EPESUS 6 - Alkitab Singog In Mongondow Masa In Tanaa

Adí bo guyanga

¹ Uḻe! Moiko mongoadí mita inta saḷaku dumodudui i Kristus, duduiaibí in tonggina in guyangamu, sin natuabí in kinoibog i Allah aidanmu.

² “Horomatbí in ki amá bo ki inámu” tua in parenta inta totok in moponting nongkon i Allah, sin tua in noyotogot in dandi,

³ nanaa: “Sinbá mosanang bo moumur in kobiaganmu kon dunia naa.”

⁴ Bo moiko uḻe guyanga mita ḷoḷaki! Dika rupa-rupaanmai monimu in mosia modapot in tumorú. Nanaa in aidai: biag in mosia kotompia bo tundú in onu inta mopia bo tongginaai podudui inta kinoibog i Tuhan.

Ata bo tuang

⁵ Utatku mita inta nobaḻí ata! Duduiaibí in onu inta pinoki aid i tuangmu inta kon dunia naa. Aidai intua takin porasaan horomat, motoindudui, bo gina inta totu-totuu, naonda bo pogogaid monimu kon onu inta pinoki aid i Kristus tontaní.

⁶ Tua inaidan monimu, deemanbí tongá kon wakutu in koonto-ontongnea mako, sinbá dayowonnea in moiko. Táe aidaibí monimu intua saḷaku mogogundoi i Kristus inta dinumudui kon koibog i Allah takin gina motuḻid.

⁷ Oaidan inta inaidan monimu saḷaku mogogundoi, aidaibí intua takin sanang gina naonda bo ki Tuhan tontaní in binantungan monimu, deemanbí tongá intau.

⁸ Pokotoropdon, pomuḷoi in intau inta nobiag ata andeka intau inta nobebas, motarimabí kon tontuḻínea nongkon i Tuhan kon bayongan inta mopia inta ain inaidannea.

⁹ Bo moiko utat mita inta nobaḻí tuang! Mokopopiabí kon gina kon i atamu mita. Donaaibí tantú mopogogondok kon i monia. Sinbá kotaauan monimu, kon iko bo ki atamu mita tua in tongábí tobatú in Tuang monimu, Sia tuata in ki Tuhan inta kon soroga. Sia in diábí mopoyoposi kon intau.

Ḷoḷutam i Allah

¹⁰ Naa in singogku pangabisan, paké in ropot inta nouḻí monimu nongkon kawasa i Tuhan, sin moiko in notobatúdon takin-Nea.

¹¹ Bo paké domandon in touḷut in parang inta inogoi i Allah kon i monimu, sinbá moiko in mokotahang in monayow kon bayongan akaḷ in Ibilis inta diá mopia.

¹² Sin kita in moparang deemanbí moyogintayow in intau, táe moyogintayowbí in ropot in bayongan dimukud moraat inta nongawasa kon singgai moraat mita tanaa. Kita in monayow kon ropot in roho mita moraat inta nongawasa kon ḷangit.

¹³ Manangka intua, tanaa, pakédon touḷut in parang nongkon i Allah sinbá kon singgai moraat naa, moiko in mokosanggup monayow aka tubuon in saturu mita. Bo bá naonda in moiko moparang dapot in mopaḷut, yo umuranpa motorindog bo moropot in moiko.

¹⁴ Moiko in musti umuran mobasadia. Ginamu inta motoindudui kon i Allah aidaidon naonda bo abit bo gina motuḻid aidaidon naonda bo ḷambungmu uatoi.

¹⁵ Bo ginamu inta mobayag in mopoyaput in Habar Mopia inta mokopoangoi kon kobiagan motompia, tua in baḻídon sapatumu.

¹⁶ Bo pomuḷoi mako pakébí in pirisayamu kon i Tuhan saḷaku ḷoḷutam ponangkis; pirisaya monimu tua in mokopampingbí kon piot tuḷu inta nongkon moraat.

¹⁷ Gamádon in kasaḷamatan saḷaku sapoyo uwaja, bo singog i Allah saḷaku pitow nongkon Roho i Allah.

¹⁸ Aidai intua komintan takin mosambayang mopoigum kon totuḷung i Allah. Posambayangdon pomuḷoi mako podudui ibog in Roho i Allah kon i monimu. Umuran pobasadia in moiko bo dika umundok. Tantú sambayangai in bayongan umat i Allah.

¹⁹ Bo sambayangai doman in akuoi, sinbá wakutu in akuoi mosingog ogoian i Allah in singog mita inta moitutui, bo bá mobarani totok in akuoi mopotaau in onu inta noibunipa kon Habar Mopia tua.

²⁰ Lantaran Habar Mopia tuata, akuoi in nobaḻí totabá bo tanaa in binonu kon ponjara. Sambayangaibí sinbá mobarani in akuoi in mosingog kon soaḷ Habar Mopia tatua, ná inta patus singogonku.

Salam pangabisan

²¹ Ki Tikhikus, ki utat naton inta mosatia in mogogaid kon oaidan i Tuhan, mopotaaudon kon i monimu kon bayongan in yagi-yagi soaḷ akuoi, sinbá kotaauandon monimu in kaadaanku bo oaidanku.

²² Tuamai sia in pinotabáku namangoi kon i monimu bo mopotaau in kaadaan nami kon i monimu komintan, sinbá umuran moḷoben in gina monimu.

²³ Poigumon mako ki Allah ki Amá naton bo ki Tuhan Yesus Kristus mobogoi in kasampatan kon bayongan jamaat motobatú bo umuran mototabian bo umuran doman mopirisaya kon i Kristus.

²⁴ Igumon doman mako barakatan i Allah in moiko komintan inta motabi kon i Tuhan naton inta ki Yesus Kristus takin tabi inta diá moobo-obot. Horomat nami, Ki Paulus