Ratu Ester in bayongan kapunyaan i Haman, musung moḷoben in intau Yahudi tatua. Ki Ester in nopotaau kon i datu kon ki Mordekhai in ki adí in doyowa mogutatnea, dá pinangkoi kon dodai intua ki Mordekhai in inogoidon mamangoi kon tayowon i datu umpakabí diá oiníon muna.

² Ki datu in noḷongkut kon sisingnea inta ain ginamánea bui kon i Haman bo inogoinea kon i Mordekhai. Bo ki Ester in noduí kon i Mordekhai nobaḻí intau inta kitogi totaau kon kapunyaan i Haman.

³ Nopaḷut mako kon tua ki Ester bui namangoi kon tayowon i datu. Sinumungkud in sia takin koomba-ombaḷ bo nopoigum kon i datu monginggamá kon tomayá moraat inta inaidan i Haman kon intau in Yahudi.

⁴ Ki datu in nopotonggó in tungkud buḷawannea kon i Ester, dá sinimindogdon in ki Ester bo noguman,

⁵ “Aka mopiabí in gina i Tuang bo motabi kon bobantung naa, dá ki Tuang in mogaidon bui kon surat parenta sin ponginggamá kon surat mita i Haman inta tombonunea in parenta momutú kon bayongan in intau in Yahudi kon dodatuan tanaa.

⁶ Diábí mopia in ginaku in mokoontong kon bangusa bo ginaḷum motoḷuadíku in modait ḻimodon!”

⁷ Dá guman i Datu Ahasyweros kon i Bokí Ester bo kon i Mordekhai, “Totuu, ki Haman in binambékudon sin sia in moibog momutú kon intau in Yahudi, bo kapunyaannea in inogoikudon kon i Ester.

⁸ Táe surat inta ain pinais pinodoyon kon tangoi i datu bo cinapan in cap i datu, in diá bidon motaau inggamáan bui. Tongá, moiko in ogoikubí momais kon surat soaḷ bangusa in Yahudi, onukabí in inta inanggap monimu mopia. Paisdon in surat tatua podoyon kon tangoiku bo capai in cap in dodatuan.”

⁹ Kon singgaipa doman tatua, inta kon singgai in doyowa nopuḷú bo toḷúnea, buḷan intoḷunea, buḷan Siwan, ki Mordekhai in nogoiní kon momais mita i datu bo nomarenta kon i monia nomais kon surat mita kon gubernur mita, kon bupati mita bo kon intau mita moḷoben inta kon 127 in propinsi, pinangkoi kon India noidapot in Sudan. Surat mita tatua in pinais kon bonu in singog bo pais in batúan propinsi mita tatua. Sia in nokidia doman in surat kon intau mita in Yahudi inta pinais kon bonu in singog bo pais in Yahudi.

¹⁰ Surat mita tatua in sinekeng i Mordekhai pinodoyon kon tangoi i Datu Ahasyweros bo cinapan in cap in dodatuan. Bo ki Mordekhai in nopotabá in totabá mita mogatod kon surat mita tatua kon propinsi mita kon dodatuan takin sinumakoi kon kabaḷo mita i datu inta mongoḻikat.

¹¹ Surat mita tatua in noguman kon ki datu in nobogoi kon intau in Yahudi kon batúan in kotá sin motobatú bo moḷawang kon musung. Aka mosia bo tubuon in intau mita takin momaké in pakakat in parang nongkon bangusa bo propinsi in ondakabí, yo motaaubí in mosia moḷawang bo moḻimod kon intau mita inta monubu tatua takin ki buḷoi bo ki adínea mita; motaaubí in mosia moyopú kon musungnea mita modapot in modait bo poḷat mogagow kon kapunyaan in musungnea.

¹² Parenta tatua in mustibí aidan kon sinangkup in dodatuan Persia kon singgai inta ain sinantú i Haman kon moḻimod kon intau mita in Yahudi, kon singgai impuḷú botoḷúnea kon buḷan impuḷú bodoyowánea, buḷan in Adar.

¹³ Surat parenta tatua in mustibí poḷuaion nobaḻí undang-undang bo potaau kon bayongan in intau kon sinangkup in propinsi sinbá bangusa in Yahudi in mosadiadon moḷawang kon musungnea aka kon singgaineadon.

¹⁴ Dá nobuatdon in totabá mita tatua sinumakoi kon kabaḷo mita i datu. Kon Susan ibukotá in negara, binaca doman in parenta tatua.

¹⁵ Nopaḷut mako kon tua ki Mordekhai in nonaḷámaidon kon komaḻig takin nogiḷambung in ḷambung intau moḷoben inta nobidu bo nobudó, jubah nokamumu nongkon lenan moaḷus bo mahkota buḷawan inta mogaga totok. Intau kon kotá in Susan monggoḷakap mita sin noḷunganga in gina monia.

¹⁶ Intau in Yahudi nokorasa kon noiḻipoidon bo nosanang, moḷunganga bo moḷoben in gina.

¹⁷ Kon batúan in kotá bo propinsi, kon ondaka in pinobacaan kon surat parenta i datu, yo intau mita in Yahudi in mopiabí in gina, nongosanang in gina bo norame. Nodapot in nobayong in intau kon tua in sinumuotdon nobaḻí intau in Yahudi, popisí in mosia in noondok kon bangusa tatua.