EPESUS 3 - Alkitab Singog In Mongondow Masa In Tanaa

Ki Paulus pinotabá kon intau mita inta deeman Yahudi

¹ Akuoi ki Paulus, pinonjara popisí in nogaid kon oaidan i Kristus Yesus sin kopontingan monimu intau inta deeman Yahudi.

² Ain bidon dinongog monimu, kon ki Allah in lantaran kopopia in gina-Nea, dá inogoian-Neadon in oaidan tanaa in akuoi sin kopontingan monimu.

³ Ain pinoguman i Allah in tomayá-Nea inta binuni-Nea tua bo ain pinotaau-Nea kon i nakó. (Soaḷ tanaa in pinaiskudon kino poḷok kon ḻimonik,

⁴ bo aka kobacaandon monimu intua, yo komangaḻeandon monimu onu inta noibunipa soaḷ ki Kristus, ná kinomomangaḻeku kon tua.)

⁵ Koḻipod, onu inta noibuni tatua diá kon dodai in onda in pinotaau kon intau, táe tanaa, ain pinoniata in Roho i Allah kon rasul mita bo kon nabi-Nea mita.

⁶ Naabí inta noibuni tatua: Pinongin Habar Mopia tatua, intau deeman Yahudi in moitakin domandon mokorasa kon barakat mita i Allah inta koḻipod tongá sinadia kon intau mita in Yahudi. Intau mita inta deeman Yahudi in nobaḻídon toawakan in awak inta tobatú tua, bo moitakin doman motarima kon onu inta pinodandi i Allah pinongin i Kristus Yesus.

⁷ Ki Allah ain noponotabi kon i nakó in oaidan mopoyaput magí-mako in Habar Mopia tatua. Sinarimaku in totabi tatua pinongin kawasa i Allah inta nogaid kon bonu in awakku naa.

⁸ Kon sigad in bayongan umat i Allah, yo akuoibí naa in totok in mokooyá. Táe ki Allah ain noponotabi in oaidan tanaa kon inakó; oaidan mopoyaput in Habar Mopia soaḷ kaoyúonan i Kristus inta diá modai-dait;

⁹ bo akuoi in pinaké doman i Allah mogaid kon oaidan tatua sinbá bayongan in intau monotaau kon naonda in pinogogaid i Allah inta nomia kon dunia naa, mogaid kon tomayá-Nea inta binuni-Nea kon dunia naa nongkon tungkuḷ intua.

¹⁰ Makusud i Allah tua in bá tanaa mako jamaat-Nea, mopotaau in bayongan yagi-yagi soaḷ kabijaksanaan i Allah kon pomarenta mita bo kon bayongan inta nongawasa kon soroga.

¹¹ Tua in inaidan i Allah podudui in tomayá-Nea inta mononoi, inta inaidan-Nea pinongin i Kristus Yesus, Tuhan naton.

¹² Popisí in mopirisaya kon i Kristus bo lantaran notobatúdon takin-Nea, dá kita inogoiandon in daḷan dimiug kon i Allah takin totu-totuu mopirisaya.

¹³ Tuamai naa in igumonku: donaaibí moḻia-ḻiaw in gina in mokoontong kon rorigaku inta popisí in moiko, sin bayongan in rorigaku tua, untukbí kopiaan monimu.

Tabi i Kristus

¹⁴ Manangka intua akuoi in sinumungkud kon tayowon i Amá.

¹⁵ Nongkon i-Niabí intua, bayongan motoḷuadí kon soroga bo kon dunia naa in motarima kon sipatnea tontaní.

¹⁶ Mosambayang in akuoi sinbá ki Allah inta totok in momulia tua in moibog moginrigon kon batinmu takin Roho-Nea.

¹⁷ Igumondon mako ki Kristus inta pinirisaya monimu in mogutundon kon bonu in gina monimu bo moiko in mobiag moidoyon kon bonu in tabi.

¹⁸ Akuoi in umuran mosambayang, sinbá moiko takin bayongan in umat i Allah in monotaaudon kon kobobarakat, koḷoḷanggó, koḷoḷantud bo kododaḷom in tabi i Kristus,

¹⁹ inta aka tongá podoyon kon raian intau yo diábí monotaau kon tua moako-ako. Sambayanganku sinbá moiko in monotaaudon kon tabi i Kristus tatua, sahingga moiko in kawasaandon in sipat i Allah inta nosompurna.

²⁰ Takin kawasa i Allah inta tantú moigonú kon bonu in gina naton, motaau in ki Allah mogaid kon mobayo-bayong nongkon onu inta motaau igumon andeka inta koraian naton.

²¹ Ki Allah in musti umuran dayowon, modapot kon adí bo ompu kon bonu in jamaat, pongin i Yesus Kristus. Dinayo-dayowdon in ki Allah modapot in kopaḷutannea! Amin.