DONDONG MOḶANTUD 8 - Alkitab Singog In Mongondow Masa In Tanaa

¹ Uḻe, aka kuma iko kiutatku toinaan, inta nokoimontandon noneté kon i ináku, yo notantúbí kon ayokanku aka moyodungkuḷku kon daḷan, diábí in moningkuḻe kon inakó.

² Iko in diaankubí kon baḷoi i ináku, sinbá iko motaau motundú kon inakó. Iko in poinumonku in anggur mobondu, bo tubig in bungai in delima.

³ Ḻima koḷoigimu notonoi kon inakó ḻimamu koḷanan nokoyot kon inakó.

⁴ Podandidon, ei bobay mita in Yerusalem, kon moiko in diábí monuyayow kon totabian, modapot in moguḻí in ibognea.

Dondong Inggonomnea Bobay mita

⁵ Ki ine intua inta namangoi nongkon padang gurun, inumandoḷ kon batoḷ in dodobnea? Ginuḷungku in iko kon siungon in pangkoi in apel, tampat pinonogusianan bo pinononggadían kon inimu.

Bobay

⁶ Baḻídon in akuoi batoḷ in dodobmu, dikabí mokoyot kon i ineka koḻikudbí in akuoi; sin tabi tua in ná koropot in popatoi, bo ibog in awak mongawasa naonda bo popatoi. Dokotnea naonda bo dokot in tuḷú inta modokot moborambang totok.

⁷ Tubig mobarong in diábí mokoinggamá kon tanob, bo ḷunud in diábí mokoiḻig kon inia. Aka intau tobatú mobogoi in bayongan kapunyaannea sin motaḷui kon tanob, yo notantú bidon kon tongábí singkuḻe in mouḻínea.

Ki ḷoḷaki mita in bobay

⁸ Oyúon in ki ai-ai nami bobay inta nointokpa in teténea. Onu in pomiaan nami kon inia aka oyúon in mamangoi moigum mongantang kon inia?

⁹ Aka kuma bo sia in dinding tobatú, yo posindogon nami in ḷangkeang saḷaka kon tudunea. Aka kuma bo sia tua in bonawang tobatú, yo bonoboianbí nami in kayu ḷokuyú.

Bobay

¹⁰ Akuoi naa in dinding tobatú, bo tetéku in ḷangkeangnea. Kinotaauanbí in batoḷ in dodobku kon inia mosanang in akuoi.

Ḷoḷaki

¹¹ Ki Salomo in kogobá in anggur kon Baal-Hamon; gobá tatua inogoinea kon moḷoḷukad mita. Kon batúannea nobogoi in doit saḷaka toribu poguboḻi kon bungainea,

¹² bo nokouḻí kon doyowa nogatut ponondan kon pinogaidannea. Biódon mako in doit tatua kon inimu, Salomo, bo kon intau mita inta noḷukad kon gobámu. Táe gobá in anggurku, kapunyaanku tontaní, oyúon kon tayowonku.

¹³ Ei, intau mita kon gobá, yobayat mita moibog mokidongog kon tosingogonmu; popodongogdon intua kon inakó!

Bobay

¹⁴ Batoḷ in dodobku, angoidon naonda bo kijang, naonda bo ki adí in rusa kon buḷud in Beter.