DONDONG MOḶANTUD 7 - Alkitab Singog In Mongondow Masa In Tanaa

Ḷoḷaki

¹ O, mongodeaga inta motaingkat, mopia totok in sioḷmu momaké in silop tatua. Pongongawakmu naonda bo ḷambá, pinomia in intau mongongurig.

² Putodmu naonda bo palo noḻimbung inta diá kon dodai in onda in kinodaitan in anggur inta ain pinoyobauk. Sianmu naonda bo pinosipunan kon gandum, iḻibu in bungang mita mobondu.

³ Tetému naonda bo ki adí in rusa doyowa, rusa apang doyowa.

⁴ Sigogowmu naonda bo ḷangkeang uwaḷa in gajah. Matamu naonda bo tabang mita kon Hesybon, kon diug in bonawang Batrabim. Ngiungmu naonda bo ḷangkeang kon Buḷud in Libanon, inta noitayow kon kotá in Damsyik.

⁵ Uḷumu naonda bo Buḷud in Karmel; buokmu inta sinuḷapid naonda bo aḻibobag, mokosanang in moindoi umpaka datu.

⁶ Totuu moḷunat in iko uḻeku, inta kinotabi kon sigad inta kinosanang.

⁷ Awakmu ná kotaingkat in pangkoi in kurma, tetému tua in bungainea mita.

⁸ Moibog in akuoi moponik kon pangkoi in kurma tatua, bo mogamá kon bungainea mita. Igumon mako in tetému in naonda bo simpungoian in bungai in anggur, tompot poginaanmu ná kobondu in bungai in apel,

⁹ bibigmu ná koromimit in tubig in anggur! Pomayádon mako sinbá anggur tatua moiḻig mayá kon batoḷ in dodobku, inta diá moobo-obot; bo mokopomuká kon totanoban, modapot in kon intau mita inta koyogot mosiug.

Bobay

¹⁰ Akuoi in kapunyaan i batoḷ in dodobku, sia in moibog kon inakó.

¹¹ Koḻigai in kita mayá in rawang, uḻe batoḷ in dodobku, bo mosiug kon gobá kon yua-yuak in bungang totabian.

¹² Igai in kita doḷo-doḷom mayá in gobá, bo moindoi mongo pangkoi in anggur nonubudon, bo bungainea nobukádon; degá pangkoi in delima nonoburdon. Kon tua ogoikudon in tabiku kon inimu.

¹³ Pangkoi in koitó mobondu in bónea, kon diug in ngara naton oyúon in bungai mita in ayop inta mopira in nanamnea, inta noonggotdon in sinipú bo inta bagupa sinipú; tua in sinagú kon inimu, uḻe batoḷ in dodobku.