ESTER 5 - Alkitab Singog In Mongondow Masa In Tanaa

Ki Ester nogoiní kon i datu bo kon i Haman kon bobutungannea

¹ Kon singgai intoḷunea kon pinopuasaannea, ki Ester in nogiḷambung in ḷambung bokí, bo minayá in palas kon bonu in komaḻig bo sinimindog kon tayowon in ngara in bobakidan. Ki Datu in ḻimitú mako kon ḷoḻitúannea sinumayow in ngara tatua.

² Naonda in sia nokoontong kon i Ratu Ester sinimindog kon ḷuai, notabi in sia bo pinotundúnea kon i Ester in tungkudnea buḷawan. Dá dinimiug in ki Ester, bo noḻiai kon popod in tungkud tatua.

³ Bo ki datu in noḻibó, “Nongonu uḻe, Buḷoiku? Onu in koibogmu? Pogumandon! Umpakabí tongo botak in dodatuan ku in igumonmu, yo ogoikubí doman.”

⁴ Ki Ester in notubag, “Aka mosanang in gina i Tuang, dá mamangoipa in doḷom naa in ki Tuang bo ki Haman kon bobutungan inta aidanku kon i Tuang.”

⁵ Pinotabá i datu in ki Haman ḷagi mamangoi, sinbá mosia in motaau mayá kon sonsoma i Ester. Dá namangoidon in mosia kon bobutungan inta inaidan i Ester tatua.

⁶ Kon dodai in nonginum kon anggur, ki datu in noḻibó, “Tanaa in pogumandon mongo onu in koibogmu. Onukabí in poigumonmu ogoikubí, umpakabí tongo botak in dodatuan ku!”

⁷ Ki Ester in notubag,

⁸ “Aka mosanangbí in gina i Tuang in mobogoi kon onu in poigumonku, yo buipa mamangoi in ki Tuang bo ki Haman kon bobutungan inta aidan in bobantung naa ikoḷom doḷom. Bain kon bobutungan tatua bo pogumanku onu in poigumon in bobantung naa kon i Tuang.”

Tomayá i Haman moḻimod kon i Mordekhai

⁹ Ki Haman in nobui nongkon bobutungan i Ratu Ester takin pia in gina. Táe naonda in kon bonawang in komaḻig inontongnea in ki Mordekhai inta diá sinimindog mohoromat kon inia, sinumorúdon totok in sia.

¹⁰ Tongá sinahangnea bo nobui kon baḷoinea. Noidapotmai kon tua nogoiní in sia kon totakinnea mita namangoi bo inoinínea doman in ki Zeres ki buḷoinea mamangoi ḻimitú doman moyotakin monia.

¹¹ Bo ki Haman in nongonguman kon ambungangaḷ kon i monia bo nopoontong in kaoyúonannea, kobayong in adínea ḷoḷaki, ḷoḻitúan pomomarentaan inta inogoi i datu, bo pangkatnea inta moḷantu-ḷantud nongkon bayongan in pogawai ibanea.

¹² Gumannea doman, “Nodapot in ki Ratu Ester tongábí nogoiní kon inaminda i datu kon bobutungan inta inaidannea kon inami, bo ikoḷom doḷom in buínea doman inoinínea in kami.

¹³ Táe tua komintan diábí in mangaḻenea, aka ontongonkupa doman in ki Mordekhai, intau in Yahudi tatua, ḻimitú kon tayowon in bonawang in komaḻig.”

¹⁴ Nokodongogmai kon tua ki buḷoinea bo bayongan in totakinnea noguman, “Pokiaidaidon in oigi pobambéan inta koḷantudnea in doyowa nopuḷú bodoyowá nometer. Bo mopoikoḷomai, doḷo-doḷom poigumdon kon i datu mobambé kon i Mordekhai kon oigi tatua. Dá motaaudon in iko mayá kon bobutungan tatua takin pia in gina.” Aka kon i Haman yo mopiabí totok in tosingogon tatua, tuamai in ḷagidon sia nokiaid in oigi pogantongan tatua.