ESTER 1 - Alkitab Singog In Mongondow Masa In Tanaa

Bokí Wasti noḷawang kon parenta i Datu Ahasyweros

^1-2 Kon Susan, ibukotá in Persia, ki Ahasyweros in nomarenta saḷaku datu. Dodatuan nea in 127 nopropinsi, pinangkoi kon India nodapot kon Sudan.

³ Kon taong intoḷunea kon pinomarentaannea, ki Datu Ahasyweros nomia kon rame moḷoben kon bayongan in intau moḷoben bo pogawainea. Tongguḷu mita totokan in tontara in Persia bo Media in namangoi doman kon rame tatua, natua doman in gubernur mita bo intau mita moḷoben kon propinsi.

⁴ Onom nobuḷan in koonggotnea ki datu nopoontong in kaoyúonan in komaḻignea bo kogogaga in dodatuan nea.

⁵ Nopaḷut mako kon tua pinomiaan i datu in rayat kon Susan in rame bui, pinomayá mosia inta nobiag nooyúon andeka inta nobogá. Rame tatua in todiminggu in koonggotnea bo inaidan kon taman kon komaḻig in datu.

⁶ Palas in komaḻig iḷambáan in toipoi nongkon kaeng lenan nobidu bo nobudó, sinogot in tontogot lenan moaḷus bo pinopogaboḷ kon ḻingkit mita saḷaka inta pinopoḷutud kon oigi mita marmar. Kon ḻimonagnea inukatan in bangko moḷanggó moompá inta nongkon buḷawan bo saḷaka kon tudu in taḷog inta iḷambáan in marmar nobudó, kristal nopura, kuḻit in mutiara inta mopouḻi-uḻinag bo batu pirus nobidu.

⁷ Ki datu in noposadia in anggur inta mobarong totok inta binonu kon seré mita buḷawan inta noyagi-yagimai.

⁸ Mokokiangoi mita in diábí tombobotan in anggurnea andeka pakisaan monginum. Ki datu in nomarenta bidon kon bobantung in komaḻig, sinbá pomuḷoi in tamu bantungan podudui in koibog monia kon batúan.

⁹ Kon dodai intua ki Wasti, ki buḷoi datu, in nomia doman kon rame kon bobay mita kon bonu in komaḻig.

¹⁰ Kon singgai impitunea, ki datu in nonginum nodapot in nosanangdon totok in ginanea. Tuamai in nogoiní in sia kon intaunea pitu inta nobaḻí bobantungnea tontaní; mosia tua in ki Mehunam, ki Bizta, ki Harbona, ki Bigta, ki Abagta, ki Zetar, bo ki Karkas.

¹¹ Pinotabánea in mosia modia mangoi kon i Bokí Wasti poḷat mogisapoyo in sapoyo in dodatuan. Ki bokí tatua in moḷunat totok, bo moibog in ki datu mopoontong in koḷunatnea kon intau mita moḷoben bo bayongan in mokokiangoinea.

¹² Táe naonda in bobantung mita tatua nopotaau in parenta i datu kon i Bokí Wasti, ki bokí in doíbí namangoi, dá sinumorúdon totok in ki datu.

¹³ Oyúon in kabiasaan i datu kon mopoigum in tosingogon kon intau mita inta mopandoi totok in hukum kon soaḷ hukum bo adat. Tuamai in inoinínea in mononongginanea inta nonotaau mongo onu in musti pomiaan kon pelekara ná tatua.

¹⁴ Naa in monononggina mita inta mokakit oiníon i datu: ki Karsena, ki Setar, ki Admata, ki Tarsis, ki Meres, ki Marsena, bo ki Memukan. Mosia tua in intau mita moḷoben in Persia bo Media inta koḷoḻitúan moḷantud totok kon dodatuan.

¹⁵ Guman i datu kon i nayapitu tatua, “Akuoi in nopotabádon kon bobantungku mita minayá kon i Bokí Wasti sin mogoiní kon inia mamangoi kon inakó. Táe doíbí in sia. Podudui in hukum, onu in pomiaan naton kon inia?”

¹⁶ Dá ki Memukan in noguman kon i datu bo kon intau mita moḷoben, “Aidnea tatua, in deemanbí tongá ki datu in pinokopo oyámai i Ratu Wasti, táe bayonganbí doman pogawai i Tuang, nodapotbí doman in bayongan ḷoḷaki kon dodatuan tanaa!

¹⁷ Sin aid i bokí tatua in kotaauanbí in bayongan in bobay, bo mosia in diá bidon mopandung kon i buḷoi monia tontaní. Mosia in moguman kon ki Tuang in nomarentadon kon i Bokí Wasti sin mamangoi kon tayowonnea, táe doí in ki bokí namangoi.

¹⁸ Dá, aka ki buḷoi mita in intau mita moḷoben kon Persia bo kon Media in mokodongog kon tua, notantú bidon kon ḷagidon potaau monia kon i buḷoinea-buḷoinea. Bungainea kon tua, buḷoi bobay in moḷawangdon kon parenta i buḷoinea ḷoḷaki bo ki buḷoinea ḷoḷaki in tumorúdon kon i buḷoinea.

¹⁹ Manangka intua, poigumon nami sinbá ki Tuang in momontowdon kon tosingogon kon ki Bokí Wasti in diá bidon motaau mamangoi kon tayowon i Tuang. Bontow in tosingogon tatua in musti baḻíon undang-undang in Persia bo Media, sinbá diádon motaau bui inggamáan. Mopaḷut mako kon tua ogoidon in ḷoḻitúan i Bokí Wasti tatua kon bobay inta mopia-pia nongkon inia.

²⁰ Aka bontow in tosingogon i Tuang tua moibaya-bayádon mako kon bayongan in dodatuan inta mobanat tanaa, yo bayongan in buḷoi bobay in mohoromatbí kon i buḷoinea ḷoḷaki, pinomayá intau nooyúon andeka nobogá.”

²¹ Onu in pinoguman i Memukan tatua kinoibog i datu bo in intau mita moḷoben, dá ḷagidon inaidan i datu intua.

²² Sia in nokidia in surat parenta kon bayongan in propinsi in dodatuan, kon bonu in tosingogon bo pais kon batúan in propinsi. Parenta tatua in noguman kon bonu in batúan motoḷuadí, buḷoibí ḷoḷaki in musti mobaḻí tongguḷu, bo inta patus momontow kon tosingogon.