EPESUS 5 - Alkitab Singog In Mongondow Masa In Tanaa

Kobiagbí kon bonu in bayag

¹ Moiko nion in ki adí mita i Allah inta kinotabi-Nea, tuamai in moiko musti dumudui kon onu inta koibog i Allah.

² Kobiagbí takin oyúon tabi, ná ki Kristus motabi kon i naton. Sia in nopokuruban in kobiagan-Nea kon i naton bo nobaḻí tobatú sosumba inta totok in mobondu bo inta mokosanang kon gina i Allah.

³ Moiko nion umat i Allah, tuamai in aid mita inta mokotor bo inta diá patus aidan, andeka ibog inta moiḻiu dika aidan kon sigad monimu sinbá diá in dodoyonan intau mita mopotaḷá kon i monimu.

⁴ Ná doman tua, dika mosingog kon inta moromú, inta mokotor bo inta diá in baragunanea. Táe moiko in mustidon mopoyaput in sukur kon i Allah.

⁵ Torop in singogku tanaa: intau inta mokotor in oaidnea, andeka inta mogaid kon inta diá patus aidan, andeka ibog inta moiḻiu (aid natua notongkaibí in aid mosumba kon berhala ibanea), dá intau mita natua in diábí baḻíon umat inta pinarentaan i Kristus bo i Allah.

⁶ Donaai in moiko koakaḷan in singog mita inta diá in baragunanea. Sin soaḷbí mita natua inta mokopomuká kon sakí in gina i Allah kon intau mita inta diá motoindudui kon i-Nia.

⁷ Manangka intua dikadon moyobayat in intau mita natua.

⁸ Moikopa tontaní koḻipod in mobiag doman kon sindip. Táe tanaa moiko in nobaḻídon umat i Tuhan, mangaḻenea kon tua, moiko in kon bonudon in bayag. Tuamai moiko in mustidon mobiag kon bonu in bayag.

⁹ Sin nongkon bayag tuata momuká in bayongan oaid inta mopia, motuḻid bo mobiag totu-totuu kon tayowon i Allah.

¹⁰ Poramujidon monotaau kon onu inta mokosanang kon gina i Allah.

¹¹ Dika mogaid kon soaḷ mita inta diá baraguna ná inta inaidan in intau mita inta nobiag kon bonu in sindip. Táe inggamáaibí in aid mita inta diá mopia natua. (

¹² Sin onu inta inaidan monia inta inumuni-uni tua, umpaka tongá ouman yo mokooyádon.)

¹³ Bayongan in yagi-yagi inta kinodoí in bayag, modaitbí koontongan, sin bayagbí in mopoontong kon bayongan in yagi-yagi sinbá mosilang.

¹⁴ Tuamai singog in nanaa, “Pobangondon, moiko inta nosiug, bo pobangondon nongkon sigad in intau minatoi! Dá sambayanganbí i Kristus in moiko.”

¹⁵ Manangka intua, tarukiradon kopira mongo naonda in kobobiagmu. Dikabí ná intau mita bodok; táe kobiagbí ná intau mita mobijaksana.

¹⁶ Pakédon kopia in kasampatan inta oyúon kon i monimu, sin masa in tanaa in masa bidon inta moraat.

¹⁷ Dika mokopobodok, táe tayakdon kopira mongo onu in kinoibog i Tuhan.

¹⁸ Donaai in moiko moḷoḷangu in anggur, sin tua in mokogoguyaat kon i monimu, táe ramujidon bá Roho i Allah in mongawasa kon i monimu.

¹⁹ Pakédon in singog mita inta nongkon Mazmur, dondong inta pinodayow kon i Allah bo dondong rohani, kon wakutu in moiko moyosingog. Kosanang in gina bo mopodondong in dodayow kon i Tuhan.

²⁰ Umurandon in moiko mopoyaput in sukur kon i Allah, ki Amá naton kon bayongan in yagi-yagi podoyon kon tangoi Yesus Kristus, ki Tuhan naton.

Doyowa motonibuḷoi

²¹ Sin mohoromat kon i Kristus, dá moiko mustibí mosiduduian.

²² Buḷoi, bobay in kotoinduduidon kon i buḷoimu, ná kototoinduduimu kon i Tuhan.

²³ Sin ki buḷoinea ḷoḷaki tua in tongguḷu i buḷoinea, ná ki Kristus inta nobaḻí tongguḷu in jamaat bo Datu doman inta Mopoposaḷamat kon jamaat inta nobaḻídon awak-Nea.

²⁴ Tuamai in naonda bo jamaat inta musti motoindudui kon i Kristus, yo musti doman natua in buḷoi bobay, kon bayongan in yagi-yagi musti in sia motoindudui kon i buḷoinea.

²⁵ Buḷoi ḷoḷaki, musti motabi kon i buḷoinea, ná doman tabi i Kristus kon jamaat inta dapot in noposarakan in awak-Nea sin kopontingan in jamaat tatua.

²⁶ Inaidan i Kristus intua sinbá motaau-Nea daritan in jamaat tatua takin totundú-Nea bo takin tubig inta pobaptis, sinbá motaaudon posarakan-Nea kon i Allah.

²⁷ Mangaḻenea kon tua, ki Kristus in noposadia in jamaat kinotompia kon tayowon i Allah, takin diá in gaatnea andeka inta motaau hojatan in intau ibanea.

²⁸ Dá mustibí doman natua in buḷoi ḷoḷaki, musti in sia totu-totuu motabi kon i buḷoinea ná kototabinea kon awaknea tontaní. Intau inta motabi kon i buḷoinea bobay, mangaḻenea kon tua, sia motabi kon awaknea tontaní. (

²⁹ Diábí kon dodai in onda in intau mosakí in gina kon awaknea tontaní. Táe tompiaan bo ḷukadanneabí ná doman ki Kristus monompia kon jamaat-Nea.

³⁰ Kinotaauanbí naton intua, sin kita in anggota mita in awak i Kristus.)

³¹ Kon Buk Motusi ain pinais nanaa, “Manangka intua tobatú ḷoḷaki in monaḷámai kon i amá bo kon i inánea sin motobatúdon i buḷoinea, bo taya dua in motobatúdon.”

³² Modaḷombí totok mangaḻe in tontagá tanaa, makusudnea in hubungan i Kristus bo jamaat.

³³ Táe tontagá tanaa noyohubung doman i monimu: Tuamai kotabibí in ki buḷoimu naonda bo kototabimu kon awakmu tontaní, ná doman tua, buḷoi bobay in musti tantú moramuji mohoromat kon i buḷoinea.