EPESUS 4 - Alkitab Singog In Mongondow Masa In Tanaa

Notobatú kon awak

¹ Manangka intua akuoi – saḷaku intau inta pinonjara sin nogaid kon oaidan i Tuhan – mopoigum totok kon i monimu: sinbá moiko, intau inta inoinídon in kobiag domandon ná inta kaadaanmu saḷaku intau inta inoiní i Allah.

² Umuranbí pokopoompá kon dodia, mokopoaḷus kon pososingog bo umuran domandon mokoposabar. Popoontongbí in tabimu kon oaid inta moibog mosituḷungan.

³ Ramujibí totok in mobiag moyodame sinbá kobiagan notobatú inta ain pinomia in Roho i Allah tantú koḷukadan.

⁴ Tongábí tobatú in awak bo tobatú in Roho. Dá natua doman in moiko inoiní sin moharap kon tobatú inta notongkai tua.

⁵ Tongábí doman tobatú in Tuhan, tobatú in pirisaya, tobatú in baptisan,

⁶ bo tobatú in Allah inta nobaḻí ki Amá in bayongan intau. Sia tuata in Tuhan in dunia naa inta nogaid pinongin bayongan in yagi-yagi bo nongawasa kon bonu in yagi-yagi.

⁷ Ki Kristus ain nobogoi in totabi-Nea kon inaton kon batúannea.

⁸ Sin kon bonu in Buk Motusi ain pinais nanaa, “Wakutu in Sia namonik in tampat inta totok in moḷantud, Sia nodia kon intau mobayong inta sinokodomok; bo Sia in nobogoi in totabi mita kon intau.”

⁹ Dá aka kai naton “Sia noponik” dá mangaḻenea kon tua munapabí in Sia noponag nodapot kon gantog in butá naa.

¹⁰ Bo Sia inta ain noponag tua, Sia doman tua inta ain noponik nodapot in tampat inta moḷantu-ḷantud nongkon ḷangit sahingga kon ondakabí in Sia oyúonbí kon dunia naa.

¹¹ Sia doman tua inta nobogoi in rasul, nabi bo intau mita inta mopoyaput in Habar Mopia, gombala bo guru mita.

¹² Mosia naa in inogoi i Allah sinbá umat i Allah tokotompiaan sinbá mosia in motaau mogaid kon oaidan i Tuhan bo moduḷu moposindog in awak i Kristus.

¹³ Sahingga in kita komintan motobatúdon kon pirisaya bo motongkaidon in pongortian kon soaḷ ki Adí i Allah. Bo kita in mobaḻí intau mita inta noguyangdon kon pirisaya, inta koonggot-koonggot kodugang-kodugangdon in kososompurna ná ki Kristus.

¹⁴ Dá kita in diábí naonda bo mongoadí mita inta pinoyaying magí-mako in noyagi-yagimai in totundú in intau mita inta mongomunapik. Mosia tua in mongonguman kon diá totuu sin mopotaḷá kon onu inta noitutui.

¹⁵ Táe! Mustibí in kita mopoontong in aid mita inta moitutui takin tabi moḷoben, sahingga kon bayongan in yagi-yagi kita modugangdon mosompurna naonda bo ki Kristus inta tongguḷu naton.

¹⁶ Kon bonu in pimpinan-Nea bayongan in anggota in awak tatua nopipid notompia noyotondoḷ in ugat bo buk mita in tuḷan. Bo aka kon batúan in anggota mita tatua in mogaid podudui in oaidannea dá bayongan awak in mobiagbí moguyang bo moropot bo kototabi.

Kobiagan mobagu

¹⁷ Tuamai in podoyon kon tangoi i Tuhan, naa in singogku bo ponoropku: donaai in mobiag naonda bo intau inta diá nonotaau kon i Allah bo tongá morai kon inta diá in mangaḻenea.

¹⁸ Raian monia tua in nosindipdon. Diábí kinotaauan monia in kobiagan inta inogoi i Allah, sin mosia in beresibí diá nonotaau in onu bo onu soaḷ ki Allah. Natua in mosia sin gina in motogat.

¹⁹ Diábí in oyá monia sahingga in mosia tantúdon dumudui kon ibog in awak monia bo mobiag mokotor kinooibogbí in gina.

²⁰ Táe ki Kristus inta ain kinotaauan monimu in deemanbí natua!

²¹ Kinodongogan bidon monimu in soaḷ Sia! Bo saḷaku dumodudui-Nea mita, sinundú domandon kon i monimu in sipat mita i Allah inta oyúon kon i-Nia!

²² Manangka intua taḷaaidon in aid monimu koḻipod inta dinumudui kon kobobiag koyongan inta ain pinoguyaat in bayongan ibog mokobaradosa.

²³ Toimbagudon in bayongan gina bo raianmu.

²⁴ Bo kobiagdon in moiko saḷaku intau mobagu inta pinomia podudui in ibog i Allah, inta moibog dinumudui kon tabiat moitutui, motuḻid bo motusi.

²⁵ Manangka intua Utatku mita, dikadon moibog monguboḷ. Mokopojujurbí aka mobiag, sin kita komintan naa in tumpaḷabí anggota in awak i Kristus.

²⁶ Aka moiko bo tumorú, yo mokopopia sinbá diá baradosaan popisí in torúmu tatua. Dika tumorú tumongo singgai tua,

²⁷ sinbá moiko in diá kawasaan in Ibilis.

²⁸ Intau inta biasa monakow, musti mogogaidon in monakow, bo mustidon mogaid bá mokouḻí kon onu in pakéonnea bo motaau doman motuḷung kon intau ibanea inta paraḷu tuḷungan.

²⁹ Aka mosingog in moiko yo dika mosingog kon inta moraat, singogdon in onu inta mokobaraguna moginropot kon pirisaya bo singog mita tonggina inta motaau potuḷung kon intau ibanea. Sin singog mita inta baraguna in mokopoangoi kon kopiaan kon i monia inta mokodongog.

³⁰ Dika mopoajar kon gina in Roho i Allah. Sin moiko aindon sinontandaan-Nea sinbá mobaḻí kapunyaan i Allah. Bo Roho doman tatua inta mobaḻí jaminan, kon singgai pobebasan tatua in moiangoibí kon i monimu.

³¹ Ḷumbúdon in bayongan inta mokosakí kon gina, donaaidon motagú kon gina bo rogi. Donaai domandon umuran moyogenggeng bo mosiponapudan in diá totuu bo ḷumbú domandon in bayongan inta moraat.

³² Táe mokopopia kon gina kon tumpaḷa intau, bo moiko in musti domandon mototabian, bo mosiampungan naonda bo ki Allah inta ain nongampung kon i monimu pinongin i Kristus.